Mathais 6:7-15
Nqe cim:
“Thov koj zam txim rau peb ib yam li peb twb zam txim rau cov uas ua txhaum rau peb lawm” (Mathais 6:12)
Lus nug rau sawvdaws xav:
– Vajtswv taij tej yam uas yuavtsum muaj twg thaum thov Vajtswv zam txim?
– Vim li cas yuavtsum zam txim rau lwm tus ua ntej thov Vajtswv zam txim rau yus?
– Peb cheemtsum ua li cas kom tau Vajtswv teb peb tej lus thov Vajtswv zam txim?
Hauv zaj lus thov Vajtswv, Tswv Yexus qhia: “Thov koj zam txim rau peb ib yam li peb twb zam txim rau cov uas ua txhaum rau peb lawm.” (nqe 12). Lo lus txhais “txim” raws li hnub thaud yog “tshuav nqis”. Txim yog tshuav Vajtswv nqis. Thaum los ntseeg Tswv Yexus peb tau Vajtswv zam txim. Tiamsis hauv lub neej txhua hnub, peb yeej zam tsis dhau tej kev txhaum tshuav nqis rau Vajtswv vim peb tseem ua neej hauv sab nqaij tawv. Vim li ntawd thov Vajtswv zam txim yog yam uas cheemtsum. Tiamsis hauv zaj lus thov Vajtswv Tswv Yexus qhia, yam uas yuav tsum muaj thaum thov Vajtswv, ntawd yog zam txim rau lwm tus ua ntej uas yuav thov Vajtswv zam txim rau yus. Nqe 14 Tswv Yexus qhia meej, “Yog nej zam txim rau tus uas ua txhaum rau nej lawm, nej Leej Txiv tus uas nyob saum ntuj ceebtsheej thiaj yuav zam txim rau nej”. Hais rau lwm seem, yog peb thov Vajtswv zam txim rau peb ces yuav tsum zam txim rau lwm tus ua ntej. Yog peb tsis zam txim rau tus uas ua txhaum rau yus ces Vajtswv yuav tsis teb peb tej lus thov “Thov koj zam txim rau peb”.
Thaum Tswv Yexus hais zaj xwm hauv Mathais 18:23-35, Nws hais txog ob lolus muaj tseeb: Tim ib, lub txim uas peb tshuav Vajtswv nqis mas loj thiab ntau heev dua tus uas tshuav peb nqis. Tim ob, yog Vajtswv twb hlub tshua thiab zam peb lub txim loj heev lawm, yog vim li cas peb ho tsis hlub tshua thiab zam lub txim me me ntawm yus tus kwv tij? Tsis ncaj ncees! Vim li ntawd thaum peb zeem paub hais tias yus tau ua txhaum rau Vajtswv thiab thov Vajtswv zam txim ces cia li nco thiab zam txim rau yus kwv tij uas tau ua txhaum rau yus, tsis ua li ntawd Vajtswv txoj kev hlub tshua yuav tsis muaj puv npo rau peb thiab Nws yuav tsis zam txim rau peb li Vajtswv Txojlus qhia: “Thaum nej sawv ntsug thov Vajtswv, nej yuav tsum zam txim rau tus uas tau ua txhaum rau nej lawm. Yog nej ua li ntawd nej Leej Txiv tus uas nyob saum ntuj ceebtsheej thiaj yuav zam nej lub txim. “Yog nej tsis zam txim rau lwm tus, nej Leej Txiv tus uas nyob saum ntuj ceebtsheej yuav tsis zam txim rau nej thiab.” (Malakaus 11:25-26).
Muaj qhov tshwjxeeb yog Vajtswv yuav tsis cim ntsoov tej kev txhaum uas Nws twb zam txim lawm: “Kuv yog Vajtswv tus uas zam txim rau nej; kuv ua li no, vim kuv yog tus zoo, thiab kuv yuav tsis cim ntsoov nej tej kev txhaum cia.” (Yaxayas 43:25); Tiamsis peb ho pheej cim nco qhov uas lwm tus ua yuam kev ua rau peb mob! Cia li zam txim thiab hlub tshua ces thiaj li yuav tsis nco luag kev txhaum! Cia li tso tseg qhov uas yuav taij kom tau ntawm tus ua txhaum rau yus, tej thaum yog nyiaj txiag, kev tau ntsejmuag, kev ncaj ncees lossis kev ua pauj. Vajtswv xav kom peb zam txim huv tibsi txhua yam ntawd ua ntej thov Vajtswv zam txim rau yus.
Thov Vajtswv,
Leej Txiv tus muaj kev hlub, ua Koj tsaug uas tau zam nyuam yaus lub txim uas loj heev lawm. Thov pab nyuam yaus paub zam txim rau lwm tus thiab hlub lawv kom nyuam yaus thiaj tau txais Vajtswv kev zam txim hauv lub neej txhua hnub. Nyuam yaus tuav Tswv Yexus Khetos lub npe thov, Amees.
Peb puas npaj siab zam txim rau peb cov kwv tij uas ua yuam kev rau peb?
Nyeem Vajluskub hauv peb lub xyoos: 2 Vajntxwv 25
Kênh Youtube BHKTHN:
