Klei Aê Diê Blŭ: Y-Mathiơ 6:7-15
Êlan kliăng: “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh” (Y-Mathiơ 6:12)
Klei êmuh ksiêm mĭn: Ya klei Khua Yang čoh cuăn tơdah drei wah lač akâo kơ Khua Yang pap brei klei soh? Ya ngă brei pap brei kơ mnuih mkăn êlâo kơ akâo kơ Khua Yang pap brei klei soh kơ pô? Ya klei brei drei ngă hĕ čiăng kơ klei akâo pap brei klei soh Khua Yang srăng hmư̆?
Hlăm klei wah lač jih jang, Khua Yang Yêsu mtô: “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh” (êlan 12). Boh blŭ mblang “klei soh” hlăm klei blŭ phŭn jing “đuôm nư”. Klei soh jing klei đuôm nư Aê Diê. Hlăk drei đăo kơ Khua Yang Yêsu, Khua Yang pap brei kơ klei soh drei. Biădah lĕ hlăm klei hdĭp grăp hruê, drei amâo tlaih ôh tăp năng ngă soh hŏng Khua Yang kyuadah ăt adôk hdĭp hlăm kđeh. Ƀiădah lĕ hlăm klei wah lač jih jang Khua Yang mtô, Ñu brei sa klei čoh čuăn, anăn jing brei pap brei kơ mnuih mkăn êlâo kơ čiăng Khua Yang pap brei kơ pô. Êlan 14 Khua Yang ktrâo klă, “Kyuadah tơdah diih pap brei kơ klei soh arăng, Ama diih hlăm adiê srăng pap brei mơh kơ diih”. Blŭ mdê, tơdah drei wah lač akâo kơ Khua Yang pap brei klei soh, snăn brei drei pap brei kơ mnuih mkăn êlâo. Tơdah drei amâo pap brei ôh kơ pô mâo klei soh hŏng drei snăn Khua Yang amâo srăng hmư̆ ôh klei drei wah lač “Pap brei kơ klei soh hmei”.
Tơdah Khua Yang Yêsu yăl dliê kơ klei čih hlăm Y-Mathiơ 18:23-35, Ñu kñăm kơ dua mta klei sĭt nik: Tal sa, klei soh drei đuôm nư hŏng Khua Yang jing prŏng hĭn lu blư̆ snăk mkă hŏng klei soh mnuih mkăn mâo hŏng drei. Tal dua, tơdah Khua Yang pap brei leh kơ klei soh drei prŏng snăk, snăn si ngă drei amâo dưi pap brei ôh kơ klei soh điêt ayŏng amai adei drei pô? Amâo mtăp mđơr ôh êdi! Kyuanăn tơdah drei thâo kral drei ngă soh hŏng Khua Yang leh anăn myơr klei wah lač akâo kơ Khua Yang pap brei, snăn hdơr bĕ brei drei pap brei mơh kơ ayŏng adei ngă soh hŏng drei, tơdah amâo ngă klei anăn, snăn klei pap Khua Yang amâo srăng tuh dlai brei kơ drei ôh leh anăn Ñu amâo srăng pap brei kơ drei ôh, msĕ si Klei Blŭ Khua Yang mtô: “Leh anăn tơdah diih dôk dơ̆ng wah lač, tơdah diih mâo klei hŏng arăng, pap brei bĕ, čiăng kơ Ama diih, Pô dôk hlăm adiê, dưi pap brei klei soh diih msĕ mơh” (Y-Markôs 11:25-26).
Mâo sa mta klei bi knăl yuôm bhăn, anăn jing Khua Yang srăng wơr bĭt jih klei soh Ñu pap brei leh: “Kâo, Kâo yơh jing Pô lăm hĕ klei diih gao klei bhiăn kyua anăn Kâo pô, leh anăn Kâo amâo srăng lŏ hdơr kơ klei soh diih ôh.” (Y-Êsai 43:25); bi drei lĕ khăng hdơr djă pioh klei soh mnuih ngă bi ruă êka ai tiê drei! Pap brei leh anăn khăp bĕ snăn kơh dưi wơr! Phưi mtlaih bĕ kngan drei mơ̆ng jih jang mta klei drei čoh čuăn hŏng phung ngă kơ drei, năng ai anăn jing prăk kăk, knuih kơhưm, klei mtăp mđơr amâodah klei čiăng rŭ ênua. Khua Yang čiăng kơ drei pap brei jih, êlâo kơ drei akâo Khua Yang pap brei kơ drei pô.
Si ngă drei kăp pap brei mơ̆ kơ klei soh ayŏng adei drei pô?
Wah lač: Ơ Ama kâo khăp, bi mni lač jăk kơ Ama pap brei leh kơ klei soh kâo prŏng snăk. Akâo kơ Khua Yang brei kâo thâo kăp pap brei leh anăn khăp kơ mnuih mkăn, čiăng kơ kâo dưi mă tŭ klei Khua Yang pap brei kơ kâo grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
