Tơdrong Pơđơ̆k 24:3-4
“Đơ̆ng tơdrong gơh hơgei đei pơm tơiung hnam, Đơ̆ng đon hlôh wao na hnam đei pơm pơjing kơjăp. Đơ̆ng gơh hơgei na đei lơ anih ‘bĕnh tơmam gĭt păng‘lơ̆ng. (Tơdrong Pơđơ̆k 24:3-4)
Nơ̆r jet tơchĕng pơwao:
– Pơting hăm Tơdrong Pơđơ̆k 3:19, ‘bar nơ̆r lăm Hla bơar Pơđơ̆k năr ‘nâu tơ’bôh kơ bơ̆n tơdrong kiơ?
– Nơ̆r “hnam” ’nâu wă khan tơdrong kiơ hai? Hơnă hnam dơnŏ Bơngai Lui kăl kơ pơm tơiung thoi yơ?
– Bơ̆n kăl kơ pơm kiơ wă bơwei kơjăp păng ba ăn tơdrong tôm mah ăn kơ hnam dơnŏ?
Hnam dơnŏ noh bơih kon pơlei pơla lăm teh đak âu, hnam dơnŏ bơih gĭt kăl dêh, Kră Yang pơjing ăn đei hnam dơnŏ đơ̆ng lu năr Sư pơjing plĕnh teh blŭng a sơ̆ hloi. Hnam dơnŏ đei adrol kơ đei pơlei, kư̆m đei adrol kơ đei bơngai pơgơ̆r teh đak păng đei adrol kơ đei Hnam akŭm. Hla bơar Pơđơ̆k 24:3 đei pơgơ̆p ‘bar nơ̆r “Gơh hơgei” “hlôh wao”. Dan nơ̆r gơh hơgei adrol, dan nơ̆r hlôh wao tơtil kơ ‘noh, dan kiơ̆ kơ hơrĭ hơrĭ thoi noh ‘bơm thoi Kră Yang ‘Bok Kei-Dei dan hơnă plei teh, pơjing lu hơtăl plĕnh:“Hăm tơdrong gơh hơgei Kră Yang pơjing teh đak; Hăm tơdrong băt hlôh Sư săp lu hơtăl plĕnh”(Pơđơ̆k 3:19). Thoi noh ‘bar nơ̆r lăm Hla bơar Pơđơ̆k bơ̆n pơhrăm năr ‘nâu tơ’bôh kơ bơ̆n hnam đei pơm tơiung: “ ‘bĕnh tơmam gĭt păng ‘lơ̆ng” pơma kơ tơdrong tôm mah, mă-lei tơdrong tôm mah sot soi jơnoi đunh noh bơ̆n khŏm pơm tơiung kơpal hơnă tơdrong hli yom kơ Kră Yang, yua kơ Sư bơih tu tơm tơdrong gơh hơgei,“Hli yom kơ Kră Yang jing tơm tơdrong hlôh wao” (Pơđơ̆k 1:7)
Lăm nơ̆r Hêbrơ, nơ̆r “hnam” ‘nâu lu sư kư̆m yua wă khan hnam dơnŏ, adrĕch adrung, dah đĭ-đăng kon pơlei hloi. (Tơdrong jang 18:8; Hê 8:8…). Thoi Kră Yang pơkă wă ăn pŭn hiôk kơ “hnam” Đawit mưh kon sâu sư hli yom kơ Kră Yang păng chu pơm kiơ̆ dôm nơ̆r Kră Yang tơtă. (II.Samuel 7:16). Tơdrong adrĕch adrung kơjăp păng tôm mah noh ưh kơ minh pang gah mŭk tơmam đĕch ôh, mă-lei pang gah bơhngol hai. Tơdah minh pôm hnam dơnŏ ayơ sư ưh kơ pơm tơiung kơpal hơnă wă khan tơdrong gơh hơgei đơ̆ng Kră Yang tơ’bôh ăn, wă khan ưh kơ hŏk pơhrăm, ưh kơ pơm kiơ̆ nơ̆r Kră Yang lei ưh kơ pha ra kiơ kơ hnam đe pơm kơpal hơnă chuơh, na mưh truh bơyan ‘mi tih,đak lơ̆p, kial hơbŭt, hnam noh hơlŭng păk pơchah hoch đĭ. (Mathiơ 7:24-27)
