Luka 1:57-66
“Ơ dăm, gah ih âu đe gô anăn ih bơngai pơtruh nơ̆r ‘Bok Kei-Dei mă Kră Yang Tih Hloh, yua kơ ih gô năm hơdrol kơ Kră Yang wă hơmet ming kon bơngai hơdrol kơ Sư truh.” (Luka 1:76)
Nơ̆r jet tơchĕng pơwao:
– Bre ‘bok yă Sachari dan chă anăn kon sư noh kiơ?
– Tơdrong hơ’mon đe tơpŭ kơ Yôhan ‘Batem ăn kơ lu bơ̆n ‘bai pơhrăm kiơ?
– Lu bơ̆n ưang kơ Kră Yang tơdrong kiơ lăm năr ‘blŏk hơdơ̆r kơ Kră Yang jur jing bơngai lăm sơnăm ‘nâu?
Kơplah pêng khei oei tơ hnam yă Êlisabet, na duch Mari wih brŏk tơ pơlei sư kơdih, lei na yă Êlisabet tơpŭ kơ minh ‘nu kon drŏnglo lăm dôm jĭt sơnăm arih pơmat tat mơlâu kơ đe yua kơ ưh kơ đei kon hơ’lơ̆p, truh jơ năr Kră Yang ăn bơih, Kră Yang đei “tơ’bôh tơdrong ‘mêm mơnat.” Ăn kơ sư. Lu bôl buăl hăm kon pơlei pơla kơtơ̆ng ang tơdrong noh lu sư wang chơt hiôk hơdai hăm hnam dơnŏ Sachari. Tơpă ưh kơ đei tơdrong chơt hiôk ayơ tih hloh kơplah bre sư sơnăm đĭ kră bơih na đei hĭ kon drŏnglo. Truh tơhngam năr bơih. Na bre sư năm ăn kơ đe kăt tơdra akar kon sư kiơ̆ kơ tơdrong juăt na lu sư khan anăn Sachari kư̆m lei lăi anăn ‘bă sư. Mălei yă Êlisabet khan “ưh ôh! Bơ̆n anăn sư Yôhan đĕch” Kiơ̆ thoi nơ̆r Linh jang ‘lơ̆ng đei tơbăt lê̆ adrol. ‘Bok Sachari oei ưh kơ gơh pơma, na sư chih tơ gơ’bang iĕ thoi âu: “Anăn sư Yôhan”. Na jơ noh ‘bă sư gơh pơma hloi, nơ̆r sư pơma blŭng a noh ưang kơ ‘Bok Kei-Dei. Đei ‘bar tơdrong lu bơ̆n pơhrăm iŏk đơ̆ng tơdrong hơ’mon đe tơpŭ kơ Yôhan ‘Batem:
Mă minh: Lăm tơdrong juăt bơngai Juđê anăn minh ‘nu bơngai sư đe gĭt pơtih kơ bơngai noh, anăn Yôhan lăm nơ̆r Grĕk wă khan: “’Bok Kei-Dei mơnat” Lăm tơdrong dŏng pơklaih ‘Bok Kei-Dei mơnat, Yôhan âu bơih bơngai mă wă hơmet trong kơ Yang Mêsi. Anăn Sachari wă khan “’Bok Kei-Dei ‘blŏk kơ sư”. Wă pơma tơdrong tơpăt Kră Yang hăm nơ̆r Sư pơkă, păng anăn Êlisabet wă khan “’Bok Kei-Dei đei pơkă pơkăm” wă pơma kơ Kră Yang bơih Yang mă trŏ kơ bơ̆n gơnangl; Anăn lăm hnam dơnŏ ‘bok Sachari đei pơma ‘bơm kơ lăm tơdrong Dŏng pơklaih ‘Bok Kei-Dei mơnat păng tơdrong tơpăt Kră Yang ‘Bok Kei-Dei, bơnê kơ Kră Yang đei dan hơmet bơngai wă hơmet trong kơ Yang Dŏng pơklaih jur thoi kon nge wă dŏng pơklaih kon bơngai yoch.
Mă ‘bar: Mă khan ‘Bok Kei-Dei yua lơ bơngai lăm ‘năr đe tơpŭ kơ Yêsu mălei lăm lu sư ưh kơ đei bu ưang kơ sư kơdih, mălei đĭ đăng lu sư tă kơkuh kơ ‘Bok Kei-Dei hơri ưang kơ Kră Yang ngăl. Đơ̆ng Mari, yă Êlisabet, ‘bok Sachari, păng lu bơngai mă ‘bôh tơdrong đe tơpŭ kơ Yêsu hăm lơ rơbâu Linh jang ‘lơ̆ng, lu bơngai wei triu, lu ‘bok pơjâu đơ̆ng gah hơlĕch đei chih lê̆ lăm puăn sơ̆p hla bơar Tơdrong ‘Nao ‘Lơ̆ng, đĭ đăng tă kơ ưang kơ ‘Bok Kei-Dei păng kon nge noh.
Lu bơ̆n oei yak năm lăm năr ‘blŏk kơ Kră Yang Yêsu jur jing kon bơngai, trŏ tơpă bơ̆n gơh tơgŭm hơmet pơrŏ, pai sa, hơmet tơdă akŭm, pơhrăm hơri ưang kơ ‘Bok Kei-Dei, apinh Kră Yang, tơgŭm bơ̆n đĭ jơhngơ̆m kơkuh kơ Kră Yang, ưang kơ tơdrong ‘mêm Sư, jơhngơ̆m iơ̆m dim, tơdrong tơpăt Kră Yang ‘Bok Kei-Dei, ‘nĕ kơ đei bu lăm lu bơ̆n pơang khan bŏn gơh jang tơdrong ‘nâu tơdrong to. Mălei athei đĭ jơhngơ̆m bơnê kơ Kră Yang Yêsu đei jur jing kon bơngai, chu lôch yua kơ tơdrong yoch kon bơngai wă kơ bơ̆n gơh klaih.
Kơkuh kơ Ih Kră Yang, ‘blŏk hơdơ̆r kơ đe tơpŭ kơ Yôhan ‘Batem đei tơ’blŏk kơ inh gah tơdrong iơ̆m dim, tơdrong ‘mêm ăn đĕch păng tơdrong tơpăt Ih tih tơpă. Apinh Ih tơgŭm inh wă kơ inh ưang kơ Ih ưh kơ trŏ lăp lăm năr đe tơpŭ kơ Ih ‘nâu đĕch ôh, mălei wă kơ đĭ chăl arih inh. Yua anăn Kră Yang Yêsu Krist, Amen.
Lu bơ̆n ‘blŏk hơdơ̆r kơ năr Kră Yang Yêsu jur jing bơngai hăm jơhngơ̆m thoi yơ?
Đŏk sơ̆p hla bơar ‘Bok Kei-Dei lăm pêng sơnăm: Tơdrong jang 11
Kênh Youtube BHKTHN:
