Mathais 12:15-18
Nqe cim
“Tus no yog Kuv tus tubtxib uas Kuv xaiv tseg lawm, Kuv hlub Nws thiab Kuv txaus siab rau Nws, Kuv yuav tso Kuv tus Ntsujplig los rau saum Nws, thiab Nws yuav qhia Kuv txojkev ncaj ncees rau txhua haivneeg paub” (Mathais 12:18).
Lus nug rau sawvdaws xav:
- Tomqab uas tawm hauv tsev sablaj mus lawm, Tswv Yexus ua dabtsi?
- Timthawj Mathais hais txog tej yam twg muaj tiav hauv Tswv Yexus tes
haujlwm?
- Yam dabtsi tav peb txojkev hlub lwm tus ibncig?
Tswv Yexus paub hais tias cov Falixais tuav tswvyim muab Nws tua povtseg, Nws thiaj tawm hauv tsev sablaj mus lawm. Muaj coob tug raug mob pom Tswv Yexus kho tus txivneej qhuav tes zoo, lawv thiaj raws Nws qab, thiab Nws kho lawv txhua tus zoo mob huv tibsi. Tus Tswv kho lawv tej mob vim Nws hlub lawv, Nws tsis xav kom lawv txomnyem vim kev mob kev nkeeg. Tiamsis Nws txwv tsis pub lawv mus qhia lwm tus vim Nws tsis xav kom sawvdaws raws Nws qab vim yog xav tau kho zoo mob xwb.
Timthawj Mathais txhais qhov uas Tswv Yexus khiav tawm ntawm cov Falixais mus thiab txwv cov neeg tau kho zoo mob mus qhia rau lwm tus yog ua tiav raws li tus cevlus Yaxayas tej lus cev tseg txog Tus Mexiyas nplooj siab hlub, kev txo hwjchim. Mathais siv tej lus hauv Yaxayas 42:1- 4 los hais txog tej yam tshwjxeeb ntawm Tus Mexiyas. Qhov xubthawj, Nws yog Tus tubtxib uas Vajtswv hlub, tau xaiv los ua tes haujlwm cawm tibneeg dim, thiab Vaj Leej Txiv txaus siab rau Vaj Leej Tub. Tim ob, Tswv Yexus tes haujlwm tau Vaj Ntsujplig ua timkhawv, qhov no muaj tiav thaum Tswv Yexus ua Kevcai Raus Dej (Mathais 3:16). Tus Mexiyas yog tus tau ywg roj tsa los ua tes haujlwm tshajtawm Txojmoo Zoo (Lukas 4:18-19), nyob rau ntu sijhawm ua haujlwm, Nws mus txhua qhov txhia chaw qhia txog Tebchaws Ceebtsheej. Tim peb, Tus Mexiyas lub luag haujlwm yog “qhia… txojkev ncaj ncees rau txhua haivneeg paub.” Nyob hauv Tswv Yexus lub luag haujlwm, Nws tsis yog tsuas coj Txojmoo Zoo rau cov neeg Yudais xwb, Nws tseem coj rau lwm haivneeg thiab.
Niaj hnub nimno cov ntseeg qhuas hais tias lawv yog tus Tswv cov tubtxib, yog tus Tswv cov menyuam, tiamsis peb puas tau ua rau tus Tswv txaus siab lawm tau? Yuav tsum nco ntsoov hais tias peb tau tus Tswv xaiv los ntawm Nws txojkev hlub thiab peb yuav tsum ua Nws haujlwm los ntawm lub siab nco Nws txiajntsig. Peb yuav tsum hwm Vaj Ntsujplig, cia Nws taw kev thiab pub hwjchim rau peb ua tus Tswv tes haujlwm tawg paj txi txiv. Thov Vajtswv pab kom peb kawm tau Tswv Yexus tus qauv, ua haujlwm los ntawm nplooj siab hlub, txo hwjchim, sib pab tsis yog ua kom luag qhuas, lossis xav kom luag nco yus txiajntsig tiamsis yog vim hlub tshua lwm tus, thiab txawj sib pab raws li peevxwm uas tus Tswv muab rau yus. Kuj thov Vajtswv pab peb kovyeej kev xaiv ntsej muag thiab hla dhau tej yam tav txojhau kev kom ua tau haujlwm rau txhua tus, tsis xaiv leejtwg ntsejmuag. Kev xaiv ntsejmuag thiab kev qia dub thaiv cov Yudais qhia tshwm txojkev hlub, kev pab cov uas yog lwm haivneeg, thiab lawv kuj tsis qhia txog Vajtswv rau lwm haivneeg ibncig paub.
Thov Vajtswv
Tus Tswv, thov pab kom nyuam yaus niaj hnub nco Koj txiaj ntsig, ua neej haum Koj siab, ua zoo rau lwm tus ibncig, kom dhau tej ntawd nyuam yaus qhia tau Txojmoo Zoo rau lwm tus. Amees.
Peb puas tabtom ua haum tus Tswv uas xaiv thiab cawm peb dim lub siab lawm tau?
Nyeem Vajluskub hauv peb lub xyoos: Exekees 11:6-12:28
Kênh Youtube BHKTHN:
