Klei Aê Diê Blŭ: Klei Bi Hriêng 16:20-24
Êlan kliăng: “Klei thâo mĭn jing akŏ êa klei hdĭp kơ hlei pô mâo ñu, ƀiădah klei mluk jing klei bi kmhal kơ phung mluk” (Klei Bi Hriêng 16:22).
Klei êmuh ksiêm mĭn: Ya boh tŭ dưn ba kơ mnuih mdê mdê leh anăn kơ phung ƀuôn sang mơ̆ng klei huĭ mpŭ kơ Aê Diê leh anăn mđing kơ Klei Ñu Blŭ? Si klei bi mđĭ ai drei tơdah dôk gĭr hlăm klei đăo kơ Khua Yang leh anăn gưt ngă tui si Klei Ñu Blŭ?
Pô mđing hriăm, gưt asăp Klei Aê Diê Blŭ, leh anăn đăo knang kơ Ñu sĭt nik srăng mâo klei jăk jĭn (êlan 20). Klei jăk jĭn tal êlâo hĭn jing klei hdĭp tŭ dưn. Pô huĭ mpŭ kơ Khua Yang leh anăn gưt asăp Klei Ñu Blŭ jing pô “mâo ai tiê thâo mĭn”, leh anăn “arăng pia ñu pô thâo săng” (êlan 21a). Klei thâo mĭn amâo djŏ knŏng klei jing kơ mdê mdê pô ôh ƀiădah mâo lu mnuih tŭ ư leh anăn ba klei tŭ dưn kơ ƀuôn sang. Khua yang srăng yua Pô “mâo ai tiê thâo mĭn” leh anăn ñu jing tŭ dưn kơ lu mnuih. Klei tŭ dưn mơ̆ng pô huĭ mpŭ kơ Khua Yang leh anăn mđing kơ Klei Aê Diê Blŭ bi êdah hlăm “klei blŭ êdu êun bi mđĭ klei thâo”. “Klei blŭ êdu êun” amâo djŏ ôh blŭ klei arăng čiăng hmư̆ ƀiădah jing klei blŭ mâo klei khăp sĭt nik, leh anăn hŏng klei blŭ, bi lar klei pap Aê Diê (Êphêsô 4:15a). “Klei thâo” wăt čiăng lač kơ klei blŭ juh alum mơh, mblang jing klei blŭ mnuih thâo mĭn amâo djŏ knŏng mâo lu klei thâo ôh ƀiădah kyua blŭ hlăm klei khăp klei pap anăn srăng klei juh alum lu snăk.
Ti djiêu anăn, “klei thâo mĭn jing akŏ êa klei hdĭp kơ hlei pô mâo ñu” (êlan 22a). Tinei drei ƀuh knhuang êlan Khua Yang bi mlih sa čô mnuih. Tơdah đăo knang kơ Aê Diê leh anăn khăp kơ Ñu gưt ngă Klei Ñu Blŭ, pô anăn srăng “mâo ai tiê thâo mĭn” (êlan 21), leh anăn lŏ thiăm “klei thâo săng”, kyuanăn yơh pô anei jing mnuih bi lar êa klei hdĭp kơ mnuih mkăn (êlan 22). Msĕ si sa akŏ êa amâodah hnoh êa bi mrâo ñu pô nanao, sa čô mnuih amâo tuôm mdei ôh tui tiŏ klei thâo săng srăng bi mrâo ñu pô mơ̆ng hlăm lam. Pô anăn srăng đĭ hriê kơ prŏng nanao, tŭ hriăm, leh anăn mâo ênoh yuôm kyuadah ñu mâo ală dlăng thâo săng êlam kơ klei hdĭp ƀiădah amâo tuôm ƀuh ôh ti anôk mkăn. Knŏng hjăn Aê Diê yơh dưi brei klei anei. Drei ƀuh klă hlăm Klei Bi Mguôp Hđăp, klei hdĭp Y-Yôsep, khua pô hưn êlâo Y-Đaniel, Y-Nêhêmi, jing phung dôk hdĭp jing hlŭn mnă ƀiădah tơdah diñu đup gưt hdră Khua Yang leh anăn tui duah Khua Yang snăn Khua Yang yua klei hdĭp diñu, klei thâo mĭn diñu ba êa hdĭp amâo djŏ knŏng kơ phung ƀuôn sang Ñu ôh ƀiădah wăt kơ phung ka đăo dôk hdĭp jŭm gah găn diñu.
Kdlưn hĭn kơnăn, klei blŭ thâo mĭn mơ̆ng pô huĭ mpŭ kơ Aê Diê mâo klei ktang dưi lŏ bi mrâo leh anăn bi hlao phung ƀuôn sang msĕ si êa hnuê (êlan 24). Snăn, čiăng mâo klei blŭ dưi bi hlao leh anăn thâo mĭn, brei drei mâo Klei Aê Diê Blŭ hlăm ai tiê. Dôk gĭr bĕ hlăm klei đăo kơ Khua Yang, hriăm leh anăn gưt ngă tui si Klei Ñu Blŭ čiăng dưi mâo klei jăk mơak Khua Yang brei.
Si ngă Khua Yang yua leh mơ̆ drei jing phung bi lar êa hdĭp kơ phung riêng gah drei?
Wah lač: Ơ Khua Yang, akâo Ih brei ai tiê klei mĭn kâo dôk mđing nanao kơ Khua Yang pô leh anăn Klei Ih Blŭ čiăng kơ kâo amâo djŏ knŏng hjăn bi knal kơ sa klei hdĭp jăk mơak ôh, ƀiădah wăt Ih yua klei hdĭp kâo čiăng ba êa hdĭp truh kơ phung riêng gah kâo msĕ mơh. .
Dlăng Klei Aê Diê Blŭ hlăm tlâo thŭn: Y-Yôp 12:1-25; 13:1-19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
