Klei Aê Diê Blŭ: Y-Yakơ 4:1-3
Êlan kliăng: “Mơ̆ng kbiă hriê klei bi blah leh anăn klei bi mneh msao hlăm phung diih? Amâo djŏ hĕ klei anăn kbiă hriê mơ̆ng klei kđeh tluh dôk bi blah hlăm ai tiê diih? (Y-Yakơ 4:1)
Klei êmuh ksiêm mĭn: Y-Yakơ brei thâo ya bruă phung đăo dôk tuôm? Ya ngă diñu tuôm hŏng boh klei anăn? Ya klei drei ngă čiăng khut khat lui jih mta phŭn ba klei bi mneh msao?
Lu mnuih bi mĭn tơdah ala ƀuôn ƀrư̆ hruê mrâo mrang, mdrŏng sah hŏng klei đĭ kyar mơ̆ng kreh knhâo hdră mnêč, snăn hnơ̆ng jăk klei hdĭp anak mnuih srăng ƀrư̆ hruê dưi mđĭ mơh, klei čiăng srăng dưi bi hrăp leh anăn grăp čô srăng dưn klei êđăp ênang. Ƀiădah boh sĭt dôk brei drei ƀuh sa rup mdê snăk. Hlăm dŭm thŭn giăm anei, dlông rŏng lăn mâo lu klei bi blah, rŭng răng. Klei bi blah ăt dôk mâo nanao leh anăn lar ti lu anôk ba klei djiê êka huĭ hyưt kơ lu mnuih snăk. Ya ngă hlăm lăn ala mrâo mrang ƀiădah ăt mâo nanao klei bi blah amâo mdei?
Lŏ wĭt dlăng ênuk Sang Aê Diê tal êlâo, leh mblang kơ phung đăo thâo kơ klei thâo mĭn yuôm bhăn bi êdah mơ̆ng lu pô bi grăng, rah mjeh klei êđăp ênang wiă klei kpă ênô (Y-Yakơ 3:18), snăn Y-Yakơ lač kơ sa boh sĭt amâo djŏ snăn ôh. Hrô kơ hdĭp hlăm klei êđăp ênang, phung dlăng hră ñu dôk mâo klei “klei bi mneh msao” (êlan 1). Wăt tơdah mblang klei êlam kơ dua boh blŭ anei jing lač kơ klei bi blah lĭng kahan, kdrăn bi blah, ƀiădah klei Y-Yakơ čiăng lač tinei amâo lač kơ klei bi blah ôh, ƀiădah klei amâo thâo bi djŏ, hdơ̆ng bi nač khăng mâo ti krah phung đăo.
Ya jing mta phŭn ba klei bi mneh msao anăn? Tal sa, kyua “klei kđeh tluh dôk bi blah hlăm ai tiê diih” (êlan 1). Dŭm klei kđeh tluh amâo dưi ksiêm dlăng srăng ngă kơ grăp čô amâo mâo klei êđăp ênang ôh, bi blah hlăm ai tiê hjăn pô, mơ̆ng anăn bi mneh msao hŏng pô mkăn. Tal dua, kyua klei kđeh tluh amâo dưi mâo: “diih tluh ktang kơ mnơ̆ng, ƀiădah amâo dưi mâo ôh snăn diih mâo klei bi msao leh anăn bi blah” (êlan 2). Tal êlâo, kyua klei kđeh tluh čuôt klih mơ̆ng drei pô, “Diih akâo leh anăn amâo mă tŭ ôh, kyuadah soh diih akâo, čiăng yua mnơ̆ng anăn tui si kđeh diih čiăng” (êlan 3).
Tơdah hlăm phung drei mâo klei kđeh tluh tui si pô čiăng, leh anăn mâo klei kđeh tluh amâo dưi mâo, amâo dưi ksiêm dlăng, snăn srăng atăt kơ sa êpul bŏ hŏng klei bi mneh msao. Lŏ mblang jing, tơdah drei dôk hdĭp kơ klei tŭ dưn hjăn pô, hdĭp bi hrăp kơ klei pô čiăng hjăn pô, snăn amâo dưi thâo ôh klei êđăp ênang hlăm pô leh anăn hlăm êpul êya mâo pô jing sa hlăm anăn. Čiăng ñĕ kơ klei bi mneh msao leh anăn dưn klei êđăp ênang, grăp čô drei brei “amâo srăng lŏ dôk hdĭp kơ diñu pô ôh, ƀiădah kơ Pô djiê leh anăn kbiă lŏ hdĭp leh kyua diñu” (II Kôrantô 5:15) leh anăn brei “yap phung mkăn jing prŏng hĭn kơ diih pô” (Philip 2:3).
Drei dôk hdĭp kyua klei pô čiăng amâodah hdĭp kyua Khua Yang leh anăn kơ grăp čô mnuih?
Wah lač: Ơ Khua Yang, kâo thâo klei kđeh tluh, klei pô čiăng ngă kơ kâo amâo dưi thâo ôh klei êđăp ênang kơ pô leh anăn hŏng pô mkăn. Akâo kơ Ih pap brei kơ kâo leh anăn akâo kơ Yang Mngăt Jăk đru kâo hdĭp dưi hŏng klei pô čiăng, hdĭp myơr klei guh kơang kơ Ih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
