Daniyees 9:4-19
Nqe cim:
“Peb Leej Txiv tus uas nyob saum ntuj ceebtsheej; thov kom sawvdaws hwm koj lub npe; Thov koj los kav neeg lub siab; thov koj pab kom peb ua tau raws li koj lub siab nyiam yam li cov uas nyob saum ntuj” (Mathais 6:9-10).
Lus nug rau sawvdaws xav:
- Daniyees tej lus thov Vajtswv tau tib muaj quas li cas?
- Daniyees ua zoo li cas rau nws kev tib cov lus thov ntawd?
- Peb kheev tib tej lus thov Vajtswv zoo li cas?
- Tsimnyog peb yuav tau hloov tej lus thov Vajtswv li cas?
Thaum pom txog tej lus cogtseg txog Vajtswv haiv neeg yuav tau rov mus txhim kho tebchaws, yam xubthawj uas Daniyees ua yog tig los cuag tus Tswv, “Kuv kub siab lug thov tus Tswv uas yog Vajtswv. Kuv yoo mov, kuv hnav ntaubtsaj thiab kuv zaum hauv qhov tshauv” (nqe 3). Daniyees tsis taij thov tus Tswv ua raws li Nws coglus tseg, tiamsis nws qhuas Vajtswv hais tias; “tus Tswv uas yog Vajtswv. Koj yog tus uas muaj hwjchim loj, peb hwm koj” rau qhov “Koj yeej ua raws nraim li koj tej lus cog tseg. Koj hlub tus uas muab siab npuab koj thiab ua raws li koj tej lus” (nqe 4). Thaum hais txog haiv neeg Yixalayees tej kev txhaum, Daniyees kuj hais tias Vajtswv yog tus ncaj ncees, (nqe 7), yog tus hlub tshua thiab zam txim tau rau tibneeg (nqe 9). Tej vajtswv uas lwm haiv neeg ntseeg, lawv tsuas thov kom nws tiv thaiv lawv xwb, tsis muaj zaug yuav nrog sib tham lus tau, vim tej vajtswv ntawd tsis hais taus lus. Daniyees tej lus thov qhia paub hais tias, nws kev qhuas Vajtswv yuav tsawg tsis tau thaum los thov Vajtswv.
Feem tim ob, yog feem uas ntau tshaj nyob hauv zaj lus thov Vajtswv. Daniyees tsis thov Vajtswv ua raws li Nws coglus tseg rau haiv neeg Yixalayees lawm, tiamsis nws lees paub txog tej kev txhaum uas haiv neeg Yixalayees tau ua los lawm. Nws lees hais tias haiv neeg Yixalayees yog cov hais tsis mloog thiab ntxeev siab rau tus Tswv (nqe 5-8). Daniyees tsis ua xyem xyav rau Vajtswv kev hlub, nws lees paub nws yog tus nrog haiv neeg Yixalayees ua txhaum lawm thiaj ntsib kev txob thuam, qhov ntawd yeej tsimnyog lawm (nqe 10-13). Yim pom yus qhov txhaum, yim paub nco Vajtswv txiajntsig thiab yim paub hais tias, yog tsis muaj tus Tswv ces yeej tsis zoo dab tsi thiab tsis tau txais kev cawm dim li.
Tom qab qhuas tus Tswv thiab lees kev txhaum tas lawm, Daniyees tau taij thov Vajtswv hais tias, “koj tsis txhob chim rau lub nroog Yeluxalees ntxiv lawm” (nqe 16), “Tus Tswv, thov koj mloog peb tej lus thov. Tus Tswv, thov koj zam peb lub txim. Tus Tswv, thov koj mloog thiab teb peb tej lus thov! Tus Tswv, thov koj tsis txhob tos ntev, sawvdaws thiaj paub hais tias koj yog Vajtswv! Lub nroog thiab cov neeg no yog koj tug!” (nqe 19). Tiamsis tej lus thov yog los ntawm lub siab txo fwjchim. “Peb tsa ncauj thov koj tsis yog vim peb yog neeg ncaj ncees, tiamsis vim koj yog tus uas hlub peb thiab yog tus ncaj ncees” (nqe 18), thiab thov yog vim “tus Tswv lub npe” (nqe 17-19). Qhov uas Daniyees taij thov tus Tswv pab haiv neeg Yixalayees, yog thov vim tus Tswv lub npe, tsis yog vim nws lub siab qia dub.
Raws li Tswv Yexus zaj lus qhia thov Vajtswv, Nws hais txog kev txhawb nqa Vajtswv, lees paub yus tej kev txhaum, Vajtswv lub tebchaws los txog thiab kom ua raws li Vajtswv lub siab nyiam. (Mathais 6:9-10). Peb twb nco zaj lus Yexus qhia thov Vajtswv lawm, tiamsis ntau zaug thaum los thov Vajtswv, thaum pib yeej taij thov thiab thov yam ub yam no mus txog qhov xaus xwb. Cia li ua tib zoo xav txog Yexus zaj lus qhia thov Vajtswv thiab kawm xyaum Daniyees tus yamntxwv thov Vajtswv rau yus kev thov Vajtswv.
Thov Vajtswv,
Tus Tswv, ntau zaug nyuam yaus tsuas paub taij thov koj pub xwb tsis paub qhuas txog Koj lub npe. Thov Koj pab kom nyuam yaus paub los thov Koj ib yam li Daniyees tau ua los lawm. Amees.
Thaum thov Vajtswv puas muaj lus txhawb nqa Vajtswv lawm tau? Peb puas xav txog tej lus thov Vajtswv yuav tsum muaj quas lawm tau?
Nyeem Vajluskub hauv peb lub xyoo: Pajlug 15
Kênh Youtube BHKTHN:
