Klei Aê Diê Blŭ: Y-Mathiơ 24:6-8
Êlan kliăng: “Kyuadah sa phung găp djuê mnuih srăng bi kdơ̆ng hŏng sa phung găp djuê mnuih mkăn, leh anăn sa boh ƀuôn ala mtao srăng bi kdơ̆ng hŏng sa boh ƀuôn ala mtao mkăn, leh anăn srăng mâo klei ư̆ êpa leh anăn klei yơ̆ng lăn ala hlăm lu bĭt anôk. ” (Y-Mathiơ 24:7)
Klei êmuh ksiêm mĭn: Ya klei Khua Yang Yêsu lŏ dơ̆ng lač kơ klei srăng truh hlăm ênuk knhal tuč? Dŭm klei bi knăl anăn brei thâo ya klei kơ hdră kčah Aê Diê? Ya klei mñă kơ drei mơ̆ng trăn Klei Aê Diê Blŭ anei?
Khua Yang Yêsu dôk wĭt lač klei êmuh kơ ƀĭng kna kơ ya klei bi knăl “kơ hruê knhal tuč ênuk”. Tal êlâo jing khua pô hưn êlâo soh (Y-Mathiơ 24:3-5). Klei bi knăl leh anăn jing “Diih srăng hmư̆ ênai klei bi blah giăm leh anăn hmư̆ hing kơ klei bi blah kbưi” (êlan 6a). Boh blŭ “hmư̆” lač kơ klei hmư̆ nanao kơ klei bi blah, srăng hmư̆ klei hưn kơ klei bi blah prŏng dơ̆ng truh ngă kơ lu mnuih rŭng răng, luč klei êđăp ênang leh anăn huĭ hyưt. Khua Yang Yêsu bi juh phung ƀĭng kna: “Đăm diih rŭng răng ôh, kyuadah jih klei anăn srăng truh, ƀiădah ka truh knhal tuč ôh” (êlan 6b). Khua Yang čiăng kơ diñu thâo răng nanao pô, đăm brei klei rŭng răng anăn ngă kơ diñu huĭ hyưt ôh, ƀiădah tơdah ƀuh klei bi blah ƀrư̆ hruê ƀrư̆ đĭ leh anăn kjham, diñu thâo anăn jing klei bi knăl brei ƀuh hdră kčah Khua Yang dôk truh hlue si klei Ñu čiăng, ƀiădah anăn ka jing klei knhal tuč ôh.
Êngao kơ klei bi rai kyua klei bi blah hlăm djăp anôk, ênuk knhal tuč ăt ƀuh klei ư̆ êpa prŏng leh anăn mgei lăn. Lăn ala ƀuh leh lu gưl klei mgei lăn ala, klei ư̆ êpa, klei ruă tưp hŏng klei truh kjham, ƀiădah hlăm hruê knhal tuč, klei yan adiê ngă srăng truh hŏng hnơ̆ng prŏng năng bi kngăr hĭn, lu anôk hĭn. Khua Yang Yêsu ăt brei phung ƀĭng kna thâo, “Jih jang klei anăn jing knŏng klei mphŭn dơ̆ng kơ klei ruă kkiêng” (êlan 8).
Hlăm wưng ară anei, drei ăt hmư̆ nanao klei hâo hưn kơ klei bi blah tar lăn ala, jih djuê ana anei bi kdơ̆ng hŏng djuê ana mkăn, jih êpul mnuih ƀuôn sang anei bi kdơ̆ng hŏng êpul ƀuôn sang adih, drei hmư̆ klei hưn kơ klei bi blah prŏng … Êngao anăn klei yan adiê ngă, klei ruă tưp, ư̆ êpa, mgei lăn ƀrư̆ hruê mâo nanao leh anăn kjham hĭn. Drei thâo Aê Diê dôk ngă hdră kčah Ñu leh anăn klei anei srăng truh. Brei răng pô bi jăk đăm brei klei rŭng răng, huĭ hyưt ngă kơ drei mâo klei mĭn luč klei čang hmăng amâodah amâo jăk. Brei drei hdơr “Jih jang klei anăn jing knŏng klei mphŭn dơ̆ng kơ klei ruă kkiêng”, ka jing klei knhal tuč ôh. Khua Yang Yêsu bi juh phung ƀĭng kna snei “Đăm brei ai tiê diih rŭng răng ôh; đăo bĕ kơ Aê Diê, leh anăn đăo kơ kâo msĕ mơh” (Y-Yôhan 14:1). Akâo kơ Khua Yang đru drei dôk êđăp ênang hlăm djăp boh klei leh anăn jao klei đăo pô hlăm Khua Yang kyua thâo, klă sĭt Khua Yang srăng lŏ hriê čiăng drông Phung Sang Aê Diê Ñu, leh anăn Khua Yang amâo brei drei tŭ klei lông dlăng êgao ai ktang drei ôh.
Drei dôk êđăp ênang ti anăp klei rŭng răng leh anăn yan adiê ngă dôk truh ti lăn ala mơ̆? Ya ngă?
Wah lač: Ơ Khua Yang bŏ hŏng klei myang, akâo kơ Ih đru kâo dôk êđăp ênang nanao hlăm djăp boh klei, wăt tơdah tlă anăp hŏng klei rŭng răng hlăm hruê knhal tuč, ƀiădah kâo đăo Khua Yang ăt kriê dlăng leh anăn răng mgang phung ƀuôn sang Ih leh anăn Phung Sang Aê Diê Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