Dang ei yang Satan hơtai oei pơpôi tơdrong pran sư blah hnam dơnŏ bơih mă lơ dêh. Lu sư nŏng pơrăm wă kơ hnam dơnŏ bơ̆n hiong lê̆ tơdrong gĭt lăm tơdrong ‘mêm, wă kơ hnam dơnŏ bơ̆n hiong lê̆ nơ̆r pơkă wă wei băl đĭ chăl arih noh, păng sư wă kơ bơ̆n ưh kơ tơchĕng ‘blŏk kơ tơdrong ‘lơ̆ng rơgoh lăm ŭnh-om. Kon pơlei Kră Yang kăl kơ bơwei hnam dơnŏ mă tơpă, yua kơ ‘bơ̆t anăp hnam dơnŏ bơ̆n yang kơnê̆ nŏng kơ chă đon blah hnam dơnŏ bơ̆n. Bơ̆n đei tơmam tơblah ‘lơ̆ng, hơđơ̆ng ngơngei wă pĕng tang, wă blah plơ̆ yang kơnê̆ noh nơ̆r ‘Bok Kei-Dei bơih.Hnam dơnŏ bơ̆n athei hŏk pơhrăm nơ̆r ‘Bok Kei-Dei, krao khan wă kơ đei iŏk tơdrong bơtho gơh hơgei đơ̆ng Yang Bơhngol ‘Lơ̆ng.Bơ̆n kư̆m athei kơchăng kơ tơdrong tơchĕng bơ̆n, kơchăng kơ tơdrong pran bơ̆n ngăl wă pơm kơ jơhngơ̆m grê gah tơdrong hnam dơnŏ tơklah dih băl. Kon pơlei Kră Yang, rim ‘nu kăl kơ wei kơjăp đêl nơ̆r bơ̆n pơkă hăm Kră Yang, pơkă tơduă ŭnh-om‘bơ̆t jơ bơ̆n iŏk băl blŭng a khan khŏm wei băl đĭ chăl arih noh păng bơ̆n athei ‘blŏk Kră Yang bơih tơm, Sư bơih hơnă kơjăp hnam dơnŏ bơ̆n. Bơ̆n athei chơchă, krao khan apinh tơdrong gơh hơgei đơ̆ng Kră Yang pơjing pơdơ̆ng hnam dơnŏ kơjăp pran,tôm mah, chơt hiôk.
Kơkuh kơ Ih Kră Yang, inh bơnê kơ Ih yua kơ Ih bơih Yŏng Tơ’ngla hnam dơnŏ inh. Apinh Yang Bơhngol tơ’blŏk kơ inh wer ataih đơ̆ng tơdrong yang kơnê̆ pơhlŭ pơlung, đĭ jơhngơ̆m hŏk pơhrăm nơ̆r Ih,ling-lang pơgơ̆p tơ’bưh hăm Ih wă kơ gơh hơgei lăm tơdrong pơjing tơiung, bơwei hnam dơnŏ kơjăp. Inh krao khan yua anăn Kră Yang Yêsu Krist, Amen!
Tơdrong arih hnam dơnŏ bơ̆n dang ei thoi yơ? Bơ̆n kăl kơ tơplih ming tơdrong kiơ wă kơ hnam dơnŏ kơjăp pran, tôm mah lăm tơdrong Kră Yang wă?
Đŏk nơ̆r ‘Bok Kei-Dei lăm pêng sơnăm: Êsai 23.
Kênh Youtube BHKTHN:
