I Pêtrôs 2:18-20
“Mă tôm tơdrong jang, iĕm athei jang mă tơpă, jang hăm đĭ jơhngơ̆m, ‘nĕ kơ pơm đon, yua kơ iĕm jang wă pơhiôk Yŏng bơ̆n Yêsu Krist, ưh kơ sĭ iĕm jang wă pơhiôk kon bơngai đĕch ôh. Tơdrong iĕm jang gô đei sa apah, ưh kơ sĭ iĕm jang hoh hoh đĕch ôh. Iĕm jang tơdrong Yŏng bơ̆n Yêsu Krist na Sư gô ăn kơ iĕm dôm tơdrong hiôk ‘lơ̆ng mă Sư wă ăn kơ dôm lu kon ‘Bok Kei-Dei.” (Kôlôssê 3:23-24)
Nơ̆r jet tơchĕng pơwao:
– ‘Bok Pêtrôs bơtho lu bơngai đĭch đam awih awăn kơ yŏng tơ’ngla thoi yơ?
– Yua kơ kiơ lu đĭch đam kư̆m dai athei chu yŏng tơ’ngla mă khan pơma chrih hil kơ sư?
– Lu bơ̆n pơhrăm iŏk ‘bai pơhrăm ‘nâu thoi yơ lăm chăl arih dang ei?
‘Bok Pêtrôs bơtho lu bơngai lui mă oei pơm đĭch, “Ơ lu bơngai đĭch đe, iĕm kŭm athei chu yom kơ yŏng tơ’ngla iĕm mơ̆n hŏ…” (trong 18a). Jơhnơr lu bơngai lui blŭng a, đei lơ bơngai pơm đĭch lui kơ Kră Yang. Bơngai đĭch đam, bơngai pơm đĭch ưh kơ sĭ chu yom yŏng tơ’ngla dim dah bơngai gơh găt mălei sư bơngai khĕnh hơwĕng ‘nĕ kơ pơkăl kơ sư (trong 18b). Yua kơ “Bơ̆n ưh kơ đei pơm kơnê̆ kơ sư, mă sư pơm kơnê̆ kơ bơ̆n, bơ̆n athei thĕng đĕch yua kơ bơ̆n băt tơdrong ‘Bok Kei-Dei boih, thoi noh na ‘Bok Kei-Dei lăp đon kơ bơ̆n.” (trong 19). Lu bơngai lui ‘noh bơih băt kơnăl Kră Yang, gơnang kơ Kră Yan pơgơ̆r, thoi noh na lu ‘nhŏng oh yua kơ hli yom kơ Kră Yang na chu pŭ pơmat, gleh glăn, đe pơm kơnê̆. Sư khan ‘noh bơih tơdrong pŭn đơ̆ng lăm tơdrong arih lu sư, băt mă đơ̆ng tơdrong âu na gơh chông anhăk yŏng tơ’ngla lui kơ Kră Yang, hloh kơ ‘noh dơ̆ng, mălei tơdah pơm kơnê̆ kơ sư adrol na sư tôn teh bơ̆n, lei trŏ thoi noh tơpă, ưh kơ đei bu khan bơ̆n bơngai ‘lơ̆ng dơ̆ng, mălei dah bơ̆n kư̆ kơ pơm ‘lơ̆ng, arih tơpăt, jang đĭ jơhngơ̆m na sư oei tôn teh bơ̆n đĕch pơmat yua kơ Kră Yang lei noh bơih pŭn kơ lu bơngai pơm đĭch noh ‘Bok Kei-Dei lăp đon (trong 20). Kră Yang Yêsu bơtho: “Pŭn dêh lu bơngai mă đe pơmat sư yua kơ sư pơm ‘lơ̆ng thoi ‘Bok Kei-Dei wă, bơngai noh ‘Bok Kei-Dei gô pơgơ̆r sư ling lang.” (Mathiơ 5:10).
Dang ei, ưh pă đei tơdrong jang pơm đĭch, mălei lu bơ̆n jing bơngai chă jang kơ đe chŭn mir, jang lăm anih tih.v.v… wă khan lăng thoi “đĭch đam” jang kơ yŏng tơ’ngla. Kơlih kơ thoi noh, na ‘bok Pêtrôs bơtho noh đei yua iŏk kơ lu bơ̆n. Arih lăm teh đak ‘bĕnh tơdrong kơnê̆, phŏ bơ̆n đei tơ’bơ̆p yŏng ‘ngla ‘bônh kơ blĕk, khĕnh hơwĕng, ưh kơ tơpăt. Phŏ lăp bơ̆n ‘maih chă ‘lơ̆ng wă pơma kơnê̆, dah pơm plơ̆ hăm tơdrong jang bơ̆n pơm đon, jang ưh kơ đĭ jơhngơ̆m na đe areh, mălei nơ̆r Kră Yang bơtho bơngai lui gah tơdrong jang “Mă tôm tơdrong jang, iĕm athei jang mă tơpă, jang hăm đĭ jơhngơ̆m, ‘nĕ kơ pơm đon, yua kơ iĕm jang wă pơhiôk Yŏng bơ̆n Yêsu Krist, ưh kơ sĭ iĕm jang wă pơhiôk kon bơngai đĕch ôh.” (Kôlôssê 3:23). Kơplah bơ̆n apinh pơdơh tơdrong jang đĕch dah mă tơplih tơ anih nai, dah mă oei bơ̆jang lei bơ̆n jang yua kơ Kră Yang, bơ̆n athei jang đĭ jơhngơ̆m kiơ̆ thoi nơ̆r Kră Yang bơtho. Bơ̆n jang kư̆m thoi bơ̆n jang kơ Kră Yang, đơ̆ng noh krao apinh Kră Yang ăn kơ yŏng tơ’ngla păng lu ‘nhŏng oh tam mă lui kơ Kră Yang tơ anih lu bơ̆n jang ‘bôh Kră Yang đơ̆ng lăm jơhngơ̆m bơ̆n păng đơ̆ng lăm tơdrong jang lu bơ̆n.
Kơkuh kơ Ih Kră Yang ‘Bă mă ‘mêm kơeng kơ lu nhôn, apinh Ih thim jơhngơ̆m chơt hiôk păng bơ̆jang đĭ jơhngơ̆m lăm chăl arih wă ưang Anăn ‘Bă, wă kơ lu bơngai ‘bôh Ih đơ̆ng lăm jơhngơ̆m inh tơdrong jang inh wă kơ lu sư ‘măn jơ ‘năr năm tơ Ih. Krao khan yua anăn Kră Yang Yêsu Krist, Amen.
Lu bơ̆n oei bơ̆jang thoi bơngai đĭch đam hăm yŏng tơ’ngla tơ ala teh âu thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 7
Kênh Youtube BHKTHN:
