Henplais 5:1-4
Nqe cim.
“Txhua tus Povthawj Hlob puavleej yog Vajtswv xaiv neeg los ua thiab tsa lawv ua Vajtswv txoj haujlwm pab sawvdaws. Thaum tus Povthawj Hlob ua txoj haujlwm ntawd, nws muab khoom fij rau Vajtswv thiab muab tsiaj tua theej sawvdaws lub txhoj” (Henplais 5:1)
Lus nug rau sawvdaws xav:
- Ua Povthawj Hlob yog tes haujlwm dabtsi?
- Tus neeg zoo licas thiaj tau los ua Povthawj Hlob?
- Aloos yog tus Povthawj Hlob zoo licas?
- Vim licas niaj hnub nimno tsis pom ua tes haujlwm ntawd lawm?
Nyob hauv txojkev ntseeg yam uas feem coob sawvdaws puavleej paub yog qhov uas noob neej tau ua txhaum thiab raug cais tawm ntawm Vajtswv lawm. Twb yog vim li ntawd thiaj muaj tes haujlwm povthawj, Vim “txhua tus Povthawj Hlob puavleej yog Vajtswv xaiv neeg los ua thiab tsa lawv ua Vajtswv txoj haujlwm pab sawvdaws. Thaum tus Povthawj Hlob ua txoj haujlwm ntawd, nws muab khoom fij rau Vajtswv thiab muab tsiaj tua theej sawvdaws lub txhoj” (nqe 1). Tus thawj ntawm cov povthawj ces yog Tus Povthawj Hlob, ib xyoo ib zaug ncaj hnub ua Kevcai Theej Txhoj, nws tau mus hauv Chav Dawbhuv Kawg Nkaus hauv Lub Tsevntaub lossis Lub Tuamtsev fij tsiaj theej txhoj txhiv tus kheej thiab cov pejxeem lub txim tabmeeg Vajtswv.
Ua tes haujlwm tseemceeb ntawd, Tus Povthawj Hlob yuav tsum yog tus “paub ua siab ntev pab cov neeg uas ruam thiab yuam kev ua txhaum” (nqe 2). Tsis tas li ntawd xwb, “Tsis muaj leejtwg yuav muaj cuabkav tsa nws ua tus Povthawj Hlob, tsuas yog Vajtswv pom zoo tsa tus twg tus ntawd thiaj tau ua, ib yam li Vajtswv pom zoo tsa Aloos ua tus Povthawj Hlob” (nqe 4). Yog li ntawd, yuav ua ib tug nyob nruab nrab ntawm Vajtswv thiab tibneeg, Tus Povthawj Hlob yuav tsum paub txog tib neeg kev qaug zog, thiab tus ntawd yuav tsum tau Vajtswv xaiv tsa tsis yog los ntawm tibneeg.
Aloos, uas yog Mauxes tus tijlaug, yog cov Yixalayees thawj tug Povthawj Hlob. Nws tes haujlwm yog Vajtswv taw kom ua thiab nws sawv cev ntawm cov pejxeem tabmeeg Vajtswv. Tiamsis peb pom tau hais tias Aloos tsis yog ib Tus Povthawj Hlob ua zoo txaus. Vim yog tibneeg txhaum, muaj ntau zaus Aloos tau ua tej yam tsis phim. Xws li, tsimnyog ua raws tus Tswv siab nyiam tuag nthi, tiamsis thaum cov pejxeem taij thov nchuav tus mlom nyuj, Aloos tau cia lawv nchuav tus mlom nyuj los pe (saib Khiavdim 32). Lwm zaus ntxiv, yog thaum Aloos nrog nws tus muam saib tsis taus Mauxes tus uas yog Vajtswv tus cevlus, yog tus thawjcoj thiab thov Vajtswv pab cov pejxeem (saib Teev Npe 12).
Los ntawm Tswv Yexus txojkev tuag theej txhoj, tib neeg tau cai mus cuag Vajtswv tim ntsej tim muag, thiaj tsis cheemtsum tes haujlwm Povthawj Hlob ntxiv lawm. Txawm li ntawd, los nyob hauv tus Tswv cov menyuam, tus Tswv yeej xaiv tsa ib txhia los ua Nws tes haujlwm pab sawvdaws. Ntawm no yog ib teg haujlwm tseemceeb uas tus neeg raug xaiv yuav tsum xyuamxim ua kom tiav, thiab cov ntseeg yuav tsum paub tias cov ntawd kuj yog neeg txawj qaug zog thiab sawvdaws yuav tsum thov Vajtswv pab lawv.
Thov Vajtswv.
Tus Tswv, nyuam yaus ua Koj tsaug vim Koj xaiv ib txhia los ua haujlwm rau sawvdaws. Thov Vaj Ntsujplig pub hwjchim rau lawv, kom lawv ua tiav tes haujlwm uas Koj muab cob, ua haujlwm tawg paj txi txiv, thiab coj tau coob leej los cuag Koj. Amees.
Peb twb ua dabtsi thiab yuav ua dabtsi pab cov neeg uas Vajtswv xaiv los ua haujlwm?
Nyeem Vajluskub hauv peb lub xyoos: Exekees 2:1-3:27
Kênh Youtube BHKTHN:
