Blŭng a 3:6-8
“Bơngai drŏ-kăn lăng ‘bôh plei ‘long noh rŏ kơ sa ‘lơ̆ng nham, na kư̆m lăp măt păng gĭtb yua kơ wă pơih kơ̆l ‘ngok hơgei na phĕ sa; đơ̆ng noh na ăn kơ klo sư sa, mă oei jê̆ sư. Klo sư kư̆m sa mơ̆n.” (Blŭng a 3:6)
Nơ̆r jet tơchĕng pơwao:
– ‘Bơ̆t anăp yang kơnê̆ pơhlŭ, kon bơngai bơ̆n đei pơm tơdrong kiơ?
– Đơ̆ng rŏng kơ sa plei ‘long “ưh kơ trŏ kơ sa”, đei tơdrong kiơ truh?
– Lu bơ̆n đei pơhrăm iŏk tơdrong kiơ gah kon bơngai pơ̆k huŏng lăm tơdrong pơhlŭ?
‘Bơ̆t anăp yang kơnê̆ pơhlŭ gah sa plei ‘long mă Kră Yang đei khă găn, “Bơngai drŏ-kăn lăng ‘bôh plei ‘long noh rŏ kơ sa ‘lơ̆ng nham, na kư̆m lăp măt păng gĭtb yua kơ wă pơih kơ̆l ‘ngok hơgei” (trong 6a)
Lăm jơphŭt noh, yă Ê-wơ jê̆ ‘maih sa yua kơ plei noh lăng ‘lơ̆ng, păng nham, gĭt wă pơih kơ̆l angok hơgei, sư tơchĕng sa plei ‘long noh tơdrong hơgei sư gô kơjung hloh dơ̆ng. Thoi noh yă Ê-wơ đei pơm kiơ̆ thoi tơdrong sư wă kơdih: na phĕ sa; đơ̆ng noh na ăn kơ klo sư sa, mă oei jê̆ sư. Klo sư kư̆m sa mơ̆n.”(trong 6b). Thoi noh, yă Ê-wơ đei pơ̆k huŏng kiơ̆ thoi yang kơnê̆ đei pơhlŭ hloi bơih păng pơm yoch. ‘bok A-đam “dơ̆ngh bơ̆t jê̆” akăn sư, trŏ kơ sư pơgơ̆r hnam dơnŏ, kăl kơ pơgăn păng chông anhăk akăn sư kiơ̆ thoi Kră Yang wă, mă lei tă kơ mơ̆ng nơ̆r akăn sư nă kư̆m dai pơm yoch hloi mơ̆n.
Đơ̆ng rŏng kơ sa plei ‘long noh, “Đơ̆ng noh na măt măr sư lar, băt kơdih tơlŭnh akâu hoh” (trong 7). Hơdrol kơ đei pơ̆k huŏng, măr sư akâu hoh mă lei ưh kơ đei mơlâu yua kơ măr sư ‘lơ̆ng rơgoh, ưh kơ đei tơdrong kơnê̆. Mă lei đơ̆ng rŏng kơ pơ̆k huŏng lăm tơdrong yoch, măr sư lăng akâu jăn măr sư pha ra bơih. Lăng ‘bơ̆t yơ kư̆m dai kơnê̆ na chă dôm tơdrong wă kơ gơh klơ̆p lê̆, hli kơ bơngai nai lăng ‘bôh tơdrong tơpă lăm akâu jăn kơdih akâu. Trŏ kơ đei arih sơng iŏk pŭn hiôk đơ̆ng ‘Bok Kei-Dei ăn, dang ei kon bơngai lăng kơnê̆ păng hli tơrơ. Ưh kơ sĭ lăng akâu kơdih hli tơrơ, lu sư kư̆m hli kơdơ̆ng bơ̆t anăp Kră Yang. Trŏ kơ hiôk chơt tơ’bưh hăm Kră Yang, mă lei jơ âu kơ tơ̆ng nơ̆r Kră Yang lu sư chă ôn akâu kơdih wă kơ hơtaih đơ̆ng Kră Yang (trong 8). Yua kơ tơdrong yoch lu sư ưh kơ gơh dơ̆ng bơ̆t anăp ‘Bok Kei-Dei.
Tơdrong pơ̆k huŏng đơ̆ng ‘bok A-đam păng yă Ê-wơ tơ’bôh tơbăt ăn kơ bơ̆n kơplah arih kiơ̆ Kră Yang thoi âu; đĭ đăng dôm tơdrong pơhlŭ lăm teh đak âu noh jơ̆ ba ăn kơ tơdrong ‘maih wă lu bơ̆n. Tơdah lu bơ̆n lăng tơdrong tơ’bưh hăm Kră Yang noh tôm mah, đei Kră Yang noh jơ̆ đei tôm tơdrong lei yang kơnê̆ gô chă trong dui ba bơ̆n pơ̆k huŏng pơm yoch. Đơ̆ng blŭng a, trŏ kơ bơngai pơ̆k huŏng blŭng a noh jơ̆ ‘bok A-đa ră, Ê-wa đei roi tơdrong sư hăm Sa-tan thoi yơ bơ̆t anăp ‘Bok Kei-Dei. Mă lei tă kơ măr sư đei pơma dơnuh hăm Sa-tan tơdrong măr sư hăm ‘Bok Kei-Dei, na tuch luch ba ăn noh jơ̆ tơdrong pơ̆k huŏng răm băm. Apinh ‘Bok Kei-Dei ăn kơ bơ̆n gơh lăp đon kơ tơdrong tơ’bưh hăm ‘Bok Kei-Dei păng dôm tơdrong song ăn đơ̆ng Sư wă kơ bơ̆n kĕ jei đơ̆ng dôm tơdrong pơhlŭ đơ̆ng yang kơnê̆.
Ơ Kră Yang, Arih đon lui lăm chăl arih âu đei lơ tơdrong pơhlŭ tăp dăr. Yang kơnê̆ chă lơ trong wă dui ba inh ataih đơ̆ng Ih. Apinh Ih tơgŭm inh băt kơ kơdâu tơ Ih hơdrol hloh ‘nĕ kơ ăn inh pơm kiơ̆ thoi jơhngơ̆m kơdih wă. Apinh Ih ăn kơ inh Yang Bơhngol ‘Lơ̆ng tơgŭm inh băt gơnang kơ Ih, păng gơnang kơ tơdrong mơsêh pran đơ̆ng Ih wă kơ kĕ jei dôm tơdrong yang kơnê̆ pơhlŭ. Yua anăn Kră Yang Yêsu Krist. Amen
Lu bơ̆n pơm thoi yơ wă kơ huei kơ bơm thoi yă Ê-wơ đei pơ̆k huŏng lăm tơdrong pơhlŭ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 74-75
Kênh Youtube BHKTHN:
