Yakaunpaus 4:1-3
Nqe cim:
“Yam dabtsi ua rau nej sib ntaus sib tua, thiab ua rau nej sib cav sib ceg? Puas yog tej kev ntshaw uas nyob hauv nej lub siab ua rau nej ua li ntawd?” (Yakaunpaus 4:1)
Lus nug rau sawvdaws xav:
- Yakaunpaus qhia paub cov ntseeg tabtom ntsib kev kub ntxhov dabtsi?
- Vim li cas lawv ho ntsib tej kev kub ntxhov ntawd?
- Peb yuav tsum ua li cas kom txiav tu nrho nrog tej yam ua rau muaj kev kub ntxhov?
Coob tug xav tias thaum lub ntiajteb yim muaj kev vam meej, muaj kev txawj ntse nce qib, ces tibneeg yuav muaj lub neej zoo dua qub, txaus siab rau tej kev cheemtsum thiab muaj kev kaj siab. Tiamsis qhov tseeb tabtom qhia peb ib daim duab txawv tej kev xav ntawd. Nyob hauv ntau lub xyoo los no, lub ntiajteb tshwmsim ntau yam kev kub ntxhov thiab kev txomnyem. Pheej muaj kev tsov rog tshwmsim txhua qhov ua rau coob leej raug kev ploj tuag. Vim li cas nyob hauv lub ntiajteb muaj kev vam meej, tiamsis tseem pheej muaj kev tsov rog tsis tseg?
Tig rov mus saib Pawg Ntseeg xubthawj, tomqab uas qhia rau cov ntseeg paub txog lub tswvyim saum ntuj tshwm muaj hauv cov neeg uas ua rau sawvdaws nyob sib haum xeeb, tseb txojkev sib haum xeeb thiab sau txojkev ncajncees (Yakaunpaus 3:18), ces Yakaunpaus qhia peb paub txog ib qhov tseeb txawv tej lus hais saud. Tsimnyog ua neej sib haum xeeb, tiamsis cov uas nyeem nws tsab ntawv ho tabtom muaj kev “sib ntaus sib tua, sib cav sib ceg” (nqe 1). Txawm yog lub ntsiab tseeb ntawm ob lo lus no yog hais txog kev ua tsov ua rog, tiamsis nyob ntawm no Yakaunpaus tsis siv los hais txog tej kev tsov rog, tiamsis yog siv los hais txog tej kev tsis sib haum, kub ntxhov, sib ntxub, hauv cov ntseeg.
Qhov twg yog vimchiv rau tej kev kub ntxhov ntawd? Qhov xubthawj, Yakaunpaus hais tias, yog vim “tej kev ntshaw uas nyob hauv nej lub siab” (nqe 1). Thaum neeg muaj kev ntshaw loj, yog tsis paub tswj siab ces yuav ua rau muaj kev kub ntxhov hauv lawv tus kheej, thaum ntawd lawv yuav tsim kev kub ntxhov rau lwm tus. Qhov ob, Yakaunpaus qhia ntxiv tias, “Nej xav yuav yam ub yam no, tiamsis tsis tau, nej txawm yuav muab luag tua povtseg. Nej ntshaw luag tug, tiamsis tsis tau, nej txawm sib cav sib ceg, sib ntaus sib tua” (nqe 2). Qhov peb, yog vim tsuas xav txog yus tus kheej: “Thaum nej thov nej tsis tau, rau qhov nej lub siab phem, tej uas nej thov ntawd nej yuav coj mus siv raws li nej lub siab nyiam xwb” (nqe 3).
Thaum twg uas nyob hauv peb tseem muaj tej kev ntshaw rau tus kheej, thiab peb tsis tau tej ntawd ua yus tug, tswj tsis taus lub siab, ces yuav ua rau sawvdaws muaj kev kub ntxhov. Hais mus rau qhov dav, yog peb tseem ua neej tsuas xav txog yus, tsuas txaus siab rau tus kheej xwb, ces thaum ntawd yuav tsis muaj kev thajyeeb rau peb tus kheej thiab rau pab pawg uas muaj peb ua tswvcuab nyob hauv. Yuav kom qaij dhau tej kev kub ntxhov thiab muaj kev thajyeeb, peb txhua tus yuav tsum tsis txhob ua lub neej raws li peb lub siab nyiam, tiamsis yuav tsum ua lub neej raws li Yexus Khetos lub siab nyiam (II Kauleethaus 5:15), thiab yuav tsum “txo hwjchim thiab ib tug tsis txhob khav hais tias ib tug zoo dua ib tug” (Filipis 2:3).
Thov Vajtswv,
Tus Tswv, nyuam yaus paub tias kev ntshaw thiab lub siab khib ua rau nyuam yaus tsis muaj kev thaj yeeb. Thov zam txim rau nyuam yaus thiab pab nyuam yaus txhob xav txog tus kheej xwb, tiamsis ua lubneej rau Koj tau ntsejmuag. Nyuam yaus tuav Yexus Khetos lub npe thov, Amees.
Peb puas tabtom ua neej nyob vim peb tus kheej, lossis ua neej pub rau Vajtswv thiab lwm tus?
Nyeem Vajluskub hauv peb lub xyoos: Yaxayas 24
Kênh Youtube BHKTHN:
