Klei Aê Diê Blŭ: Hêbrơ 5:1-4
Êlan kliăng: “Kyuadah grăp čô khua ngă yang prŏng mâo klei Aê Diê ruah leh mơ̆ng phung mnuih mâo bruă bi ala kơ mnuih ti anăp Aê Diê, čiăng myơr mnơ̆ng brei leh anăn mnơ̆ng ngă yang kyua klei soh.” (Hêbrơ 5:1-4)
Klei êmuh ksiêm mĭn: Ya jing bruă Khua Ngă Yang Prŏng? Ya klei čoh čuăn mâo kơ sa čô Khua Ngă Yang Prŏng? Si khua ngă yang prŏng Y‑Arôn jing? Ya ngă hruê anei amâo lŏ mâo ôh bruă anei?
Sa hlăm lu atur klei đăo păt čiăng jih jang phung đăo thâo klă sơăi jing jih jang mnuih soh leh sơăi leh anăn bi ktlah leh hŏng Aê Diê. Kyuanăn yơh phŭn mâo hĕ bruă khua ngă yang, “mâo klei Aê Diê ruah leh mơ̆ng phung mnuih mâo bruă bi ala kơ mnuih ti anăp Aê Diê, čiăng myơr mnơ̆ng brei leh anăn mnơ̆ng ngă yang kyua klei soh” (êlan 1). Pô dôk ti kŏ phung khua ngă yang jing Khua Ngă Yang Prŏng, grăp thŭn sa bliư̆ hlăm Knăm Bi Tui Klei Soh, ñu dưi mŭt hlăm adŭ Doh Jăk Hĭn hlăm Sang Čhiăm amâodah hlăm Sang kkuh mpŭ čiăng myơr mnơ̆ng bi tui klei soh kơ ñu pô leh anăn kơ phung ƀuôn sang ti anăp Aê Diê.
Kyua bruă yuôm bhăn anăn, snăn klei čoh čuăn kơ Khua Ngă Yang Prŏng jing “thâo pap kơ phung mluk leh anăn kơ phung klah đuĕ” (êlan 2). Êngao tinăn, “Amâo mâo pô ruah kơ ñu pô bruă mpŭ anăn, knŏng tơdah Aê Diê iêô ñu leh, msĕ si Y‑Arôn” (êlan 4). Snăn yơh, jing pô bi ala plah wah Aê Diê hŏng mnuih, brei Khua Ngă Yang Prŏng thâo pap kơ klei awăt anak mnuih, leh anăn ñu pô jing pô Aê Diê ruah leh anăn mjing amâo djŏ anak mnuih mjing ôh.
Y‑Arôn, ayŏng khua gĭt gai Y‑Môis, jing Khua Ngă Yang Prŏng tal sa kơ phung ƀuôn sang Israel. Aê Diê pô ruah leh anăn mjing ñu pô bi ala kơ phung ƀuôn sang nao ti anăp Aê Diê. Ƀiădah lŏ mñă sa mta, Y‑Arôn pô amâo djŏ sa čô Khua Ngă Yang Prŏng klă ênŭm ôh, kyuadah ñu jing sa čô mnuih soh, mâo blư̆ Y‑Arôn ngă klei amâo năng hŏng bruă ñu. Si tô hmô, tui si djŏ Y‑Arôn srăng mă bruă kơ Yêhôwa Aê Diê Israel hŏng jih ai tiê, jih klei mĭn, ƀiădah lĕ, ti anăp klei phung ƀuôn sang mgô̆, Y‑Arôn sa ai hŏng diñu tuh mkra sa drei êđai êmô mah pioh kơ phung ƀuôn sang kkuh mpŭ (dlăng Klei Kbiă 32). Sa anôk mkăn, Y‑Arôn dua amai ñu keh nač kơ Y‑Môis jing khua pô hưn êlâo kơ Aê Diê, jing pô gai gĭt leh anăn wah lač brei kơ phung ƀuôn sang (dlăng Klei Yap 12).
Găn hŏng klei Yang Yêsu djiê bi tui klei soh, anak mnuih dưi nao tlă anăp hŏng Aê Diê kyuanăn bruă Khua Ngă Yang Prŏng amâo lŏ yuôm ôh. Wăt snăn dưn, ti krah phung ƀuôn sang Aê Diê, Aê Diê ăt mdơ̆ng đa đa mnuih pioh mă bruă kơ Ñu leh anăn đru phung anak čô Ñu. Anei jing bruă mpŭ yuôm bhăn čiăng kơ pô Aê Diê ruah thâo răng čiăng dưi bi leh bruă doh jăk Aê Diê jao leh, leh anăn brei pô mkăn thâo pap brei kơ klei awăt digơ̆ leh anăn đru wah lač brei kơ digơ̆.
Ya bruă drei ngă leh, leh anăn dôk ngă čiăng đru phung mă bruă kơ Aê Diê?
Wal lač: Bi mni kơ Ih Ơ Aê Diê kyuadah Ih ruah leh anăn mdơ̆ng leh mnuih mă bruă kơ Ih ti krah phung hmei. Akâo klei myang Yang Mngăt Jăk bi bŏ digơ̆, čiăng kơ digơ̆ dưi bi leh bruă yuôm bhăn Ih jao leh kơ digơ̆, mă bruă kơ Khua Yang mâo boh, leh anăn đru lu mnuih hriê giăm Khua Yang hĭn.
Dlăng Klei Aê Diê Blŭ hlăm tlâo thŭn: Y‑Êskiêl 2:1–3:27.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
