I Kôrintô 2:1-5
“Mă-lei inh ưh kơ bơtho kiơ̆ kơ ‘bơ̆r đon inh hơgei ôh. Đơ̆ng Yang Bơhngol ‘Lơ̆ng ‘Bok Kei-Dei tơgŭm inh bơtho na iĕm gơh lui hloi. Thoi noh na iĕm băt tơdrong lui iĕm noh ưh kơ trŏ lĕch đơ̆ng kon bơngai ôh, lĕch đơ̆ng Yang Bơhngol ‘Lơ̆ng ‘Bok Kei-Dei.” (I Kôrintô 2:4-5)
Nơ̆r jet tơchĕng pơwao:
– ‘Bok Pôl bơtho Tơdrong ‘Nao ‘Lơ̆ng kơ lu bơngai Pơlei Kôrintô, sư bơtho hăm jơhngơ̆m thoi yơ? Bơtho tơdrong kiơ?
– Yua kơ kiơ sư rơih iŏk ưh kơ bơtho hăm tơdrong gơh hơgei sư kơdih?
– Lu bơ̆n ngăl gơnang kơ tơdrong kiơ kơplah ră roi Tơdrong ‘Nao ‘Lơ̆ng?
‘Bok Pôl bơtho pơtrơp dơ̆ng kơ̆l ‘bai gah tơdrong lu bơngai lui tơ Pơlei Kôrintô tơklah dih băl ưh kơ pôm đon kơlih kơ đơ̆ng jơhngơ̆m lu bơngai hơgei kiơ̆ kơ tơdrong hơgei kon bơngai ala teh noh pơm kơ lu sư tơklah dih băl. ‘Bok Pôl tơ’blŏk ăn kơ lu bơngai lui Pơlei Kôrintô athei lu sư wơ̆t dơ̆ng thoi blŭng a ‘bơ̆t mă sư truh tơ ei sơ̆ ‘bôh lu sư lui ‘lơ̆ng, pôm jơhngơ̆m đon noh. Mă khan ‘bok Pôl băt ră Pơlei Kôrintô ‘nâu pơlei tih mơdrŏng păng đei hơpoh đơ̆ng tơdrong arih gơh hơgei lu bơngai Grĕk noh jrŭ dêh,lu sư gĭt kơ tơdrong hlôh wao kon bơngai, ‘maih mơ̆ng tơdrong đe bơtho hơgei pran, mă-lei ‘bok Pôl truh tơ noh bơtho lu đe ei, sư bơtho “ưh kơ yua hăm nơ̆r hlom jrŭ dah mă bơtho hăm ‘bơ̆r đon gơh hơgei sư kơdih.” (tr.1,4). Tơplơ̆ kơ ‘noh, sư truh tơ noh bơtho “nhen thoi bơngai rơdu tơrăn, hli, tơtơ̆ tơtey” (tr.3), wă khan bơtho hăm tơdrong băt kơ đơ̆ng Kră Yang wơh sư bơtho, yua kơ thoi noh bơih na kăl kơ tơdrong mơsêh pran Yang Bơhngol ‘Lơ̆ng tơgŭm sư bơtho. ’Bok Pôl bơtho tơ pơlei Kôrintô ‘nâu ưh kơ ‘nao blŭng a năr ‘noh ôh, sư bơtho ‘nâu jơhngơ̆m sư pơpơ̆, hrĭ ‘maih lĕch đak măt kư̆m thoi sư bơtho Nơ̆r Kră Yang tơ âu hơdrol ki mơ̆n. Sư oei hơnơ̆ng băt kơ tơdrong jang Kră Yang pơjao kơ sư ‘nâu tơdrong jang yang ưh kơ tơdrong jang kon bơngai ôh. Sư rơih iŏk bơtho ưh kơ pơ-ang tơdrong hơgei sư kơdih,mă-lei sư bơtho pơdah Tơdrong ‘Nao ‘Lơ̆ng Kră Yang. Sư rơih iŏk ưh kơ ư-ang anăn sư kơdih wă kơ anăn Kră Yang đei ư-ang.
