Pajlug 16:20-24
Nqe cim:
“Tswvyim yog lub qhovdej cawm txojsia rau tus neeg ntse, tiamsis kev ruam yuav rau txim rau cov neeg ruam” (Pajlug 16:22).
Lus nug rau sawvdaws xav:
- Kev fwm tus Tswv thiab xav ntsoov rau Vajtswv Txojlus muaj qab hau li cas rau tus kheej thiab tej neeg ib ncig?
- Peb tau kev txhawb zog li cas txog kev cia siab ntsoov rau tus Tswv thiab ua raws li Nws tej lus qhia?
Ib tsoom mloog txhua tus,
Cov neeg tas siab kawm xyaum, ua raws li tus Tswv tej lus thiab cia siab ntsoov rau tus Tswv lawv yeej yuav tau lub neej zoo xwb xwb (nqe 20). Yam zoo xub thawj uas cov neeg ntawd tau yog ua lub neej muaj nqis. Cov neeg uas fwm tus Tswv thiab ua raws li tus Tswv tej lus yog “neeg ntse”, thiab yog “thoob tsib to nrog” (nqe 21a). Tswvyim tsis yog yam uas ua muaj nqis rau ib leejtwg xwb, tiamsis tseem ua tau yam muaj nqis rau sawvdaws thiab. Cov “neeg ntse” tus Tswv yuav siv lawv lub neej kom muaj nqis rau coob leej ntau tus. Cov neeg ntse tes haujlwm tau ua qhia tshwm los ntawm “tej lus mos lus muag”. “Lus mos lus muag” tsis yog hais lus sib lus seev rau sawvdaws xav mloog tiamsis yog hais tej lus muaj kev hlub tseeb, thiab los ntawm nws tej lus ua rau lwm tus pom Vajtswv kev hlub (Efexus 4:15a). “thoob tsib to nrog” yog kev nkagsiab mus deb dav, hais lus paub saib qab saib hau ua rau luag txaus fwm.
Dhau ntawd, “Tswvyim yog lub qhovdej cawm txoj sia rau tus neeg ntse” (nqe 22a). Qhov no ua rau peb pom txog Vajtswv tes haujlwm pauv hloov ib tug tibneeg. Thaum ib tug tibneeg khaws Vajtswv Txojlus tseg, cia siab rau tus Tswv ces tus ntawd los ua “neeg ntse” (nqe 21), thiab txuas ntxiv yog nws “thoob tsib to nrog”, thaum ntawd nws txuas tau lub qhovdej cawm siav thiab txuas ncav mus rau lwm tus (nqe 22). Tus neeg uas kawm xyaum Vajtswv Txojlus tsis tseg yuav pab tau nws lub neej pheej hloov tshiab tsis tseg ib yam li lub qhovdej txhawv uas muaj dej ntws tsis tu. Tus ntawd yuav loj hlob sab kev ntseeg, kev kawm xyaum thiab nws lub neej yuav ua rau lwm tus txaus fwm, txaus ntshai. Peb pom Vajtswv Txojlus hais txog Yauxej, Daniyees thiab Nehemis, lawv yog cov neeg poob ua cev qhev, tiamsis lawv fwm ua raws li Vajtswv dej siab, ces tus Tswv siv lawv lub neej, lawv kev txawj ntse cawm tau lawv thiab tej neeg tsis ntseeg nyob ib ncig txoj sia.
Heev tshaj qhov ntawd, tus neeg ntse tej lus qab zib li zib ntab yuav pab txhawb pab kho lwm tus lub neej (nqe 24). Yog li ntawd, xav kom muaj tej lus qab zib peb yuav tsum muaj Vajtswv tej lus nyob hauv peb lub siab. Yuav tsum ntseeg ruaj tus Tswv, ua raws li tus Tswv tej lus qhia kom peb tau tus Tswv foom hmoov rau lub neej.
Thov Vajtswv,
Tus Tswv, thov pab nyuam yaus xav ntsoov txog Koj Txojlus kom nyuam yaus tau txais koob hmoov uas Koj pub. Thiab thov Koj siv nyuam yaus lub neej yog qhovdej cawm txojsia ntws mus pub rau tej neeg ib ncig ntawm nyuam yaus. Amees.
Ib tsoom mloog uas hmov thiab tshua,
Peb puas tau tus Tswv siv peb yog lub qhovdej cawm txojsia rau tej neeg ib ncig ntawm peb lawm?
Nyeem Vajluskub hauv peb lub xyoo: Yauj 12:1-13:19
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
