Tơdrong Pơđơ̆k 23:15-18
“Ơ dăm, dah lăm jơhngơ̆m ih hơgei lei jơhngơ̆m inh kư̆m hiôk chơt.” (Tơdrong Pơđơ̆k 23:15)
Nơ̆r jet tơchĕng pơwao:
– Tơdrong arih kon hơ’lơ̆p đei ‘bơm thoi yơ hăm mĕ ‘bă?
– Yua kơ kiơ bơ̆n ‘nĕ kơ pơtŏ pơting hăm bơngai kơnê̆?
– Lĕch đơ̆ng bơngai mă hli yom kơ Kră Yang gô thoi yơ?
– Tơdrong kiơ bơ̆n kăl kơ tơplih wă kơ pơm kơ mĕ ‘bă hiôk păng pơm hơdah Anăn Kră Yang?
Pơtao Sôlômôn pơma hơđăl kơ tơdrong tơ’bưh tơdrong arih sa ‘lơ̆ng đơ̆ng kon hơ’lơ̆p hăm bơngai ‘bă, chơt hiôk tơpă, sư pơma hơđăl: “Dah lăm jơhngơ̆m ih hơgei, lei jơhngơ̆m inh kư̆m hiôk chơt.” Tơdrong hiôk chơt ưh kơ sĭ tơ’bôh lăp gah ‘nguaih đĕch, mălei lĕch đơ̆ng lăm “Klơm klak”, jơhngơ̆m bơngai ‘bă. ‘Bă chơt hiôk hloh kơplah kon ‘lơ̆p bơ̆n tơ’bôh tơdrong arih hơgei, tơdrong ‘lơ̆ng Kră Yang pơgơ̆r đơ̆ng tơdrong jang, nơ̆r pơma. ‘Bă chơt hiôk yua kơ đơ̆ng nơ̆r kon hơ’lơ̆p pơma tơ’bôh tơdrong tơchĕng đei pơhrăm pơjuăt wă “pơma tơpăt”, tơdrong pơm ‘lơ̆ng, ‘lơ̆ng rơgoh. Tơdrong gĭt kăl ‘bă đei tơ’blŏk ăn kơ kon hơ’lơ̆p noh “hli yom kơ Kră Yang ‘Bok Kei-Dei” rim năr ưh kơ sĭ mŭk tơmam ôh, chă mŭk tơmam wă kơ mơdrŏng măloi tơdrong mơdrŏng ưh kơ trŏ, kơlih kơ thoi noh ‘nĕ pơtŏ hăm bơngai kơnê̆, ‘nĕ gar hăm lu bơngai yoch kơplah lu sư đei tơdrong pŭn. Tơdrong kơnhăm gĭt kăl kơ tơdrong arih kon ‘lơ̆p noh hli yom kơ Kră Yang păng druh kiơ̆ tơdrong tơpăt Sư “păng tơdrong mă ih hơmĕng gô đei huay kơ tôch” (trong 18 BTTHĐ). ‘Noh bơih tơdrong arih chơt hiôk tơ anăp, hiôk hian rơnŭk rơnua đơ̆ng Kră Yang ăn. ‘Bok Kei-Dei gô pơm pơkeh tơdrong hơmĕng đơ̆ng bơngai tơpăt gah tơdrong arih hiôk jơnap dang ei păng ning mônh.
Tơdrong mĕ ‘bă bơngai lui hiôk chơt dêh noh kon hơ’lơ̆p mă băt hli yom kơ Kră Yang, yua kơ mŭk tơmam anăn đe ư-ang ‘bônh kơtôch, mălei tơdrong arih ling lang ưh kơ layơ tôch. Lơ bơngai hơ’lơ̆p ngăl ‘bônh kơ glăi kơplah ‘bôh mĕ ‘bă, hnam dơnŏ bơ̆n dơnuh, đe pơchê pơjăm, thoi noh ‘bônh kơ pơm tơdrong glăi wă kơ đei jên lơ tơgŭm lăm hnam dơnŏ, đơ̆ng noh pơ̆k huŏng lăm tơdrong pơhlŭ pơm yoch. Mă khan đei tơdrong mơdrŏng hrei hrei ‘bônh đĕch ră, mălei đơ̆ng noh chu kơ jên tơmam pơgơ̆r, pơmat ling lang, pơm kơ mĕ ‘bă, hnam dơnŏ mơlâu kơ đe. Yakơ đei bơtho: “Bơ̆n ư-ang tơpă ‘bôh lu bơngai đei tơdrong truh mă sư oei lui kơjăp, thoi lĕ kơ ‘bok Jop sơ̆ sư đei tơdrong gleh pơmat kơ sư dang noh mă sư oei adrin lui khŏm khŏm. Na đơ̆ng rŏng bơ̆n ‘bôh ‘Bok Kei-Dei mơnat kơ sư, ăn kơ sư hiôk jơnap, na bơ̆n kư̆m băt ‘Bok Kei-Dei mơnat kơ bơ̆n thoi sư noh mơ̆n” (Yakơ 5:11). Tơdrong arih bơngai lui athei “hli yom kơ Kră Yang” lăm nơ̆r pơma, tơdrong jang. Mă khan đei tơdrong pơmat, mălei gô đei tơdrong pŭn hiôk, tơdrong mơnat păng Kră Yang iơ̆m dim ling lang. Mĕ ‘bă chu pơmat mălei oei chơt hiôk kơplah ‘bôh kon hơ’lơ̆p hơgei pơm kiơ̆ nơ̆r Kră Yang bơtho ‘lơ̆ng hloh kơ ‘bôh kon hơ’lơ̆p đei jên tơmam lơ ră mălei pơm tơdrong yoch, hiong răm lăm chăl ‘nâu păng lăm chăl đơ̆ng rŏng ning mônh.
Kơkuh kơ Kră Yang, inh bơnê kơ Ih đei tơ’blŏk ăn kơ inh athei arih hơgei pơm kiơ̆ nơ̆r Kră Yang đơ̆ng tơdrong mĕ ‘bă bơtho trŏ. Apinh Kră Yang ăn kơ inh arih ling lang hli yom kơ Kră Yang, pơm kơ mĕ ‘bă hiôk, păng Kră Yang lăp đon rim năr. Yua anăn Kră Yang Yêsu Krist, Amen!
Nơ̆r bơ̆n pơma bơ̆jang rim năr hăm pơm kơ mĕ ‘bă hiôk păng ư-ang anăn Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Lu Pơtao 12
Kênh Youtube BHKTHN:
