Ntawv Nkauj 3:1-8
Nqe cim:
“Tiamsis tus TSWV, koj yog kuv daim thaiv hniav ntaj; koj yuav pub kom kuv yeej thiab koj yuav txhawb kuv lub zog.” (Ntawv Nkauj 3:3)
Lus nug xav:
– Vajntxwv Daviv tabtom nyob hauv qhov xwm txheej li cas?
– Nws lees paub txog Vajtswv thiab nws txojkev sib raug zoo yog dabtsi?
– Kev paub txog kev ntseeg yav tas dhau los pab nws yam dabtsi?
– Zaj kawm pab peb yam dabtsi thaum ntsib kev sim siab nyob puag ncig?
Ntawv Nkauj 3 yog tej lus thov kev cawm dim kawg siab ntawm Vajntxwv Daviv thaum nws raug tub vajntxwv Axaloos ntxeev siab, nrhiav tua. Thaum txojsia raug hem, nws tseem ntsib kev mob siab heev vim tus yeebncuab ntawd yog nws tus tub uas nws hlub tshua. Nws raug luag thuam thiab cem hais tias: “Vajtswv yuav tsis pab nws li” (nqe 2). Tiamsis, nyob hauv qhov xwm txheej ntawd, nws tsis qaug zog lossis poob siab tiamsis nws lees paub hais tias tus Tswv yog Tus uas cawm nws txojsia, tus Tswv yog nws daim thaiv hniav ntaj. Tus Tswv yog tus pub rau nws muaj koob meej thaum tsa nws ua vajntxwv kav Yixalayees. Tus Tswv yuav pub rau nws muaj kev kov yeej, ua rau nws tsa taub hau siab dua nws tej yeebncuab (nqe 3).
Nyob hauv lub sijhawm nyuaj siab, Vajntxwv Daviv tsis vamkhom tibneeg lub zog tiamsis nws tsa muag ntsia tus Tswv thiab thov kev cawm dim. Hauv txojkev sib raug zoo nrog tus Tswv, nws paub hais tias tus Tswv yeej ib txwm teb nws tej lus thov. Tus Tswv tau cawm nws dim ntawm tej tsiaj nyaum, tus neeg loj siab Nkauli-am, thiab tej kev ua rog nrog lwm tebchaws (I Xamuyees 17:37, 50; II Xamuyees 8). Los ntawm txojkev ntseeg yav tag dhau los, nws thiaj pw tsaug zog thiab nyob kaj siab lug thaum raug kev nyuaj siab vim nws paub hais tias tus Tswv tabtom tswjhwm; tus Tswv sawv ntawm nws ib sab thiab saib xyuas nws txojsia. Txuas ntxiv, nws thov tus Tswv uas yog Tus ncaj ncees, tiv thaiv txojkev ncaj ncees thiab pub koob meej rau nws. Hauv cov lus xaus, Vajntxwv Daviv tshajtawm muaj zog sis hais tias tus Tswv yog qhov chaw koob hmoov ntws los rau Nws haivneeg: “Kev muaj yeej yog los ntawm tus TSWV, thov nws foom koob hmoov rau nws haivneeg!” (nqe 8).
Vajntxwv Daviv qhia peb pom txojkev sib txuas ntawm kev sim siab, kev ntseeg, thiab kev kaj siab. Tej kev txaus ntshai, tej cua daj cua dub hauv lub neej yog thaj av zoo rau peb txojkev ntseeg tau txais kev txhawb zog thiab loj hlob. Thaum kev ntseeg ruaj khov hauv tus Tswv, peb yuav tso txhua yam rau hauv Nws txhais tes, tau txais tus Tswv txojkev cawm dim, thiab Nws txojkev kaj siab zoo kawg nkaus yuav nyob hauv peb lub siab. Kev kaj siab hauv tus Tswv pab peb tawmtsam tej kev sim siab tomntej, thiab ua li ntawd peb thiaj yuav paub tus Tswv ntxiv, paub peb tus kheej ntxiv, thiab txhim kho kev sib raug zoo nrog tus Tswv yim hnub yim sib ze. Thaum peb ntsib tej cua daj cua dub hauv lub neej, cia li nyo taubhau rau ntawm tus Tswv, Nws yuav tsa peb lub taubhau sawv siab.
Thov Vajtswv,
Tus Tswv, nyuam yaus ua Koj tsaug uas Koj yeej ib txwm mloog nyuam yaus tej lus thov thiab cawm nyuam yaus dim yog sijhawm. Koj paub nyuam yaus cheemtsum Koj li cas thaum ntsib tej kev nyuaj siab hauv lub neej. Thov kom Koj txojkev nyob nrog thiab kev kaj siab ua rau nyuam yaus ob txhais ceg muaj zog thiab tus ntsujplig cia siab ntsoov rau Koj. Nyuam yaus tuav Yexus Khetos lub npe thov, Amees.
Peb puas muaj txojkev ntseeg ruaj khov hauv tus Tswv thaum ntsib tej kev sim siab nyob vij puagncig?
Nyeem Vajluskub hauv peb lub xyoos: Hauxeyas 10
Kênh Youtube BHKTHN:
