I Petus 2:18-20
Nqe cim:
“Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg. Yexus Khetos yog nej tus Tswv, nej yog nws cov tubtxib. Yog li ntawd, nej yuav tsum nco ntsoov hais tias nej yeej yuav tau tej nqi zog uas Vajtswv khaws cia rau Vajtswv haivneeg lawm” (Kaulauxais 3:23-24)
Lus nug rau sawvdaws xav:
– Timthawj Petus ntuas cov tubqhe yuav tsum tu tus tswv zoo li cas?
– Vim li cas cov qhev kuj yuav tsum tau mloog cov tswv uas ua tsis ncaj rau yus?
– Peb siv cov lus qhia no li cas nyob rau lub tsamthawj tamsim no?
Timthawj Petus tabtom qhia rau cov qhev uas ntseeg Yexus, “Nej cov uas yog tubqhe, nej yuav tsum mloog nej tus tswv lus thiab hwm nws…” (nqe 18a). Nyob rau lub sijhawm Pawg Ntseeg xubthawj, muaj ntau tus neeg ua qhev los ntseeg Yexus. Tus uas yog tubtxib, yog qhev tsis yog mloog cov tswv zoo lus xwb, kuj yuav tsum ncaj ncees thiab ua siab ntev rau tus tswv uas coj tsis zoo thiab (nqe 18b). Vim chiv “nej paub hais tias Vajtswv yeej xav kom nej ua li ntawd, Vajtswv yuav foom koob hmoov rau nej” (nqe 19). Cov ntseeg Yexus yog cov uas paub tus Tswv, ntseeg ruaj Vajtswv lub hwjchim tswj kav, vim lub siab hwm tus Tswv txaus siab tiv txhua yam kev mob, txomnyem, ua tsis ncaj. Petus hais tias qhov no yog koob hmoov vim los ntawm kev ua neej, cov ntseeg ua qhev yuav coj tau tus tswv los cuag Vajtswv. Dua li ntawd, yog ua qhov yuam ces yuav raug nplawm, nov yeej yog kev yog cai, tsis muaj dabtsi khav tau, tiamsis yog ua zoo, ua ncaj ncees, ua haujlwm tas siab los tseem raug saib tsis taus vim tus Tswv; ces kuj yog ib qhov koob hmoov rau cov qhev uas yog cov ntseeg Yexus tabmeeg Vajtswv (nqe 20). Tswv Yexus qhia: “Cov uas raug luag tsimtxom vim lawv ua raws li Vajtswv lub siab nyiam, cov ntawd tau koob hmoov; rau qhov Ntuj Ceebtsheej yog lawv tug” (Mathais 5:10).
Nimno, tsis muaj txoj cai ua qhev lawm tiamsis peb txhua tus yog ib tug tub zog, tub ua haujlwm… hais tau tias yog “tubqhe” ua haujlwm rau ib tu tswv. Yog li ntawd, Timthawj Petus cov lus qhia kuj yog qhia peb. Nyob rau lub ntiajteb uas tsis ncaj ncees, muaj qee zaus peb kuj ntsib tej tus tswv coj nyuaj, ua tsis ncaj, tsis zoo. Muaj ntau zaus peb xav nrhiav txojkev ncaj ncees los ntawm tej lus hais mob, lossis ua pauj los ntawm qhov uas ua haujlwm tsis tas siab,… Tiamsis Vajtswv Txojlus qhia rau cov ntseeg paub tias thaum mus ua zog, “Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg” (Kaulauxais 3:23). Tshwj qhov uas peb thov so haujlwm lossis thov hloov chaw ua haujlwm xwb, yog tias peb tseem nyob ua haujlwm ces yuav tsum ua vim tus Tswv, peb ua haujlwm tas siab li tus Tswv qhia. Ua haujlwm rau tus tswv uas kav peb kuj yog ua Vajtswv haujlwm, dhau ntawd, thov Vajtswv pab kom tus tswv thiab cov phoojywg nrog peb ua haujlwm tsis tau ntseeg pom tus Tswv dhau los ntawm peb tus cwjpwm thiab kev ua haujlwm.
Thov Vajtswv,
Tus Tswv uas yog nyuam yaus Leej Txiv. Thov Koj ntxiv zog kom nyuam yaus muaj kev zoo siab thiab ua haujlwm tas siab rau txhua lub tsamthawj, ua rau Vajtswv lub npe tau qhuas. Thov kom txhua tus pom tus Tswv los ntawm nyuam yaus tus cwjpwm ua haujlwm, lawv tig los cuag tus Tswv. Nyuam yaus tuav Tswv Yexus lub npe thov, Amees.
Peb tabtom ua feem xyuam ntawm tus tubqhe rau tus tswv tamsim no zoo li cas?
Nyeem Vajluskub hauv peb lub xyoo: Tes Haujlwm 7
Kênh Youtube BHKTHN:
