Klei Aê Diê Blŭ: Galati 2:1-10
Êlan kliăng: “Kyuadah Aê Diê, Pô mă bruă hlăm Y‑Pêtrôs mjing ñu khua ƀĭng kna kơ phung khăt klĭt, mă bruă hlăm kâo msĕ mơh mjing kâo khua ƀĭng kna kơ phung tue” (Galati 2:8)
Klei êmuh ksiêm mĭn: Ya pruĕ blŭ Khua ƀĭng kna Y‑Pôl yua čiăng lač kơ phung knơ̆ng gĭt gai Phung Sang Aê Diê ti ƀuôn Yêrusalem? Ya ngă ñu lač Aê Diê amâo yap mnuih mdê mdê ôh? Ya klei hriăm hruê anei čiăng bi hriăm drei?
Trăn Klei Aê Diê Blŭ anei čih yăl dliê kơ klei Y‑Pôl, Y‑Ƀarnaƀas leh anăn Y‑Tit đĭ nao kơ ƀuôn Yêrusalem čiăng bi blŭ hrăm knŏng hjăn hŏng “phung khua pơ prŏng” (êlan 2) jing phung knơ̆ng gĭt gai Phung Sang Aê Diê ênuk anăn jing Y‑Yakơ adei Khua Yang, Khua ƀĭng kna Y‑Pêtrôs leh anăn Y‑Yôhan čiăng mblang kơ digơ̆ Klei Mrâo Mrang Jăk ñu tuôm mtô leh kơ phung tue. Kyuadah mâo lu mnuih amâo tŭ ôh kơ klei ñu jing khua ƀĭng kna leh anăn lač ñu mtô Klei Mrâo Mrang Jăk tui si klei mĭn ñu pô. Dôk ti anăp klei bi tăng mgăl ktang tĭt kơ klei mtô kơ klei bi mtlaih – jing klei mtô atur hlăm klei đăo kơ Yêsu Krist. Khua ƀĭng kna Y‑Pôl bi êdah klei mpŭ kơ klei phung khua ƀĭng kna mkăn gĭt gai hŏng klei bi tuôm hŏng digơ̆ čiăng bi klă Klei Mrâo Mrang Jăk ñu mtô leh anăn digơ̆ mtô knŏng jing sa. Ñu mpŭ kơ phung knơ̆ng gĭt gai Phung Sang Aê Diê ƀiădah ñu gưt kơ Aê Diê kluôm ênŭm. Klei bi tuôm anăn brei ƀuh jih jang diñu bi blŭ hŏng klei kpă leh anăn bi mpŭ hdơ̆ng diñu.
Ƀiădah lĕ, ya ngă ñu lač, “bi kơ phung khua pơ prŏng”, leh anăn “ya diñu jing kâo amâo yap yuôm ôh” kyuadah “Aê Diê amâo yap mnuih mdê mdê ôh” (êlan 6)? Mâo đa phung mblang Klei Aê Diê Blŭ mblang snei, phung đăo Galati yap diñu jing phung amâo tŭ ôh kyuadah hmư̆ hĕ klei mtô mơ̆ng sa čô khua ƀĭng kna amâo tuôm dôk mbĭt hŏng Khua Yang Yêsu. Khua ƀĭng kna Y‑Pôl čiăng lač kơ digơ̆ wăt tơdah mnuih yap khua ƀĭng kna anei prŏng hĭn kơ khua ƀĭng kna mkăn, wăt tơdah mpŭ kơ sa mnuih hŏng hdră êlan digơ̆ mtô leh anăn thŭn digơ̆ tui hlue Khua Yang dưn, ƀiădah ñu dua Khua ƀĭng kna Y‑Pêtrôs jing khua ƀĭng kna sĭt sơăi, Aê Diê tiŏ nao diñu kơ phung găp djuê mdê mdê (êlan 7-8). Kyuanăn, Khua ƀĭng kna Y‑Pôl amâo mâo klei hêñ ôh kơ klei ñu tuôm bi kdơ̆ng leh hŏng Khua Yang leh anăn kơ klei ñu jing sa čô khua ƀĭng kna mrâo. Hŏng klei luă gŭ ñu nao bi tuôm hŏng phung khua ƀĭng kna mkăn ƀiădah ñu ăt djă pioh kjăp klei mĭn, “Pô mă bruă hlăm Y‑Pêtrôs…mă bruă hlăm kâo msĕ mơh” (êlan 8).
Klei hriăm mñă kơ grăp čô drei, wăt tơdah mrâo đăo hĕ amâodah đăo kơ Khua Yang sui thŭn leh, wăt tơdah jing phung đăo hlăm sang Aê Diê prŏng hĕ amâodah hlăm sa anôk bi kƀĭn điêt, wăt tơdah drei jing phung Êđê amâodah Êyuăn, wăt tơdah drei jing pô mtô, khua pô mtô hĕ amâodah jing sa čô bi đru đăo…đăm duah bi mđĭ drei pô ôh, kăn hêñ kyua drei jing mnuih amâo tŭ rei, kyuadah jih jang drei jing dĭng buăl kơ Khua Yang msĕ sơăi. Grăp čô Khua Yang srăng tiŏ nao leh anăn yua kơ bruă mdê mdê tui si Ñu čiăng, brei drei mă bruă hŏng klei jing sa čô dĭng buăl jăk leh anăn sĭt suôr kơ Khua Yang.
Drei tuôm bi ƀuh mơ̆ kơ drei pô jing “prŏng hĭn” amâodah “điêt hĭn” kơ pô mkăn?
Wah lač: Ơ Khua Yang, lač jăk kơ Ih kyua klei bi hmô mơ̆ng Khua ƀĭng kna Y‑Pôl đăo kjăp kơ klei Ih iêo leh ñu. Akâo Khua Yang đru kâo amâo bi mđĭ kâo pô hŏng klei mgao ôh, kăn hêñ mă kơ kâo pô rei kyuadah kâo thâo Pô mă bruă hlăm ai tiê mnuih mkăn mă bruă hlăm ai tiê kâo msĕ mơh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
