Klei Aê Diê Blŭ: Y-Luk 1:57-66
Êlan kliăng: “Bi ih, Ơ anak điêt, arăng srăng pia ih khua pô hưn êlâo kơ Pô Ti Dlông Hĭn, kyuadah ih srăng êbat ti anăp Khua Yang čiăng mkra êlan Ñu”(Y-Luk 1:76)
Klei êmuh ksiêm mĭn: Si Y-Sakari hŏng mô̆ ñu čuăn bi anăn kơ anak diñu? Ya klei hriăm kơ drei mơ̆ng klei yăl dliê klei kkiêng kơ Y-Yôhan Pô ngă ƀaptem ? Ya klei drei mpŭ mni kơ Aê Diê hlăm yan bi hdơr hruê Khua Yang hriê ti lăn ala thŭn anei?
Leh hlăm brô tlâo mlan dôk hŏng H’Êlisabet, H’Mari wĭt snăn H’Êlisabat kkiêng kơ sa čô anak êkei. Lu sui thŭn hdĭp hlăm klei hêñ kyua plao anak, truh mmông Aê Diê brei, Ñu “bi êdah leh kơ ñu klei pap prŏng” kơ gơ̆, kyua anăn tơdah phung riêng gah hmư̆ klei hâo hưn diñu nao hơ̆k mơak mbĭt hŏng gŏ sang Y-Sakari. Klă sĭt amâo mâo ôh klei mơak prŏng hĭn leh diñu jing khua thŭn leh dưi mâo sa čô anak êkei. Truh hruê tal spăn, diñu lŏ nao čiăng dlăng klei khăt klĭt kơ hđeh, leh anăn hlue si klei bhiăn, diñu lŏ bi anăn hđeh anăn jing Y-Sakari hlue anăn ama gơ̆. Ƀiădah H’Êlisabet lač, “Hơăi! Srăng bi anăn gơ̆ Y-Yôhan” msĕ si klei dĭng buăl jăk hưn êlâo. Y-Sakari dôk kmlô, ăt čih hră điêt “Anăn gơ̆ Y-Yôhan”, mmông anăn mtam Y-Sakari ha ƀăng êgei, êlah ñu tlaih, ñu blŭ leh anăn mpŭ mni kơ Aê Diê. Mâo dua mta drei hriăm mơ̆ng klei yăl dliê kơ klei kkiêng Y-Yôhan Pô ngă ƀaptem.
Tal sa, hlăm dhar kreh Yuđa, anăn sa čô mnuih khăng mâo klei yuôm bhăn mdê hjăn pô anăn. Anăn Y-Yôhan hlăm klei Hêbrơ jing “Aê Diê bi êdah klei pap”. Hlăm klei bi mtlaih bŏ hŏng klei pap Aê Diê, Y-Yôhan srăng jing pô mkra êlan kơ Yang Mêsi. Anăn Y-Sakari jing “Aê Diê bi hdơr”, lač kơ klei sĭt suôr Aê Diê hŏng klei Ñu ƀuăn leh. Leh anăn anăn H’Êlisabet jing “Aê Diê kat asei leh” lač kơ Ñu jing Pô năng đăo knang jih hnơ̆ng. Anăn phung hlăm gŏ sang Y-Sakari lač kơ klei bi mtlaih bŏ hŏng klei pap leh anăn klei sĭt suôr kluôm dhuôm Aê Diê. Bi mni kơ Khua Yang kyua Ñu mprăp leh pô mkra êlan kơ Pô Bi Mtlaih hriê ti lăn ala čiăng bi mtlaih anak mnuih.
Tal dua, wăt tơdah Aê Diê yua leh lu mnuih hlăm klei kkiêng kơ Khua Yang Yêsu ƀiădah amâo mâo ôh hlei pô dưi mpŭ, ƀiădah jih jang mđing kơ Aê Diê, mpŭ mni hơêč hmưi knŏng kơ Ñu đuč. Mơ̆ng H’Mari, H’Êlisabet, Y-Sakari leh anăn phung ƀuh klei kkiêng kơ Khua Yang msĕ si êbâo čô dĭng buăl jăk, phung kiă biăp, phung knhâo mơ̆ng čar Ngŏ dưi čih hlăm pă hdruôm hră Klei Mrâo Mrang Jăk, jih jang mâo asăp bi mni kơ Aê Diê leh anăn Hđeh Điêt.
Drei dôk mŭt hlăm yan bi hdơr hruê Khua Yang Yêsu hriê ti lăn ala, năng ai drei đru hlăm klei bi msiam, mnơ̆ng ƀơ̆ng huă, mkŏ mjing hdră, hgŭm hlăm êpul mmuñ bi mni kơ Aê Diê…, akâo kơ Aê Diê brei ai tiê drei mđing kơ Khua Yang, mpŭ mni kơ klei pap Ñu brei, klei jăk, klei sĭt suôr Aê Diê, đăm ôh hlei pô hưn kơ pô kyua ya klei pô ngă leh. Brei jih ai tiê bi mni kơ Khua Yang Yêsu kkiêng leh jing mnuih, tŭ klei djiê kyua klei soh anak mnuih čiăng drei mâo klei bi mtlaih.
Hŏng si ai tiê drei bi hdơr klei kkiêng kơ Khua Yang Yêsu?
Wah lač: Ơ Khua Yang, lŏ bi hdơr klei kkiêng kơ Y-Yôhan Pô ngă ƀaptem mñă kơ kâo klei jăk, klei pap leh anăn klei sĭt suôr Aê Diê prŏng prĭn. Akâo kơ Ih đru kâo myơr klei hơêč hmưi bi mni kơ Aê Diê amâo djŏ knŏng hlăm yan Noel ôh ƀiădah jih klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
