Mathiơ 24:6-8
“Đei dêh âu iung blah dêh to, dêh to iung blah dêh nai. Đei teh adrŏ păng tơdrong pơngot rơwĕt lơ tơring âu tơring to.” (Mathiơ 24:7)
Nơ̆r jet tơchĕng pơwao:
– Kră Yang Yêsu pơtrơp pơma ‘bơm dôm tơdrong kiơ gô truh lăm jơhnơr mă hơtuch?
– Dôm tơdrong tơdra noh tơbăt kiơ gah tơdrong ‘Bok Kei-Dei đei hơmet?
– Bơ̆n đei tơ’blŏk kiơ đơ̆ng hla bơar nơ̆r ‘Bok Kei-Dei ‘nâu?
Kră Yang Yêsu oei tơl nơ̆r lu bơngai pơhrăm păng Sư jet gah dôm tơdrong tơdra ayơ “pơma gah tơdrong Kră Yang wă jur dơ̆ng păng năr tôch”. Blŭng a jơ̆ bơngai bơtho hơlĕnh (Mathiơ 24-3-5). Tơdra pơtrơp dơ̆ng noh jơ̆ “păng iĕm kơtơ̆ng đe tơblah mă jê̆ mă ataih” (trong 6a). nơ̆r “kơtơ̆ng” wă pơma gah dôm tơdrong tơblah băl, gô kơtơ̆ng dôm tơdrong tơblah tih wă truh pơm kơ lơ bơngai tơchĕng, ưh kơ hơđơ̆ng păng hli tơrơ. Kră Yang Yêsu khan kơ lu bơngai pơhrăm păng Sư: “Tơdrong ‘noh ưh kơ jor ôh, gô đei ‘mơ̆i mălei năr tôch ưh tam mă truh ôh kơplah noh” (trong 6b). Kră Yang wă kơ lu sư athei ling lang pơ’lơ̆ng kơchăng akâu kơdih, ‘nĕ kơ hli tơrơ mưh ‘bôh dôm tơdrong truh noh, yua kơ mưh ‘bôh tơdrong tơblah rai đunh rai dêh, lu sư băt kơ noh bơih tơdrong sĭt tơpă mă Kră Yang đei khan lê̆ adrol bơih kiơ̆ thoi sư đei tơdă hơmet, mălei ‘noh ưh tam mă năr tôch ôh.
‘Nguaih kơ tơdrong pơrăm đơ̆ng tơblah wang jơ̆p jang jơ hnơr hơtuch kư̆m ‘bôh dôm tơdrong pơngot rơwĕt păng teh adrŏ. Lăm teh đak dang ei đei ‘bôh dôm tơdrong pơngot rơwĕt, jĭ hơbuh hăm lơ tơdrong truh nai hai dơ̆ng, mălei lăm năr tôch, gô ‘bôh tơdrong truh lăm teh đak tih krưp hloh, jơ̆p jang anih. Kră Yang Yêsu kư̆m khan kơ lu bơngai pơhrăm păng Sư băt: “Mălei kơplah noh tơdrong gleh truh ‘nao wă pơtơm đĕch” (trong 8).
Lăm chăl dang ei, lu bơ̆n kư̆m hơnơ̆ng kơtơ̆ng roi tơdrong tơblah wang jơ̆p jang teh đak, teh đak âu iung blah teh đak to. Teh đak to iung blah teh đak nai, lu bơ̆n kư̆m kơtơ̆ng ang đei tơdrong tơblah jơ̆p jang.v.v… đơ̆ng noh đei lơ tơdrong truh, jĭ hơbuh, phang ang, pơngot rơwĕt, teh adrŏ rai đunh rai đei hơnơ̆ng păng krưp hloh dơ̆ng. Lu bơ̆n băt Kră Yang ‘Bok Kei-Dei oei bơ̆jang păng dôm tơdrong âu gô truh. Athei kơchăng mă tơpă, ‘nĕ kơ yua kơ đơ̆ng tơdrong hiơ̆k bơngơ̆t, hli tơrơ na pơm kơ bơ̆n tơhĕng ưh kơ hơmĕng dah mă tơchĕng ưh kơ trŏ. Bơ̆n kăl kơ ‘blŏk nơ̆r ‘Bok Kei-Dei khan: “Mălei kơplah noh tơdrog gleh truh ‘nao wă pơtơm đĕch”, ưh tam mă năr tôch ôh, Kră Yang Yêsu đei khan kơ lu bơngai pơhrăm păng Sư khan: “Na dang ei iĕm athei chơ̆n jơhngơ̆m iĕm ‘nĕ kơ hli tơdrong kiơ, iĕm athei lui kơ ‘Bok Kei-Dei păng lui kơ Inh” (Yôhan 14:1). Apinh Kră Yang ăn kơ bơ̆n hơđơ̆ng lăm tôm tơdrong păng oei lui gơnang kơ Kră Yang yua kơ bơ̆n băt tơpă Kră Yang gô jur dơ̆ng wă iŏk lu bơngai lui kơ Sư, păng Kră Yang ưh kơ ăn tơdrong pơlong truh kơ bơ̆n hloh kơ jơhngơ̆m bơ̆n kĕ ôh.
Ơ Kră Yang, mơsêh mơyang gơh pơm tôm tơdrong. Apinh Ih tơgŭm inh oei hơđơ̆ng dơ̆ng kơjăp lăm tôm tơdrong, mă đơ̆ng tơ’bơ̆p dôm tơdrong truh lăm năr hơtuch, mălei inh lui ngeh Kră Yang oei wei rong păng bơwei kon pơlei Kră Yang păng Khul Bơngai Lui kơ Sư. Krao khan yua anăn Kră Yang Yêsu Krist, Amen.
Bơ̆n hăm oei hơđơ̆ng kơplah đei tơdrong rŭng răng păng tơdrong truh lăm teh đak âu ưh? Yua kơ kiơ?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 27
Kênh Youtube BHKTHN:
