Klei Aê Diê Blŭ: I Kôrantô 2:1-5
Êlan kliăng: “Klei kâo blŭ leh anăn klei kâo mtô amâo djŏ hŏng klei blŭ thâo mĭn mnuih ôh, ƀiădah hŏng klei Yang Mngăt Jăk bi êdah leh anăn hŏng klei myang Aê Diê, čiăng kơ klei diih đăo amâo knang kơ klei thâo mĭn mnuih ôh, ƀiădah knang kơ klei myang Aê Diê.” (I Kôrantô 2:4-5)
Klei êmuh ksiêm mĭn: Si ai tiê leh anăn boh phŭn Khua ƀĭng kna Y-Pôl hiu hưn leh Klei Mrâo Mrang Jăk kơ phung Kôrantô? Ya ngă ñu ruah klei amâo yua klei blŭ êlam ôh čiăng hiu hưn? Ya klei drei khăng knang tơdah hiu hưn Klei Mrâo Mrang Jăk ?
Lŏ dơ̆ng kơ akŏ bi kah mbha kyua klei knhâo mơ̆ng lăn ala, Khua ƀĭng kna Y-Pôl mñă kơ phung đăo ti Kôrantô lŏ wĭt hlăm hruê tal êlâo ñu truh hŏng digơ̆. Wăt tơdah ñu thâo Kôrantô jing sa ƀuôn prŏng mdrŏng sah leh anăn hmăi êlam dhar kreh Grĕk, dlăng myuôm klei thâo, srăng khăp hmư̆ klei blŭ mblang kdrưh ti êngao, ƀiădah ñu nao leh hŏng digơ̆ “amâo djŏ hŏng klei blŭ êlam amâodah hŏng klei thâo mĭn ôh” (êlan 1, 4). Mklăk wĭt, ñu dôk mbĭt hŏng digơ̆ hŏng klei “jing awăt, bŏ hŏng klei huĭ leh anăn ktư̆ yơ̆ng” (êlan 3), jing hŏng klei thâo săng anei jing bruă klam mơ̆ng Aê Diê, kyua anăn brei mâo klei myang mơ̆ng Aê Diê. Ƀuôn prŏng Kôrantô amâo djŏ jing anôk tal êlâo ñu hiu hưn ôh, ƀiădah ñu ăt dưi krơ̆ng klei mgei ai tiê tơdah mtô Klei Aê Diê Blŭ tinei. Ñu ăt thâo săng kơ klei yuôm bhăn, myang mơ̆ng bruă klam jao kơ pô. Ñu ruah amâo bi êdah ti êngao ôh ƀiădah hưn mdah Klei Mrâo Mrang Jăk. Ñu ruah jing mnuih amâo hing ang ôh čiăng kơ Yang Krist mâo klei guh kơang.
Si ngă čiăng thâo kral sa čô mnuih yua klei blŭ hgăm amâodah hơăi? Brei dlăng kơ bruă ngă! Bruă ñu ngă tơdah mtô mblang ti Kôrantô jing “čiăng kơ klei diih đăo amâo knang kơ klei thâo mĭn mnuih ôh” (êlan 5). Ñu ruah amâo yua ôh klei blŭ êlam, kyua tơdah ñu yua klei blŭ êlam leh anăn jăk siam hlăm klei anei, ñu pô srăng dưi mđĭ ƀiădah kơ Pô ñu mtô srăng hgăm hĕ! Ñu ruah klei anăn kyua čiăng arăng ƀuh Klei Mrâo Mrang Jăk Aê Diê, amâo djŏ kơ ñu ôh, leh anăn Klei Mrâo Mrang Jăk klă sĭt arăng thâo, Phung Sang Aê Diê dưi mkŏ mjing hŏng klei anăn. Khua ƀĭng kna Y-Pôl bi mklă Klei Mrâo Mrang Jăk mâo mnuih thâo amâo djŏ kyua hŏng klei thâo blŭ êlam ôh. Êdei anei, hlăm kdrêč 9, ñu lač kơ bruă “jih jang klei kâo čiăng jing msĕ si jih jang mnuih, čiăng kơ hŏng jih klei anăn kâo dưi bi mtlaih đa đa hlăm phung diñu”. Klei jing hdĭp mbĭt hŏng phung pô hiu hưn Klei Mrâo Mrang Jăk čiăng kơ lu mnuih mâo klei bi mtlaih, amâo djŏ ñu lač kơ si klei hiu mtô Klei Mrâo Mrang Jăk ôh.
Hlăm hƀuê ênuk Phung Sang Aê Diê, mâo leh lu phung mtô mâo klei thâo blŭ hgăm, khădah snăn diñu amâo knang ôh hlăm klei thâo pô ƀiădah knang nanao hlăm klei myang Yang Mngăt Jăk ngă bruă hlăm ai tiê phung hmư̆. Drei hiu hưn Klei Mrâo Mrang Jăk brei mprăp leh anăn yua djăp klei thâo Aê Diê brei, ƀiădah amâo knang hlăm anăn ôh, brei knŏng knang hlăm klei myang Yang Mngăt Jăk.
Drei mkŏ mjing klei đăo pô hlăm klei thâo drei pô amâodah mơ̆ng klei myang Yang Mngăt Jăk mă bruă hlăm pô?
Wah lač: Ơ Khua Yang, akâo kơ Ih pap brei kơ kâo kyua lu blư̆ kâo knang kơ klei thâo, hră bi mklă, klei pô thâo blŭ êlam čiăng hiu hưn Klei Mrâo Mrang Jăk. Akâo kơ Ih đru kâo knang nanao kơ klei myang Yang Mngăt Jăk čiăng kơ Yang Krist mâo klei guh kơang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
