Klei Aê Diê Blŭ: Y-Mathiơ 6:25-34
Êlan kliăng: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y-Mathiơ 6:33).
Klei êmuh ksiêm mĭn: Ya klei phung tue tui duah hlăm klei hdĭp? Ya ngă? Ya mta klei Khua Yang Yêsu iêu mthưr brei phung ƀĭng kna tui duah? Si klei mblang kơ klei tui duah anei? Ya ngă klei hdĭp drei dluh lĕ tơdah êlâo hĭn tui duah mnơ̆ng mnuă ti lăn ala?
Hlăm trăn Klei Aê Diê Blŭ anei, Khua Yang Yêsu iêu mthưr phung tui hlue Ñu đăm uêñ đei ôh kơ klei hdĭp leh anăn kơ asei mlei, tơl rŭng răng ya drei srăng ƀơ̆ng huă, ya drei srăng mnăm, ya drei srăng hơô. Sĭt yơh, klei uêñ mĭn duah mnơ̆ng ƀơ̆ng huă, mnơ̆ng čŭt hơô amâo soh ôh, kyuadah anăn jing hnơ̆ng mkă cuăn phŭn kơ mnuih êjai dôk hdĭp ti lăn ala. Kyuanăn klei hdĭp phung tue, jing phung amâo mâo đăo kơ Aê Diê, bruă êlâo hĭn diñu knŏng wĭr wĭr tui duah đơ mnơ̆ng anăn đuč yơh. Bi drei, jing phung tui hlue Khua Yang Yêsu, Ñu čiăng kơ drei đăm ôh êlâo hĭn uêñ đei kơ klei hdĭp mnơ̆ng mnuă ti lăn ala anei, kyuadah drei mâo sa Aê Diê Ama jing Pô khăp, thâo săng djăp mta leh anăn kăp thiê brei jih jang djăp mta klei čiăng kơ mnơ̆ng Ñu hrih mjing. Pô čiêm leh phung čĭm hlăm adiê tơl trei, bi hơô čhiăm ao siam hĭn kơ mnga hlăm hma, amâo djŏ hĕ kdlưn hĭn Ñu srăng čiêm rông drei trei mđao.
Kyuanăn, mta klei Khua Yang Yêsu čiăng kơ drei tui duah êlâo hĭn kluôm jih klei hdĭp anei jing, brei drei duah êlâo hĭn Ƀuôn Ala Mtao Aê Diê leh anăn klei kpă ênô Ñu. Anei yơh jing mta klei brei phung tui hlue Khua Yang tui duah êlâo hĭn. Mdê hŏng phung amâo mâo đăo, hrô kơ klei tui duah mnơ̆ng mnuă jing mnơ̆ng knŏng jing jai găn bhiâo, brei drei tui duah klei Khua Yang čiăng kơ klei hdĭp drei, leh anăn dôk hdĭp ngă hlue klei čiăng anăn, kyuadah klei hdĭp yuôm hĭn kơ mnơ̆ng ƀơ̆ng huă, leh anăn asei mlei yuôm hĭn kơ čhiăm ao. Anei kơh jing klei adôk nanao hlŏng lar. Leh anăn klei ƀuăn kơ hlei pô dưm mta čuăn phŭn kơ klei hdĭp ñu, êlâo hĭn tui duah đơ mta klei kơ ƀuôn ala mtao Aê Diê leh anăn klei kpă ênô Ñu, dưi bi knal klei Khua Yang mprăp mkra djăp mta mnơ̆ng čiăng, adôk hlăm klei hdĭp ñu.
Êlâo hĭn duah Ƀuôn Ala Mtao Aê Diê jing klei lông dlăng prŏng kơ phung đăo. Kyuadah wang klei hdĭp ƀrư̆ hruê ƀrư̆ pral, grăp hruê mâo lu đei mta klei bi tluh ktŭng hrip drei mŭt hlăm wăl gun kpăk anăn, ngă kơ drei khăng bi mklăk nanao yơh klei dăp pruê̆ êruei êlâo hĭn, duah ya mta klei kơ lăn ala anei êlâo, êdei anăn kơh tui duah Khua Yang. Anei jing hdră čuăn kreh ƀuh hlăm klei hdĭp phung đăo dluh lĕ, kyuadah drei amâo dưi bi mơak kơ Aê Diê ôh, tơdah amâo mâo êlâo hĭn tui duah klei Khua Yang čiăng hlăm djăp bruă prŏng bruă điêt hlăm klei hdĭp drei. Klei tui duah Ƀuôn Ala Mtao Aê Diê leh anăn klei kpă ênô Ñu kpĭ čuăn drei, brei pioh mmông nao kơ Klei Aê Diê Blŭ, ksiêm mĭn Klei Aê Diê Blŭ grăp hruê, čiăng kơ Klei Aê Diê Blŭ mtrang atăt drei hlăm jih jang klei mĭn, bruă ngă, leh anăn yuôm hĭn jing jhŏng dôk hdĭp tui si klei ktrâo atăt mơ̆ng Klei Aê Diê Blŭ.
Ya mta klei drei tui duah êlâo hĭn hlăm klei hdĭp drei grăp hruê?
Ơ Khua Yang, jing Pô trŭn hriê leh ti lăn ala anei čiăng duah leh anăn bi mtlaih kâo. Ti krah lu mta klei kpăk gun hlăm klei hdĭp, akâo kơ Ih đru kâo thâo êlâo hĭn tui duah klei Khua Yang čiăng leh anăn Ƀuôn Ala Mtao Aê Diê kơ klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 33:1-49
Kênh Youtube BHKTHN:
