Pô Kâo Khăp Êdimi – 19/1/2023

1279

 

 

Klei Aê Diê Blŭ: Y‑Mathiơ 12:15-18

Êlan kliăng: “Nĕ anei dĭng buăl Kâo ruah leh, Pô Kâo khăp, hlăm Ñu Kâo mâo klei mơak snăk. Kâo srăng dưm Mngăt Myang Kâo ti Ñu, leh anăn Ñu srăng hưn klei Kâo phat kđi kơ phung tue” (Y‑Mathiơ 12:18)

Klei êmuh ksiêm mĭn: Leh kbiă đuĕ mơ̆ng sang bi kƀĭn, ya bruă Yêsu ngă? Khua ƀĭng kna Y‑Mathiơ lŏ yăl dliê wĭt ya mta klei dưi bi sĭt kơ bruă Khua Yang Yêsu? Ya klei dôk bi kgăn drei bi êdah klei khăp kơ phung riêng gah?

Khua Yang Yêsu thâo kơ phung Pharisi bi trông čhai duah êlan dưi bi mdjiê Ñu kyuanăn Ñu kbiă đuĕ mơ̆ng sang bi kƀĭn. Mâo lu mnuih ruă ƀuh Yêsu bi hlao mnuih krô kngan snăn digơ̆ tui hlue Ñu, leh anăn Ñu bi hlao hĕ klei ruă jih jang digơ̆. Khua Yang bi hlao klei ruă kơ phung anei kyua klei khăp, Ñu amâo čiăng digơ̆ dôk knap hlăm klei ruă duam ôh. Ƀiădah Khua Yang ghă amâo brei digơ̆ yăl dliê ôh kyuadah Ñu amâo čiăng ôh digơ̆ tui hlue Ñu knŏng kyua klei bi hlao klei ruă duam.

Khua ƀĭng kna Y‑Mathiơ mblang klei Yêsu đuĕ mơ̆ng phung Pharisi leh anăn kăm ghă phung Ñu bi hlao leh lŏ yăl dliê jing pioh bi sĭt klei Khua pô hưn êlâo Y‑Êsai hưn leh kơ knuih êdu êun, luă gŭ Yang Mêsi. Ñu mă yua Y‑Êsai 42:1-4 pioh bi êdah kơ knuih Yang Mêsi. Tal sa, Ñu jing Dĭng Buăl Aê Diê khăp êdimi, Pô Aê Diê ruah pioh ngă bruă bi tui lăn ala, leh anăn Aê Diê mơak kơ Aê Diê Anak. Tal dua, bruă Khua Yang Yêsu jing bruă mâo klei kđăm mơ̆ng Yang Mngăt Jăk. Klei anei bi sĭt leh hlăk Khua Yang Yêsu tŭ Ƀaptem (Y‑Mathiơ 3:16). Yang Mêsi jing Pô Aê Diê trôč êa ƀâo mngưi pioh kơ bruă hưn Klei Mrâo Mrang Jăk (Y‑Luk 4:18-19), hlăk Ñu ngă bruă, Ñu nao lu anôk čiăng mtô kơ Ƀuôn Ala Mtao Adiê. Tal tlâo, bruă kñăm kơ Yang Mêsi jing “Ñu srăng hưn klei Kâo (Aê Diê) phat kđi kơ phung tue.” Hlăm bruă Yêsu ngă, Ñu ba Klei Mrâo Mrang Jăk amâo djŏ knŏng kơ phung Yuđa ôh ƀiădah wăt kơ phung tue mơh.

Phung đăo kơ Krist hruê anei hưn kơ diñu pô jing dĭng buăl leh anăn anak čô Aê Diê, ƀiădah si ngă dôk bi mơak kơ Aê Diê leh mơ̆? Hdơr bĕ Aê Diê ruah drei leh kyua klei pap snăn brei drei mă bruă kơ Ñu hŏng klei hdơr knga. Brei drei gưt kơ Yang Mngăt Jăk čiăng kơ Ñu atăt gai leh anăn brei klei ktang đru drei mă bruă kơ Ñu mâo boh tŭ dưn. Akâo Aê Diê đru drei tui knuih Yang Yêsu, mă bruă hŏng klei luă gŭ, êdu êun, bi đru hdơ̆ng drei amâo djŏ pioh bi mni kơ klei drei dưi ngă leh ôh, kăn djŏ čiăng mâo klei bi mni kyua klei drei thâo săng kơ truh kơ phung ayŏng adei rei, ƀiădah bi đru hdơ̆ng drei hlăm klei dưi Khua Yang brei. Msĕ mơh, akâo Khua Yang đru drei dưi hŏng klei mĭn mă kơ pô leh anăn găn jih klei bi kgăn čiăng drei dưi mă bruă kơ jih jang mnuih amâo mâo bi kah sa čô pô hlei ôh. Kyua klei mĭn mă kơ pô leh anăn klei čuôt klih yơh bi kgăn phung Yuđa khăp leh anăn đru phung tue, leh anăn kăn diñu dưi hưn anăn Aê Diê kơ phung găp djuê riêng diñu rei.

Si ngă drei dôk hdĭp bi mơak kơ Aê Diê, Pô ruah leh anăn bi tui leh drei mơ̆?

Wal lač: Ơ Khua yang, đru kâo thâo hdơr knga kơ Ih nanao, hdĭp thâo bi mơak kơ Ih, dôk dơ̆ng ƀơ̆ng huă jăk hŏng phung riêng gah, čiăng hŏng klei anăn kâo dưi hưn Klei Mrâo Mrang Jăk Ih kơ jih jang mnuih.

Dlăng Klei Aê Diê Blŭ hlăm tlâo thŭn: Y‑Êskiêl 11:6–12:28

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcTus Tubtxib Uas Kuv Xaiv Tseg – 19/1/2023
Bài tiếp theoNgười Mà Ta Rất Yêu Dấu – 19/1/2023