Klei Aê Diê Blŭ: I Y-Pêtrôs 2:18-20
Êlan kliăng: “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh. Kyuadah diih thâo leh diih srăng mă tŭ ngăn dưn mơ̆ng Khua Yang jing klei mưn kơ diih. Diih mă bruă kơ Krist Khua Yang yơh” (Kôlôs 3:23-24)
Klei êmuh ksiêm mĭn: Khua ƀĭng kna Y-Pêtrôs mtă si phung dĭng buăl srăng gưt kơ khua diñu? Ya ngă brei dĭng buăl ăt gưt mơh kơ khua ngă klei khăng kơ gơ̆? Si drei srăng yua klei hriăm anei hlăm klei hdĭp drei hruê anei?
Khua ƀĭng kna Y-Pêtrôs dôk mtô kơ phung hlŭn jing phung đăo leh kơ Yêsu Krist, “Ơ phung dĭng buăl, đup gưt bĕ kơ phung khua diih hŏng klei mpŭ sĭt” (êlan 18a). Hlăm ênuk Phung Sang Aê Diê tal êlâo, mâo lu phung hlŭn đăo kơ Khua Yang Yêsu, phung dĭng buăl, phung hlŭn đup gưt amâo djŏ knŏng kơ phung khua jăk leh anăn êmhač ôh, ƀiădah dôk sĭt suôr leh anăn gĭr wăt hŏng khua mâo knuih khăng msĕ mơh (êlan 18b). Kyuadah “jăk jĭn yơh kơ pô thâo klei Aê Diê čiăng, tơdah ñu tŭ klei knap mñai amâo djŏ kyua klei soh ñu ngă ôh” (êlan 19). Phung đăo kơ Krist jing phung thâo kral leh Khua Yang, đăo kjăp kơ klei Khua Yang kiă kriê, kyua klei huĭ mpŭ kơ Khua Yang snăn phung ayŏng adei srăng tŭ jih klei ruă, klei knap mñai, klei wê. Ñu lač anăn jing klei jăk jĭn kyuadah mơ̆ng klei dôk dơ̆ng ƀơ̆ng huă anăn, si thâo thâodah digơ̆ dưi atăt phung khua digơ̆ lŏ wĭt kơ Khua Yang. Êgao hĭn kơnăn, tơdah tŭ klei khua čăm kyua ngă klei soh, klei anăn jing klei djŏ, amâo mâo klei čiăng hưn ktưn ôh, ƀiădah tơdah ngă klei jăk, ngă klei kpă ênô, ngă bruă hŏng jih ai tiê ƀiădah ăt tŭ klei arăng ngă jhat, tŭ klei knap mñai kyua Khua Yang anăn jing sa klei jăk jĭn ti anăp Aê Diê kơ phung hlŭn đăo leh kơ Yêsu Krist (êlan 20). “Jăk mơak yơh phung arăng ngă jhat kyua diñu tui klei kpă ênô, kyuadah ƀuôn ala mtao adiê pioh kơ diñu” (Y-Mathiơ 5:10).
Hruê anei, amâo lŏ mâo klei mjing hlŭn ôh, ƀiădah năng ai grăp čô drei jing sa čô mnuih mă bruă mưn, sa čô mnuih mă bruă, sa čô khua gĭt gai hlăm bruă…, dưi yap jing msĕ si sa čô “dĭng buăl” mă bruă kơ khua mơh. Kyuanăn, klei Khua ƀĭng kna Y-Pêtrôs mtô ăt yua wăt kơ drei mơh. Ti krah lăn ala bŏ hŏng klei wê, mâo blư̆ drei ăt srăng tuôm mơh hŏng sa čô khua mâo knuih khăng, srăng bi dleh leh anăn ngă klei amâo mâo mtăp mđơr ôh. Tăp năng drei duah klei mtăp mđơr hŏng klei phĭ, amâodah rŭ ênua hŏng klei mdei bruă, amâo ngă hŏng jih ai tiê ôh čiăng bi hrăp ai ngêñ,… Ƀiădah Klei Aê Diê Blŭ mtă kơ phung đăo kơ Krist jing sa čô mnuih mă bruă mưn snei, “Ya mta bruă diih ngă, ngă bĕ hŏng jih ai tiê, msĕ si mă bruă kơ Khua Yang, amâo djŏ kơ mnuih ôh” (Kôlôs 3:23). Knŏng tơdah drei akâo mdei bruă amâodah akâo nao kơ anôk mkăn, ƀiădah bi tơdah drei ăt adôk mă bruă snăn kyua Khua Yang, brei drei mă bruă hŏng jih ai tiê msĕ si Klei Khua Yang Blŭ mtă leh. Mă bruă kơ khua ăt jing mă bruă kơ Khua Yang mơh, hŏng klei anăn akâo Khua Yang đru khua leh anăn phung ayŏng amai adei ka đăo ôh hlăm anôk drei mă bruă srăng ƀuh Khua Yang hlăm knuih leh anăn klei drei mă bruă.
Si ngă drei dôk ngă klei bhiăn kơ sa čô dĭng buăl hŏng khua ti lăn ala anei?
Wah lač: Ơ Khua Yang Ama kâo khăp ơi, akâo Ama bi ktang kâo čiăng kơ kâo mơak nanao leh anăn mă bruă hŏng jih ai tiê hlăm djăp mta klei truh čiăng kơ Anăn Ama mâo klei mpŭ mni. Akâo Khua Yang đru jih jang mnuih ƀuh Khua Yang hlăm knuih kâo mă bruă čiăng kơ digơ̆ mâo mmông găl hriê kơ Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
