Kaulauxais 4:2-4
Nqe cim:
“Thaum nej thov Vajtswv, nej yuav tsum thov Nws qhib kev rau peb qhia Txojmoo Zoo uas hais txog Yexus Khetos zaj uas yav tas los tsis muaj neeg paub. Twb yog vim kuv qhia zaj ntawd kuv thiaj raug kaw rau hauv tsev lojcuj no. Thiab nej yuav tsum thov Vajtswv pub tswvyim rau kuv kom kuv txawj qhia tej uas tsimnyog kuv yuav tsum qhia, sawvdaws thiaj yuav totaub zoo.”
(Kaulauxais 4:3-4)
Lus nug rau sawvdaws xav:
– Timthawj Paulus hais txog peb yam dabtsi cheemtsum rau kev thov Vajtswv?
– Nyob rau lub sijhawm raug sim siab, txomnyem, Paulus hais kom Pawg Ntseeg thov Vajtswv pab dabtsi?
– Peb muaj lub siab thov Vajtswv, ib leeg thov Vajtswv rau ib leeg zoo li cas?
Timthawj Paulus sau tsab ntawv no mus rau Pawg Ntseeg Kaulauxais thaum uas nws tabtom raug kaw hauv tsev lojcuj vim qhia Yexus Khetos Txojmoo Zoo. Thaum hnov qee yam zoo hais txog Pawg Ntseeg, Paulus thov Vajtswv pab rau lawv tsis tseg tsis tu li. Paulus txhawb zog, qhia thiab ceebtoom rau Vajtswv haivneeg nyob hauv Kaulauxais ntsig txog tej kev sim siab uas lawv raug ntawm cov xibhwb cuav thiab cov ntseeg uas coj cov Yudais txoj kevcai. Nyob hauv tshooj kawg ntawm tsab ntawv, Timthawj Paulus muab cov lw ua neej los qhia rau cov ntseeg, tshwjxeeb yog hais kom lawv yuav tsum “sawv khov kho, ceevfaj thiab ua Vajtswv tsaug thaum thov Vajtswv”. Kev thov Vajtswv tas siab, niaj hnub thov, ceevfaj, ua tib zoo thov thiab niaj hnub ua Vajtswv tsaug yuav pab cov ntseeg hla dhau sim siab txhua hnub. Tej kev nkees sab nqaij tawv, lub siab maj, sab ntsujplig qaug zog yog tej yam uas thaiv peb txojkev thov Vajtswv. Hauv kev sim siab, peb pheej ua yuam kev uas yog tsuas paub thov xwb tsis ua Vajtswv tsaug. Raws li Yakaunpaus qhia, kev sim siab kuj yog ib txoj koob hmoov uas tus Tswv ua kom peb loj hlob sab ntsujplig thiab: “Tus uas ua siab ntev nyiaj tej kev nyuaj siab, tus ntawd yuav tau nyob kaj siab lug. Rau qhov thaum nws tiv dhau tej kev sim siab ntawd lawm, nws yuav tau txojsia uas Vajtswv coglus tseg lawm hais tias Vajtswv yuav muab rau tus uas hlub Vajtswv.” (Yakaunpaus 1:12).
Tsis yog Pawg Ntseeg Kaulauxais raug kev sim siab tiamsis Timthawj Paulus kuj raug sim siab thiab. Paulus sau tsab ntawv no thaum nws tabtom raug kaw hauv tsev lojcuj vim tus Tswv lub npe. Nyob rau lub tsamthawj kaw hauv tsev lojcuj, qhov uas Paulus ua tsis yog cem, yws tus Tswv tiamsis nws rau siab ntso qhia qhov tseeb ntawm Txojmoo Zoo. Yam uas Paulus cheemtsum thiab thov Pawg Ntseeg Kaulauxais pab yog thov Vajtswv pab rau nws kom nws muaj sijhawm mus qhia Yexus Khetos zaj thiab kom nws txawj qhia tej uas tsimnyog nws yuav tsum qhia (nqe 4). Nyob rau lub tsamthawj raug kaw hauv tsev lojcuj, yam uas Timthawj Paulus cheemtsum tsis yog thov Vajtswv pab kom Paulus dim kev txomnyem tiamsis Paulus thov kom lawv thov Vajtswv pab rau nws nyob rau lub tsamthawj ntawd los nws qhia tau Txojmoo Zoo meej, txaus rau lwm tus.
Peb yeej khiav tsis dhau tej kev nyuaj siab uas los raug peb li (Yakaunpaus 1:2), ua raws li Timthawj Paulus, peb cheemtsum sawv ruaj, ceevfaj thiab thov Vajtswv pab, txawm yog yuav nyob rau lub tsamthawj twg los xijpeem, txhua tus ua taus siab ntev, ntseeg tus Tswv thiab rau siab ntso qhia Txojmoo Zoo.
Thov Vajtswv,
Vajtswv tus muaj kev hlub! Ua tsaug Koj pub muaj Pawg Ntseeg kom muaj kev thov Vajtswv sib pab. Nyob rau lub sijhawm raug sim siab hauv kev ua neej, thov Koj pab kom peb tej menyuam muaj kev rau siab ntso qhia Txojmoo Zoo rau ntau leej. Nyuam yaus tuav Tswv Yexus lub npe thov, Amees.
Peb puas ruaj siab thov Vajtswv thaum raug kev sim siab?
Nyeem Vajluskub hauv peb lub xyoo: Yaxayas 61
Kênh Youtube BHKTHN:
