II Xwmtxheej 11:13-23
Nqe cim
“Yexus hais rau cov thwjtim hais tias: Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus.” (Mathais 16:24).
Lus nug rau sawvdaws xav:
- Vim licas cov povthawj thiab cov Levis uas nyob Yixalayees cheebtsam tuaj cuag Vajntxwv Lehaunpau-as?
- Leejtwg raws lawv qab los?
- Tej no ua rau tebchaws Yudas zoo licas?
- Peb lubneej puas ua rau cov neeg nyob ibncig peb muaj kev pauv hloov?
Vim tsis xav kom cov pejxeem mus nram Yeluxalees pehawm tus Tswv, vajntxwv Yelaunpau-as uas nyob Qaum teb tau ua “tej chaw teev dab saum tej ncov roob teev tej mlom tshis thiab mlom nyuj uas nws puab”. Vajntxwv tau tsa cov uas tsis yog xeem Levis los ua povthawj teev hawm nws tej mlom. Cov povthawj raws li tus Tswv Txojcai tsis tau ua povthawj lawm, lawv thiaj tso lawv tej tshav tsiaj thiab lawv tej teb tseg (Teev Npe 35:1-5) thiab khiav los nyob nram tebchaws Yudas thiab hauv lub nroog Yeluxalees. Lawv tau tso qhov chaw lawv ibtxwm nyob tseg mus nyob qhov chaw deb. Lawv tsis ua liaj ua teb, yug tsiaj yug txhu hauv lawv feem av tiamsis lawv tso txhua yam tseg thiab khiav mus nyob qhov chaw uas tau pehawm thiab tau ua tus Tswv tes haujlwm.
Tsis yog cov Levis xwb, tiamsis txhua tus yog lwm xeem uas “muab siab npuab tus Tswv uas yog cov Yixalayees tus Vajtswv” puavleej nrog cov Levis los nyob rau hauv Yeluxalees pehawm “lawv cov yawgkoob tus Vajtswv”. Los ntawm tes haujlwm khiav tawm no, qhia tau hais tias tus Tswv yog lawv cov yawgkoob thiab yog lawv tus Vajtswv. Lawv kuj tso txhua yam tseg kom tau los pehawm tus Tswv los ntawm qhov tseeb, tau ua raws tej uas tus Tswv qhia tsis pub pe dab pe mlom (Khiavdim 20:4-6). Lawv xav ua lubneej raws li lawv txojkev ntseeg, tau pehawm thiab tua tsiaj hlawv fij rau tus Tswv ntawm lub Tuamtsev hauv nroog Yeluxalees, uas yog qhov chaw tus Tswv xaiv tseg (II Xwmtxheej 7:12).
Tsis ua li vajntxwv Yelaunpau-as uas pe mlom, vajntxwv Lehaunpau-as tau txais tos cov neeg muab siab npuab tus Tswv ntawd thiab tuav kev pehawm tus Tswv hauv Tuamtsev nroog Yeluxalees. Dhau ntawm cov neeg no lubneej sab kev ntseeg, Vajtswv tau foom hmoov rau tebchaws Yudas muaj zog, txhawb vajntxwv Lehaunpau-as nyob ruaj khov, rau qhov lawv tau ua lubneej raws nraim li vajntxwv Daviv thiab vajntxwv Xalumoos txojkev tswjhwm tau peb lub xyoos.
Tswv Yexus qhia hais tias, “Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus” (Mathais 16:24). Yuav kom tau raws tus Tswv qab yuav tsum tswj tus kheej. Peb yuav tsum “muab siab npuab tus TSWV” thiab ua Nws txoj haujlwm, yuav tsum txaus siab hlo tso tej qhov txhia chaw, tes haujlwm, lubneej, tej yam yus ntshaw, tsis hais tso txojsia tseg yog tias tus Tswv xav kom ua li ntawd, tawm mus ua tus Tswv haujlwm, tshajtawm Txojmoo Zoo kom tus Tswv lub tebchaws “muaj zog” thiab “nyob ruaj khov”. Dhau qhov ntawd yuav muaj coob tug tau txais kev cawmdim thiab loj hlob sab kev ntseeg.
Peb puas hnov tus Tswv nqua hu peb tso yam dabtsi tseg los mus txhim kho Vajtswv lub tebchaws hauv ntiajteb no?
Thov Vajtswv
Tus Tswv, tej uas Koj tau ua rau nyuam yaus ntau heev suav tsis txheeb li. Koj tso koj txojsia tseg tuag saum tus ntoo khaublig vim nyuamyaus. Thov pab nyuam yaus txaus siab hlo tso txhua yam tseg “mus raws Koj qab”, pehawm Koj thiab ua lubneej raws Koj siab nyiam. Amees.
Nyeem Vajluskub peb lub xyoos: Ntawv Nkauj 40:11-42:4
Tshooj Youtube BHKTHN: https://www.youtube.com/c/bhkthn
