Kalatias 2:1-10
Nqe cim:
“Rau qhov Vajtswv tsa kuv ua ib tug timthawj qhia lwm haivneeg ib yam li Vajtswv tsa Petus ua timthawj qhia cov Yudais.” (Kalatias 2:8)
Lus nug rau sawvdaws xav:
– Timthawj Paulus siv cov lus twg los hais cov thawjcoj hauv nroog Yeluxalees?
– Vim li cas Paulus hais tias “Vajtswv yeej tsis xaiv leejtwg ntsejmuag?”
– Zaj kawm hnub no qhia peb yam dabtsi?
Ntu Vajluskub hnub no hais txog zaj uas Paulus, Npananpas thiab Titus lawv mus nram lub nroog Yeluxalees nrog “cov thawj” sib tham (nqe 2), cov thawjcoj lub sijhawm ntawd yog Yakaunpaus tus uas yog Yexus tus kwv sab nqaijtawv, thiab ob tug timthawj uas yog Petus thiab Yauhas, nrog lawv sib tham txog Txojmoo Zoo uas Paulus coj mus qhia rau lwm haivneeg. Qhov vimchij yog muaj ntau leej tsis lees tias Paulus yog timthawj thiab hais tias Paulus qhia Txojmoo Zoo raws li siab nyiam xwb. Thaum muaj tej kev sib cav txog txojkev cawm dim – uas yog qhov tseemceeb ntawm cov ntseeg Yexus, Timthawj Paulus qhia tshwm lub siab hwm txog cov thawjcoj uas yog cov timthawj, nws mus ntsib lawv kom lawv nrog lees paub tias Txojmoo Zoo uas Paulus qhia thiab lawv qhia yog tib txoj. Txawm yog Paulus mloog Vajtswv lus los nws yeej hwm cov thawjcoj ua ntej nws. Qhov kev sib ntsib no sawvdaws yeej sib tham meej thiab ib leeg saib ib leeg muaj nqis.
Tiamsis ua li cas Paulus ho hais tias “cov neeg uas suav tias lawv tseemceeb” (nqe 6), thiab “cov neeg uas lawv suav tias tseemceeb ntawd tsis tau muab ib yam dabtsi tsav ntxiv rau kuv” (nqe 6 Phau txhais tshiab), vim “Vajtswv tsis xaiv leejtwg ntsejmuag”. Muaj qee tus tub ntxhais Vajluskub hais tias, cov ntseeg Kalatias txajmuag qhov uas lawv mloog ib tug timthawj tsis tau nrog Yexus ua ke qhia. Timthawj Paulus xav hais rau lawv tias, txawm yog tibneeg yuav saib lub meejmom timthawj tus no loj dua tus tod, kev qhia thiab cov xyoo nrog tus Tswv mus, los Paulus thiab Timthawj Petus puavleej yog Timthawj tiag, tau tus Tswv txib mus qhia cov neeg sib txawv (nqe 7-8). Yog li ntawd, Timthawj Paulus tsis txajmuag qhov uas yav tas los nws tawmtsam tus Tswv lossis kev ua Timthawj tom qab no. Los ntawm lub siab hwm, Paulus thiaj mus ntsib cov Timthawj, tiamsis Paulus yeej tuav rawv nws txojkev ntseeg “Vajtswv tsa kuv ua ib tug timthawj… ib yam li Vajtswv tsa Petus ua timthawj qhia cov Yudais.” (nqe 8).
Zaj kawm no qhia rau peb hais tias, txawm yog nyuam qhuav ntseeg Vajtswv lossis ntseeg ntev xyoo, txawm yog nyob Pawg Ntseeg loj lossis Pawg Ntseeg yau toj siab, txawm yog haivneeg tsawg lossis haivneeg Nyablaj, txawm yog muaj qib haujlwm lossis yog tus ntseeg… tsis txhob khav txog yus tus kheej, kuj tsis txhob txajmuag tias yus nyob lub meejmom qis. Tagnrho peb sawvdaws puavleej yog Vajtswv cov tubtxib ib yam nkaus. Tus Tswv txib thiab siv peb nyias muaj nyias qhov chaw raws li tus Tswv siab nyiam, peb cia li ua haujlwm los ntawm feem xyuam ua tubtxib ncaj ncees thiab nrog tus Tswv mus li.
Thov Vajtswv,
Tus Tswv, nyuam yaus ua Koj tsaug qhov uas Timthawj Paulus ntseeg ruaj tias Koj yog tus tsa nws ua haujlwm. Thov Koj pab kom nyuam yaus tsis khav, tsis txajmuag tus kheej, vim paub tseeb tias Koj yog tus uas twb ua haujlwm hauv lwm tus lub siab, Koj yeej yuav ua haujlwm hauv nyuam yaus thiab. Tuav Tswv Yexus lub npe thov, Amees.
Puas muaj qee zaug uas peb pom tias yus tau meejmom “siab” dua lossis “qis” dua lwm tus?
Nyeem Vajluskub hauv peb lub xyoo: I Vajntxwv 13
Kênh Youtube BHKTHN:
