Klei Aê Diê Blŭ: Klei Mtô Mñă Klei Bhiăn 12:15-27
Êlan kliăng: “Phung ayŏng adei, kâo kwưh kơ diih kyua klei Aê Diê pap, myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê.” (Rôm 12:1).
Klei êmuh ksiêm mĭn: Y‑Môis mtô mtă kơ hlei pô dưi ƀơ̆ng čĭm leh anăn ti anôk ƀơ̆ng? Si ngă phung ƀuôn sang Aê Diê amâo dưi ƀơ̆ng êrah ôh? Mnơ̆ng jia sa kdrêč hlăm pluh brei phung ƀuôn sang Aê Diê ƀơ̆ng mbĭt hŏng hlei pô leh anăn knŏng ti anôk dưi ƀơ̆ng? Hŏng si klei hdĭp drei kkuh mpŭ kơ Aê Diê?
Hlăm trăn anei, Y‑Môis lŏ mblang čêč drêč đơ mta klei phung ƀuôn sang Aê Diê dưi ngă leh anăn amâo dưi ngă ôh. Kơ klei ƀơ̆ng čĭm hlô mnơ̆ng, pô doh leh anăn pô čhŏ dưi ƀơ̆ng msĕ sơăi hlăm ƀuôn diñu čiăng. Ƀiădah tơdah bi mdjiê hlô mnơ̆ng, brei phung ƀuôn sang tuh êrah ti lăn msĕ si êa. Tui si Klei Aê Diê Blŭ, klei hdĭp kđeh dôk hlăm êrah (Bruă Lêwi 17:11, 14), kyuadah ya dŏ Aê Diê brei snăn lŏ wĭt kơ Ñu. Klei mĭn anei ngă klei bi hmô hŏng bruă tuh êrah ti lăn djŏ tui si klei bhiăn. Bi kơ dŭm mta jia sa kdrêč hlăm pluh msĕ si mdiê, kpiê, êa prăi boh ôliwơ, leh anăn êđai êmô tal êlâo amâodah êđai biăp tal êlâo, brei phung ƀuôn sang Ñu ƀơ̆ng huă mnơ̆ng anăn ti anăp Yêhôwa Aê Diê hlăm anôk Yêhôwa srăng ruah, mbĭt hŏng anak êkei, anak mniê, dĭng buăl êkei leh anăn dĭng buăl mniê, leh anăn phung Lêwi, hơ̆k mơak ti anăp Yêhôwa Aê Diê kyua mâo boh mnga mơ̆ng bruă diñu ngă. Klei anei bi êdah kơ klei bi mguôp hŏng Aê Diê ƀiădah knŏng hlei pô đăo kơ Ñu kơh dưi mâo klei pap anei. Êngao kơnăn, Y‑Môis ăt mñă kơ phung ƀuôn sang Israel đăm lui tha phung Lêwi ôh kyuadah diñu amâo mâo ngăn dưn ôh.
Trăn Klei Aê Diê Blŭ anei brei ƀuh hlăm klei kkuh mpŭ kơ Aê Diê êngao kơ klei bi kdriêl anôk ala mbĭt hŏng hdră bhiăn ngă ăt brei bi djŏ hŏng kluôm klei hdĭp phung ƀuôn sang Aê Diê mơh, dơ̆ng mơ̆ng klei kkuh mpŭ bi djŏ truh kơ klei myơr bi djŏ, klei ƀơ̆ng huă bi djŏ, wăt klei bi êdah ai tiê thâo khăp kơ phung dĭng buăl êkei dĭng buăl mniê, leh anăn wăt hŏng phung Lêwi mă bruă kơ Aê Diê dôk hlăm ƀuôn pô.
Hruê anei, klei kkuh mpŭ kơ Aê Diê amâo djŏ knŏng bi kdriêl hlăm Sang Aê Diê ôh. Aê Diê amâo mđing uêñ kơ klei drei blŭ leh anăn bruă drei ngă knŏng hlăm Hruê Kjuh ôh, ƀiădah Ñu mđing dlăng kơ klei hdĭp drei wăt hlăm jih hruê mkăn mơh. Klei ƀuh sĭt dôk lar ară anei, lu mnuih hlăm phung drei nao Sang Aê Diê, dôk hlăm Sang Aê Diê bi êdah knuih huĭ mpŭ yơh, ngă lu mta bruă hlăm Sang Aê Diê leh anăn mă ai lu mnuih. Ƀiădah tơdah lŏ wĭt kơ klei hdĭp grăp hruê hlăm sang, hlăm anôk mă bruă… klei hdĭp dôk dơ̆ng ƀơ̆ng huă jing hĕ mdê kluôm dhuôm. Tơdah klei drei kkuh mpŭ bi kdriêl knhal knŏng hlăm Sang Aê Diê, bi hruê adôk mkăn hlăm hruê kăm hdĭp tui si čiăng klei anăn pia amâo djŏ klei kkuh mpŭ sĭt ôh ƀiădah knŏng bi leh hdră klei bhiăn hŏng klei amâo thâo săng.
Ya mta klei brei drei bi mlih hlăm klei hdĭp kkuh mpŭ kơ Khua Yang?
Wah lač: Ơ Khua Yang, kâo čiăng jing mnơ̆ng ngă yang hdĭp leh anăn doh jăk myơr kơ Ih. Akâo kơ Ih đru kâo thâodah hlăm Sang Aê Diê amâodah ti anôk kâo dôk, kâo ăt hdĭp djŏ tui si klei Ih mtô čiăng kơ Anăn Khua Yang dưi mâo klei guh kơang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 7:4-60
Kênh Youtube BHKTHN:
