Klei Aê Diê Blŭ: Klei Mphŭn Dơ̆ng 3:6-8
Êlan kliăng: “Snăn tơdah mniê ƀuh boh ana kyâo anăn jăk ƀơ̆ng, mơak dlăng, leh anăn yuôm dưi brei klei thâo mĭn, ñu pĕ boh ana kyâo anăn leh anăn ƀơ̆ng, ñu brei mơh kơ ung ñu dôk giăm ñu, leh anăn gơ̆ ƀơ̆ng” (Klei Mphŭn Dơ̆ng 3:6)
Klei êmuh ksiêm mĭn: Ti anăp klei yang jhat mplư, si ngă anak mnuih ngă leh? Leh ƀơ̆ng “boh Aê Diê ghă”, ya klei truh leh kơ diñu? Ya klei hriăm drei mâo mơ̆ng klei mphŭn mâo kơ klei mnuih lĕ hlăm klei mplư?
Dôk ti anăp klei yang jhat mplư brei ƀơ̆ng boh Aê Diê ghă, “mniê ƀuh boh ana kyâo anăn jăk ƀơ̆ng, mơak dlăng, leh anăn yuôm dưi brei klei thâo mĭn” (êlan 6a).
Hlăm mnĭt mmông anăn, H’Êwơ knŏng čiăng pĕ ƀơ̆ng mtam kyuadah boh anăn jăk ƀơ̆ng, mơak dlăng, leh anăn čiăng dưi mâo klei thâo mĭn, kyuadah tơdah leh ƀơ̆ng boh anăn srăng mâo klei thâo mĭn kdlưn hĭn. Snăn ñu ngă mtam tui si klei bi kčŭt hlăm ai tiê ñu: “pĕ boh ana kyâo anăn leh anăn ƀơ̆ng, ñu brei mơh kơ ung ñu dôk giăm ñu, leh anăn gơ̆ ƀơ̆ng” (êlan 6b). Snăn yơh, H’Êwơ lĕ kơ yang jhat kluôm dhuôm leh anăn ñu ngă soh. Y-Ađam “dôk giăm” mô̆ ñu, hrô kơ klei jing sa čô pô gĭt gai gŏ sang, kăp ghă leh anăn bi hriăm mô̆ ñu gưt tui si klei Aê Diê čiăng, ñu lĕ lŏ gưt hĕ asăp kơ mô̆ leh anăn ngă soh msĕ mơh.
Leh ƀơ̆ng boh kăm, “ală jih diñu dua pŏk mblang mtam, thâo kral diñu dôk lưng mlŭn” (êlan 7). Êlâo kơ ngă soh, diñu dua dôk lưng mlŭn ƀiădah amâo mâo klei hêñ ôh kyuadah diñu jing êngeh, doh jăk, amâo mâo sa mta klei jhat ôh. Ƀiădah tơdah leh ngă soh, klei diñu dlăng kơ diñu pô jing mdê yơh. Dlăng kơ diñu pô djăp anôk jing jhat sơăi leh anăn duah êlan čiăng guôm hĕ asei mlei diñu, huĭdah pô mkăn ƀuh hĕ mnuih sĭt diñu. Hrô kơ klei hdĭp mơak hlăm klei jăk jĭn Aê Diê brei, ară anei anak mnuih ƀuh knŏng klei jhat leh anăn huĭ. Amâo djŏ knŏng diñu huĭ tơdah dlăng kơ diñu pô ôh, ƀiădah wăt diñu huĭ mơh tơdah bi tlă anăp hŏng Aê Diê. Hrô kơ klei hơ̆k mơak dôk hlăm klei bi mguôp hŏng Aê Diê, ară anei tơdah hmư̆ asăp Aê Diê iêô, diñu duah êlan đuĕ dăp kơ Gơ̆ (êlan 8). Klei ƀuh kơ diñu jing soh leh ngă kơ diñu amâo jhŏng dôk ti anăp Aê Diê ôh.
Klei Y-Ađam leh anăn H’Êwơ lĕ hlăm klei mplư čiăng brei phung đăo drei răng: jih jang klei mplư hlăm lăn ala anei srăng mplư djŏ kơ klei kđeh tluh sơăi. Tơdah drei amâo ƀuh ôh klei bi mguôp hŏng Aê Diê jing djăp, leh anăn mâo Ñu jing mâo jih jang, snăn yang jhat srăng duah êlan đoh ktŭng drei ngă soh. Dơ̆ng mơ̆ng êlâo, tơdah tŭ klei mplư tui si djŏ Y-Ađam leh anăn H’Êwơ srăng hưn kơ Aê Diê klei diñu mâo hŏng Satan. Ƀiădah lĕ diñu hưn kơ Satan klei diñu mâo hŏng Aê Diê, kyuanăn boh knhal tuč diñu amâo dưi tlaih ôh kơ klei lĕ kluôm dhuôm. Akâo Khua Yang đru drei hdĭp mơak nanao hlăm klei bi mguôp hŏng Ñu leh anăn knang kjăp kơ Ñu čiăng drei dưi hŏng klei yang jhat mplư.
Ya srăng ngă čiăng kơ drei amâo lŏ ngă ôh klei soh msĕ si H’Êwơ tơdah mâo klei mplư?
Wah lač: Ơ Khua Yang, hdĭp hŏng klei đăo ti krah phung amâo đăo ôh mâo lu klei mplư wang jŭm dar kâo. Yang jhat duah djăp êlan čiăng đoh ktŭng kâo đuĕ kbưi mơ̆ng Ih. Đru kâo êran hriê kơ Ih êlâo hĭn hrô kơ klei ngă tui si klei bi kčŭt hlăm ai tiê kâo pô. Akâo kơ Yang Mngăt Jăk đru kâo thâo knang kơ Ih, leh anăn knang kơ klei ktang Ih čiăng dưi hŏng klei yang jhat mplư. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 74-75
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
