Klei Aê Diê Blŭ: Kôlôs 4:2-4
Êlan kliăng: “Msĕ mơh wah lač brei wăt kơ hmei đa, akâo kơ Aê Diê pŏk ƀăng bhă kơ hmei dưi mtô klei blŭ, čiăng hưn klei yuôm hgăm Krist, kyua klei anăn arăng krư̆ kâo leh. Wah lač bĕ čiăng kâo dưi bi êdah klei yuôm hgăm anăn hŏng klei klă tui si klei djŏ kơ kâo blŭ.” (Kôlôs 4:3-4)
Klei êmuh ksiêm mĭn: Ya tlâo mta klei khua ƀĭng kna Y‑Pôl mñă brei bi mâo hĕ hlăm klei wah lač? Ti krah klei lông dlăng, ya klei ñu akâo kơ Phung Sang Aê Diê wah lač? Si drei mă yua kơ drei ai mĭn wah lač, wah lač brei kơ hdơ̆ng drei?
Khua ƀĭng kna Y‑Pôl čih hră mơĭt kơ Phung Sang Aê Diê ti ƀuôn Kôlôs hlăk êjai ñu dôk hlăm war mnă kyua klei hiu mtô hưn Klei Mrâo Mrang Jăk Krist. Tơdah hmư̆ đa đa mta klei jăk mơ̆ng Phung Sang Aê Diê, ñu wah lač kơ digơ̆ amâo mdei ôh. Ñu bi mđĭ ai, mtô lač leh anăn hưn êlâo kơ phung anak ƀuôn sang Aê Diê ti ƀuôn Kôlôs brei răng kơ djăp mta klei lông dlăng digơ̆ srăng găn, mơ̆ng phung khua pô mtô soh leh anăn mơ̆ng phung đăo Israel ăt čiăng djă pioh klei hdĭp tui si klei bhiăn. Hlăm kdrêč knhal tuč hră čih mơĭt, khua ƀĭng kna Y‑Pôl bi êdah dŭm mta phŭn klei hdĭp phung đăo kơ Krist, čiăng atăt gai digơ̆ leh anăn boh nik nak mñă kơ digơ̆ brei “dôk gĭr, dôk răng leh anăn bi mni kơ Aê Diê hlăm klei wah lač”. Klei wah lač hŏng jih ai tiê, wah lač jêñ jêñ, dôk răng, klă mngač leh anăn myơr klei bi mni nanao kơ Aê Diê, srăng đru phung anak ƀuôn sang Aê Diê dưi găn klei lông dlăng dôk kăp guôn digơ̆ grăp hruê. Klei êgah êmăn hlăm kđeh asei mlei, klei gun kpăk hlăm ai mĭn, klei awăt êdu hlăm mngăt ai tiê, jing mta klei bi kgăn drei wah lač. Hlăm klei lông dlăng, drei khăng soh čhuai kyuadah knŏng kwưh akâo ƀiădah amâo wah lač bi mni kơ Aê Diê ôh. Êjai anăn, Y‑Yakơ mtô, klei lông dlăng ăt jing sa mta klei pap Khua Yang brei čiăng đru drei đĭ hriê kơ prŏng hlăm klei hdĭp mngăt myang: “Jăk mơak yơh kơ mnuih gĭr tŭ klei lông dlăng, kyuadah tơdah ñu dưi leh, ñu srăng mă tŭ đuôn mtao klei hdĭp Aê Diê ƀuăn leh kơ phung khăp kơ ñu” (Y‑Yakơ 1:12).
Amâo djŏ knŏng hjăn Phung Sang Aê Diê ti Kôlôs ôh tuôm hŏng klei lông dlăng ƀiădah wăt khua ƀĭng kna Y‑Pôl pô ăt dôk găn klei lông dlăng msĕ mơh. Ñu čih hră mơĭt êjai dôk hlăm mnă kyua Anăn Khua Yang. Ti krah anôk arăng krư̆ kđăl dleh knap, bruă ñu ngă amâo djŏ ôh ƀuah ăl, blŭ dŭñ dŭñ kơ Khua Yang, ƀiădah ñu ăt hŏng jih ai tiê hưn bi êdah klei yuôm hgăm Klei Mrâo Mrang Jăk nanao. Mta klei ñu čiăng leh anăn akâo kơ Phung Sang Aê Diê ti Kôlôs đru, anăn jing wah lač brei kơ ñu, čiăng kơ ñu ăt dưi mâo mmông găl hưn mtô klei yuôm hgăm Krist leh anăn “Wah lač bĕ čiăng kâo dưi bi êdah klei yuôm hgăm anăn hŏng klei klă tui si klei djŏ kơ kâo blŭ” (êlan 4). Hlăm anôk arăng krư̆ kđăl, mta klei khua ƀĭng kna Y‑Pôl čiăng, amâo djŏ ôh akâo kơ phung ayŏng adei wah lač brei kơ ñu dưi kbiă mơ̆ng klei lông dlăng, ƀiădah ñu akâo kơ digơ̆ wah lač čiăng kơ ti krah klei boh knap mñai anăn, ñu ăt dưi mâo klei Aê Diê pŏk êlan kơ ñu dưi hưn Klei Mrâo Mrang Jăk djăp ênŭm, klă mngač.
Drei amâo tlaih ôh mơ̆ng lu mta klei lông dlăng srăng truh (Y‑Yakơ 1:2), tui hlue klei bi hmô mơ̆ng khua ƀĭng kna Y‑Pôl, brei drei dôk gĭr, dôk răng wah lač leh anăn wah lač brei, čiăng kơ wăt tơdah êjai dôk hlăm ya klei boh truh dưn, grăp čô drei ăt dôk gĭr, đăo kjăp kơ Khua Yang leh anăn hŏng jih ai tiê hưn Klei Mrâo Mrang Jăk.
Si ngă drei dôk gĭr wah lač hlăm klei lông dlăng dleh dlan mơ̆?
Wah lač: Ơ Ama kâo khăp! Bi mni kơ Ama brei leh kơ hmei mâo Phung Sang Aê Diê pioh hrăm mbĭt wah lač, wah lač brei kơ hdơ̆ng hmei. Ti krah klei lông dlăng dleh dlan hlăm klei hdĭp, brei kơ hmei ăt hŏng jih ai tiê hưn Klei Mrâo Mrang Jăk nanao kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Êsai 61
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