Pơm liơ wă kơ băt minh ‘nu bơngai bơtho hăm tơdrong hơgei sư kơdih dah mă bơtho huay kơ hăm tơdrong hơgei kơdih? Bơ̆n athei lăng tơdrong pơtrŭt jơhngơ̆m lăm to bơngai ‘noh! Lei tơdrong pơtrŭt jơhngơ̆m ‘bok Pôl lăm to ei, noh sư wă kơ ‘nhŏng oh huay kơ pơdơ̆ng đon lui ‘bơ̆t tơdrong hơgei kon bơngai (tr.5). Sư rơih iŏk bơtho ưh kơ yua hăm ‘bơ̆r đon pơma hơgei tăr sư kơdih ôh, yua kơ tơdah sư bơtho yua hăm‘bơ̆r đon hơgei pơma wă kơ rŏ ‘bơ̆t anăp lu bơngai pơlei Kôrintô mơdrŏng, hơgei kơ tơdrong ala teh tơpă thoi noh, lei đe gô ư-ang kơ sư noh bơih, na Tơ’ngla mă sư bơtho wă kơ đe băt wă kơ đe‘bôh noh tă tơ pĕng klơ̆p lê̆ hlơp hloi dơ̆ng! Sư rơih iŏk trong bơtho ưh kơ kiơ̆ tơdrong gơh hơgei sư kơdih ‘noh yua kơ sư wă kơ đe băt minh Tơdrong ‘Nao ‘Lơ̆ng Kră Yang đĕch, sư ưh kơ wă kơ đe băt kơ sư kơdih ôh, lei na đe băt tơpă hloi bơih Tơdrong ‘Nao ‘Lơ̆ng Kră Yang noh, na đe pơjing Khul Lui hăm tơdrong hmă đĕch noh. ‘Bok Pôl pơma tơpăt tơpă khan: Đe băt Tơdrong’Nao ‘Lơ̆ng âu ưh kơ băt đơ̆ng lu bơngai bơtho hăm ‘bơ̆r đon gơh hơgei kon bơngai ôh. Đunh đơ̆ng rŏng kơ ‘noh, lăm Hla bơar I Kôrintô 9:22b, sư đei pơma ‘bơm kơ tơdrong sư, thoi âu: “Inh druh kiơ̆ rim đon kon bơngai wă pơlung lu sư lui kơ Yêsu Krist na klaih đơ̆ng dôm tơdrong yoch.” Mă‘bơ̆t anih ayơ, lu bơngai tơ noh phara băl thoi yơ, ‘bok Pôl drơ̆ng tơ anih noh đei thoi noh bơih, na sư khŏm tơmơ̆t sư kơdih tơ lăm tơdrong arih lu bơngai mă sư bơtho ăn Tơdrong ‘Nao ‘Lơ̆ng noh wă kơ lơ bơngai klaih đơ̆ng tơdrong yoch, ưh kơ pơma gah tơdrong bơtho Tơdrong ‘Nao ‘Lơ̆ng noh wă bơtho liơ lei ôh, mă-lei pơma kơ bơngai mă sư wă bơtho ei thoi yơ noh.
Đe đei roi hơ’mon tơdrong Khul Lui đơ̆ng sơ̆ truh tơ dang ei, đei lơ bơngai bơtho hơgei, mă khan lei ră, lu sư ưh kơ gơnang kơ tơdrong gơh hơgei lu sư kơdih, lu sư ling-lang gơnang kơ tơdrong mơsêh Yang Bơhngol ‘Lơ̆ng bơ̆jang lăm jơhngơ̆m lu bơngai mơ̆ng nơ̆r Kră Yang mă lu sư bơtho noh.
Bơ̆n bơtho Nơ̆r Kră Yang, bơ̆n athei hơmet ‘bai wă bơtho noh, mă-lei ưh kơ gơnang kơ tơdrong đêl bơ̆n hơmet noh ôh, mă-lei bơ̆n athei gơnang minh tơdrong mơsêh Yang Bơhngol ‘Lơ̆ng đĕch.
Ơ Kră Yang, apinh Ih mơnat pă jô̆ yo kơ inh yua kơ lơ wơ̆t inh gơnang kơ tơdrong inh gơh kơdih, gơnang kơ hla bơar pơsĭt kơ inh hŏk keh đơ̆ng hnam trưng pơhrăm nơ̆r Ih noh, kư̆m gơnang kơ tơdrong hlôh wao inh kơdih wă bơtho Tơdrong’Nao ‘Lơ̆ng. Apinh Ih tơgŭm inh ling-lang gơnang kơ tơdrong mơsêh Yang Bơhngol‘Lơ̆ng wă kơ anăn‘Bok Krist đe ư-ang. Inh krao khan yua anăn Kră Yang Yêsu Krist, Amen!
Bơ̆n pơdơ̆ng đon lui bơ̆n ‘bơ̆t tơdrong gơh hơgei bơ̆n kơdih dah pơdơ̆ng ‘bơ̆t tơdrong mơsêh Yang Bơhngol ‘Lơ̆ng bơ̆jang lăm jơhngơ̆m bơ̆n?
Đŏk Sơ̆p hla bơar ‘Bok Kei-Dei lăm pêng sơnăm: Tơdrong Jang 17
Kênh Youtube BHKTHN:
