Klei Aê Diê Blŭ: II Klei Yăl Dliê 11:13-23
Êlan kliăng: “Leh anăn Yêsu hưn kơ phung ƀĭng kna Ñu, “Tơdah sa čô čiăng tui hlue Kâo, brei ñu hngah hĕ klei ñu pô čiăng, klam kyâo bi kal ñu pô, leh anăn tui hlue Kâo” (Y‑Mathiơ 16:24).
Klei êmuh ksiêm mĭn: Ya ngă phung khua ngă yang leh anăn phung Lêwi leh anăn Israel nao kơ Mtao Rôbôam? Hlei tui hlue diñu? Ya klei hmaĭ phung anei ba kơ čar Yuđa? Si klei hdĭp drei hmaĭ kơ phung riêng gah?
Kyua amâo čiăng brei phung ƀuôn sang nao ti Yêrusalem čiăng kkuh mpŭ kơ Aê Diê anăn Mtao Jêrôbôam ti kwar Dưr “mjing dŭm anôk dlông” čiăng kkuh kơ rup yang ñu ngă leh. Mtao jao kơ phung khua ngă yang amâo jing djuê ana Lêwi čiăng mprăp kơ bruă kkuh mpŭ kơ phung yang anăn. Phung khua ngă yang dưi ruah hlue si klei bhiăn Aê Diê amâo lŏ dơ̆ng dưi ngă bruă khua ngă yang ôh, kyua diñu lui leh dŭm ƀuôn prŏng leh anăn ngăn drăp diñu (Klei Yap 35:1-5) čiăng nao ti Yêrusalem ti krĭng Yuđa. Diñu lui leh klei hdĭp mưng ngă čiăng nao ti anôk kbưi. Hrô kơ bruă lŏ dơ̆ng ngă bruă leh anăn phưi mnơ̆ng rông hlăm kdrăn rơ̆k pô snăn diñu ruah lăm lui jih čiăng nao ti anôk dưi kkuh mpŭ leh anăn mă bruă kơ Aê Diê.
Amâo djŏ knŏng phung hlăm djuê ana Lêwi ôh ƀiădah djăp djuê ana Israel jing “phung mâo ai tiê čuăn čiăng duah Yêhôwa Aê Diê phung Israel” ăt tui hlue phung khua ngă yang leh anăn phung Lêwi čiăng nao ti Yêrusalem kkuh mpŭ kơ “Yêhôwa Aê Diê phung aê digơ̆”. Hŏng bruă ngă anei, diñu bi êdah Aê Diê klă sĭt jing Aê Diê phung aê diñu leh anăn kơ diñu pô. Diñu ăt lăm lui jih jang čiăng dưi kkuh mpŭ kơ Aê Diê djŏ hdră, čiăng dưi hlue ngă klei Aê Diê mtô amâo dưi kkuh kơ rup yang (Klei Kbiă 20:4-6). Diñu čiăng hdĭp djŏ hŏng klei đăo pô, dưi kkuh mpŭ leh anăn myơr mnơ̆ng ngă yang kơ Aê Diê hlăm Sang yang doh jăk Aê Diê ti Yêrusalem, jing anôk Aê Diê ruah leh (II Klei Yăl Dliê 7:12).
Mklăk wĭt hŏng klei Mtao Jêrôbôam kkuh kơ rup yang, Mtao Rôbôam lŏ dơ̆ng tŭ jum phung jih ai tiê tui duah Aê Diê anăn leh anăn ngă nanao klei kkuh mpŭ kơ Aê Diê ti Sang yang Yêrusalem. Mơ̆ng klei hdĭp mgăt phung anei, Aê Diê tuh leh klei hơêč hmưi kơ čar Yuđa dưi kjăp leh anăn ktang, đru kơ Mtao Rôbôam dưi mdrŏng sah hlăm tlâo thŭn kyua hlăm dŭm thŭn anei diñu mŭt leh hlăm êlan Mtao Đawit leh anăn Mtao Salômôn ngă leh.
Khua Yang Yêsu mtô, “Tơdah sa čô čiăng tui hlue kâo, brei ñu hngah hĕ klei ñu pô čiăng, klam kyâo bi kal ñu pô, leh anăn tui hlue kâo” (Y‑Mathiơ 16:24). Klei ngă čiăng tui hlue Khua Yang jing lui pô. Brei drei “mâo ai tiê čuăn čiăng duah Aê Diê” leh anăn mă bruă Ñu, brei lui jih ngăn drăp, bruă knuă, klei hdĭp mưng ngă, hơĭt kjăp, jih jang klei mưng hĭn hŏng pô, amâodah wăt klei hdĭp tơdah Khua Yang čiăng, grăp knhuang êbat mă bruă kơ Aê Diê, hiu hưn Klei Mrâo Mrang jăk čiăng kơ Ƀuôn Ala Mtao Aê Diê dưi “kjăp” leh anăn “ktang”. Mơ̆ng anăn srăng mâo lu mnuih dưi bi mtlaih leh anăn klei hdĭp mngăt đĭ hriê kơ prŏng.
Drei ƀuh Aê Diê iêô pô lăm lui ya klei čiăng đru mkŏ mjing Ƀuôn Ala Mtao Ñu ti lăn?
Wah lač: Ơ Khua Yang, ya klei Ih ngă kơ kâo prŏng prĭn amâo dưi yap ôh. Ih ăt djiê leh ti kyâo bi kal kyua kâo. Akâo kơ Ih đru kâo srăng lui jih čiăng “tui hlue Ih”, kkuh mpŭ kơ Ih leh anăn hdĭp tui si klei Ih čiăng.
Dlăng Klei Aê Diê Blŭ hlăm tlâo thŭn: Klei Mmuñ Hđăp 40:11-17; 41:1-13; 42:1-4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
