Klei Aê Diê Blŭ: Klei Bi Hriêng 11:18-19
Êlan kliăng: “Đăm brei arăng mplư diih ôh; arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh. Kyuadah hlei pô rah kơ kđeh ñu pô srăng wiă mơ̆ng kđeh ñu klei rai tuč; ƀiădah hlei pô rah kơ Yang Mngăt jăk srăng wiă mơ̆ng Yang Mngăt Jăk klei hdĭp hlŏng lar.” (Galati 6:7-8).
Klei êmuh ksiêm mĭn: Si klei mtao Y-Salômôn mtô kơ klei bi mguôp mbĭt ti krah rah leh anăn wiă? Si klei ngă čiăng dưi dôk kjăp nanao hlăm knhuah hdĭp kpă ênô? Ya mta klei đru drei djă pioh kjăp atur knhuah kpă kơ klei hdĭp pô leh anăn gŏ sang?
Mtao Y-Salômôn mtô anak sa êlan hdră kơ klei hdĭp, anăn jing “ya klei rah, wiă klei anăn” čiăng kơ anak thâo mkŏ mjing atur knhuah kpă leh anăn dôk hdĭp kpă ênô. Pla ya mta ana boh srăng mâo boh mta ana anăn mơh, kyuanăn “mnuih ƀai” srăng mă tŭ boh mơ̆ng klei amâo mâo sĭt, klei mplư. Mnuih ngă hma rah ya mta mjeh mdiê, srăng wiă mta mdiê anăn mơh, msĕ snăn mơh, “pô ngă klei kpă ênô” srăng mâo klei mưn “sĭt nik”, kjăp phĭt. Dơ̆ng mơ̆ng rup sĭt êmĭt kơ mnuih ngă hma, mtao Y-Salômôn mtô kơ anak klei hriăm brei lŏ bi mĭn kbưi hĭn. Tơdah anak “dôk kjăp”, tŭ klei suăi klei dleh rah klei kpă ênô snăn boh anak srăng dưi mă tŭ jing “klei hdĭp”. Klăk wĭt, tơdah anak hmang kơ “duah”, amâodah tui tiŏ klei ƀai snăn ti knhal tuč anak srăng mă tŭ “klei djiê”. Mnuih dôk hdĭp jhat ƀai amâo djŏ knŏng luč ênoh klei hdĭp ti lăn ôh, ƀiădah ăt bi luč wăt ênoh klei hdĭp hlŏng lar hlăm ênuk hlŏng lar.
Hlăm phung drei djăp pô thâo sơăi êlan hdră “ya klei rah, wiă klei anăn” jing klei djŏ yơh. Khă snăn dưn amâo mâo ƀiă ôh mnuih dôk êgah êmăn leh anăn êdu ai tơdah ƀuh phung ƀai ăt mâo klei đĭ kyar mdrŏng sah hĭn êjai, bi mnuih kpă ênô si ngă tuôm nanao đrông hŏng klei lông dlăng, knap mñai. Đa mâo ayŏng amai adei mkăn, khădah ngă bruă kpă ênô dưn biădah arăng bi mčhuai săng, mčeh luar kơ digơ̆, amâodah kjham hĭn đa tŭ klei luč liê, phĭ ƀăl. Khua ƀĭng kna Y-Pôl mtô : “Đăm brei drei jing êmăn ôh hlăm klei ngă jăk, kyuadah tơdah drei amâo êdu ai ôh drei srăng wiă tơdah truh djŏ yan.” (Galati 6:9). Jing phung đăo, Khua Yang čiăng drei đăm mplư drei pô ôh, kyuadah Khua Yang thâo jih ya klei drei dôk rah, tơdah rah mjeh mdiê bô, atôk kam, drei knŏng mă tŭ hbâo bruih, ƀiădah tơdah drei rah mjeh mdiê jăk, sĭt nik drei srăng wiă čăp mdiê msăr ktrŏ. Ƀiădah, čiăng dưi mâo čăp mdiê ktrŏ msăr, snăn mnuih ngă hma mă bruă suăi dleh ti gŭ mđiă hjan yơh. Čiăng dưi hrui pĕ boh kroh jăk mmih, snăn mnuih pla ana boh brei gĭr guôn mjeh čăt, đĭ kơ prŏng leh anăn mboh.
Akâo kơ Aê Diê brei grăp čô drei hung kơ klei hdĭp hlŏng lar, gĭr tŭ, dôk kjăp hdĭp kpă ênô. Tơdah phung đăo pơ̆ng klei hdĭp ñu pô hŏng Khua Yang Yêsu, djiê mbĭt hŏng Ñu ti kyâo bi kal, snăn ăt srăng lŏ hdĭp mbĭt hŏng Ñu mơh (Galati 2 :20). Tơdah drei tŭ klei knap, gĭr ngă hlue klei atăt gai mơ̆ng Yang Mngăt Jăk, drei ăt srăng wiă mă klei hdĭp hlŏng lar mơ̆ng Yang Mngăt Jăk mơh (Galati 6 :7-8).
Ya klei drei dôk rah leh anăn si ngă diih dôk dưm atur klei hdĭp pô ti dlông klei kpă ênô leh mơ̆ ?
Ơ Khua Yang, bi mni lač jăk kơ Khua Yang kyuadah Ih djiê leh kyua klei soh kâo. Akâo kơ Ih brei kâo thâo hung kơ klei mâo ênoh dôk nanao hlŏng lar čiăng kơ kâo gĭr dôk hdĭp kpă ênô tui si klei Khua Yang mtô.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 32
Kênh Youtube BHKTHN:
