II-Kevcai 12:15-27
Nqe cim:
“Cov kwvtij, Vajtswv hlub peb kawg nkaus li, yog li ntawd kuv thiaj ntuas nej hais tias thaum nej tseem ua neej nyob no, nej yuav tsum muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam” (Loos 12:1).
Lus nug rau sawvdaws xav:
- Mauxes qhia hais tias leejtwg tau cai noj nqaij thiab noj rau qhov chaw twg?
- Vim licas tus Tswv haivneeg tsis tau cai noj ntshav?
- Cov khoom ib feem kaum, tus Tswv haivneeg yuav tsum noj nrog leejtwg thiab tsuas tau noj rau qhov chaw twg xwb?
- Peb pehawm Vajtswv los ntawm peb lub neej zoo licas?
Ib tsoom cov mloog txhua tus,
Hauv ntu Vajluskub no, Mauxes qhia ntxiv tej uas tus Tswv haivneeg tau cai ua thiab tej uas lawv tseg tsis txhob ua. Hais txog noj tej tsiaj cov nqaij, tus neeg dawbhuv thiab tsis dawbhuv los puavleej tau cai noj nyob hauv tej nroog tsuav yog lawv nyiam noj. Tiamsis thaum tua cov tsiaj ntawd, tus Tswv haivneeg yuav tsum muab cov ntshav hliv povtseg ib yam li hliv dej. Raws li Vajluskub qhia, txhua yam uas ciaj sia, txojsia nyob hauv cov ntshav (Levis Kevcai 17:11, 14), rau qhov txojsia yog Vajtswv pub, txojsia yuav rov mus cuag Vajtswv, thiaj muab piv rau tes haujlwm muab cov ntshav hliv ib yam hliv dej raws li txoj kevcai qhia. Hais txog ib feem kaum ntawm tej qoobloo, cawv txiv hmab, roj ntoo thiab thawj tus menyuam ntawm tej tsiaj txhu, tus Tswv haivneeg nrog rau lawv tej menyuam, tub mab tubqhe thiab cov neeg Levis yuav tsum noj tej khoom fij zoo siab ntawm qhov chaw uas Vajtswv xaiv tseg tabmeeg tus Tswv vim lawv tau tej ntawd noj. Qhov ntawd piv txog cov ntseeg Yexus txojkev sib raug zoo nrog Vajtswv. Dhau ntawd, Mauxes kuj qhia cov neeg Yixalayees yuav tsum pub rau cov neeg Levis noj vim lawv tsis muaj teej tug, tsis muaj qoob loo sau.
Ntu Vajluskub no qhia paub txog kev pehawm tus Tswv ntawm tib qhov chaw, nrog rau tej kevcai uas Nws qhia tseg ntsigtxog tus Tswv haivneeg lub neej, kev pehawm, kev fij khoom, kev noj haus, kev ua haujlwm, kev hlub tej tub mab tubqhe, thiab cov neeg Levis uas ua Vajtswv haujlwm hauv lawv lub nroog.
Nimno, txojkev pehawm tsis yog nyob ntawm Tuamtsev nkaus xwb. Tsis yog Vajtswv tsuas saib yam uas peb hais thiab ua hauv hnub kaj xwb, tiamsis Nws tseem saib txhua yam hauv peb lub neej txhua hnub thiab. Tus Tswv xav kom peb ua neej qhia tawm txojkev ntseeg, lossis muab ua lwm seem hais, peb yuav tsum pehawm Vajtswv tagnrho peb lub neej. Ib qhov uas peb muaj ntau leej ua yog thaum mus pehawm tom Tuamtsev mas peb zoo li ib tug neeg muaj kev ntseeg, txo hwjchim, ua ntau yam haujlwm pab Pawg Ntseeg thiab coob leej nyiam, tiamsis thaum rov los ua neej hauv tsev, ntawm chaw ua haujlwm… peb ua lub neej txawv tsis thooj li tom Tuamtsev. Yog peb txojkev pehawm Vajtswv tsuas nyob tom Tuamtsev xwb, txhua hnub hauv ib lub limtiam peb ua neej raws li yus lub siab nyiam xwb peb yeej tsis pehawm Vajtswv tiag tiag, peb tsuas lam ua raws kablig kevcai ntseeg xwb.
Thov Vajtswv,
Tus Tswv, nyuam yaus thov ua yam khoom dawbhuv uas haum Koj siab fij rau Koj. Thov Koj pab nyuam yaus txawm yog nyob hauv Tuamtsev lossis qhov chaw twg los xijpeem, nyuam yaus yuav ua raws li Koj nyiam thiaj ua rau Koj tau ntsejmuag. Amees.
Ib tsoom cov mloog uas hmov thiab tshua,
Puas muaj yam peb yuav tau hloov hauv lub neej pehawm Vajtswv?
Nyeem Vajluskub hauv peb lub xyoo: Nehemis 7:4-60
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
