Jop 34:10-15
“Tơpă Kră Yang ‘Bok Kei-Dei ưh kơ đei pơm kơnê̆ Kră Yang Tih Hloh ưh đei pơđŏng lê̆ tơdrong tơpăt.” (Tơdrong Pơđơ̆k 34:12)
Nơ̆r jet tơchĕng pơwao:
– ‘Bok Êlihu khan kiơ gah tơdrong ‘lơ̆ng tơpăt Kră Yang?
– Tơdrong pơtrŭt kơplah sư đei nơ̆r pơma tơpăt gah tơdrong ‘lơ̆ng tơpăt Kră Yang ‘noh kiơ?
– Bơ̆n hlôh păng đei mơn gah gah tơdrong tơpăt Kră Yang thoi yơ?
‘Bok Êlihu pơma gah tơdrong pơmat ‘bok Jop mă sư oei pŭ iŏk lăm trong 10-15, sư adrin tơdŏng topă kơ tơdrong tơpăt Kră Yang ‘Bok Kei-Dei. Sư pơma khan hơđăl truh ‘bar ‘măng: “Kră Yang ‘Bok Kei-Dei ưh kơ đei layơ pơm kơnê̆” (trong 10, 12). Tơpă, tơdrong tơpăt Kră Yang tơbăt kơ bơ̆n ‘bôh thoi âu. Sư ưh kơ đei pơm glăi tơdrong kiơ ôh. Đei lu tơdrong truh, mă bơ̆n iŏk lăp đon dah ưh, Kră Yang oei tơpăt hơnơ̆ng. Tơdrong tơpăt Sư noh minh lăm lu tơdrong ‘lơ̆ng tôm lăm Sư (Hơriso 92:15; Rôm 9:14).
Lăm tơdrong pơmat ‘bok Jop, ‘bok Êlihu pơma găn lê̆ mă đơ̆ng tơdrong kiơ ayơ ‘nei na khan ‘Bok Kei-Dei gơh pơm ưh kơ tơpăt. Tơdrong ‘noh wă pơma hơđăl khan ‘Bok Kei-Dei Sư pơm lăp trŏ kơ Sư bơih khan tơbăt thoi ‘nâu thoi nơ̆r tơ’blŏk kơ kon bơngai, mă khan tŏk bŏk đei tơdrong hơwơ̆l hơwang ‘bơ̆t đei tơdrong pơmat, kư̆m ưh kơ gơh khan ‘Bok Kei-Dei ưh kơ tơpăt.
Mă khan lei ră, ‘bok Êlihu glăi bơih kơplah sư yua tơdrog ‘lơ̆ng tơpăt Kră Yang wă jô̆ jâu ‘bok Jop pơm yoch, sư khan ‘bok Jop đei tơdrong phak yua kơ đơ̆ng tơdrong yoch sư kơdih (trong 11). ‘Bok Êlihu đei pơma pơang kơplah sư khan sư bơngai tang măt Kră Yang păng pơ̆n nuih chrih kơ ‘bok Jop. Tơdrong tơpăt Kră Yang kiơ̆ kơ tơdrong tơpăt. Sư lăng ‘bôh lăm rim jơhngơ̆m, tơdrong tơchĕng păng đĭ dôm tơdrong kon bơngai bơ̆n pơm jang. Ưh kơ đei kiơ gơh ôn kơ Sư. Mă khan thoi ei, tơdrong ‘noh ưh kơ sĭ khan dôm tơdrong pơmat kon bơngai tă kơ tơdrong đơ̆ng ‘Bok Kei-Dei phak ngăl ôh. Tơdrong gleh glăn pơmat hiong hiach ‘bok Jop ưh kơ đei yua kơ đơ̆ng sư pơm yoch ôh mălei noh minh tơdrong wă pơlong lăng đon lui sư lui kơ Kră Yang (Jop 2:10; 42:1-6). Mă khan Kră Yang ling lang tơpăt, mălei Sư kư̆m Tơ’ngla ‘bĕnh kơ tơdrong ‘mêm păng mơnat kơ kon bơngai mă băt tơbral đơ̆ng rŏng kơ đei tơdrong pơlong Kră Yang lwp đon ăn tơdrong truh, Kră Yang đei hơmet ming dơ̆ng păng ăn dơ̆ng ‘bar atăl tôm tơmam ‘bok Jop đêl hiong (Jop 42:10). Kơplah ‘bok Êlihu lăng kơ tơdrong tơpăt Kră Yang wă jô̆ jâu ‘bok Jop pơm yoch lei na đei glăi dêh tơpă noh hiơt lê̆ tơdrong Kră Yang, păng yua iŏk tơdrong tơchĕng pơwao kon bơngai wă tơblang tơdrong Kră Yang pơm kơ chăl arih bơngai nai.
Tơdrong tơpăt Kră Yang khan hơđăl kơ đon lui bơ̆n khan, mă khan kơplah đei tơdrong ưh kơ tơpăt hơnơ̆ng, ‘Bok Kei-Dei oei bơ̆jang kiơ̆ kơ tơdrong gơh hơgei tih tin Sư, tơdrong mă kon bơngai bơ̆n ưh kơ hlôh. Tơ’ngla ‘lơ̆ng tơpăt khan hơđăl tơdrong Kră Yang pơgơ̆r ling lang trŏ, păng tuch luch, tơdrong tơpăt gô kĕ jei. Lăm teh đak ưh kơ tơpăt, bơ̆n lui kơjăp ‘Bok Kei-Dei tơpăt păng tơdrong ‘mêm Sư tih dêh thoi noh bơ̆n gơh gơnang kơ Sư.
Kơkuh kơ Ih Kră Yang, inh bơnê kơ Ih yua kơ Ih ling lang wei nơ̆r pơkă păng tơpăt. Apinh Kră Yang tơgŭm inh ling lang lui gơnang kơ tơdrong tơpăt Kră Yang wă kơjăp kiơ̆ Ih mă khan inh ưh kơ hlôh đĭ tôm tơdrong truh kơ inh. Krao khan yua anăn Kră Yang Yêsu Krist, Amen.
Pơhrăm băt kơ ‘Bok Kei-Dei ‘lơ̆ng tơpăt, bơ̆n hăm wă yak năm mă khan đei dôm tơdrong truh ưh?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 6
Kênh Youtube BHKTHN:
