II Thexalaunikes 3:6-10
Nqe cim:
“Thaum peb tseem nrog nej nyob, peb qhia rau nej hais tias yog leejtwg tsis kam ua haujlwm, nej tsis txhob pub mov rau tus ntawd noj.” (II Thexalaunikes 3:10)
Lus nug rau sawvdaws xav:
– Vim li cas Timthawj Paulus ntuas kom yuav tsum qaij deb “cov neeg tub nkeeg”?
– Cov ntseeg cheemtsum kawm yam dabtsi ntawm Timthawj Paulus thiab nws cov phoojywg?
– Peb kawm tau dabtsi hais txog kev nquag ua haujlwm?
Tomqab uas txhawb cov ntseeg hauv nroog Thexalaunikes kom yuav tsum hlub tus Tswv, ua siab ntev. Timthawj Paulus ntuas lawv hais tias “tsis txhob mus nrog cov neeg tub nkeeg ua ke”. Nov yog cov neeg tsis paub ua lawv feem xyuam, tsis ua haujlwm, tsis yoog cai tswj. Lawv hais tias twb yuav txog lub sijhawm tus Tswv los lawm, yog li tsis tsum ua haujlwm tsuas nyob tos lwm tus txojkev pab lawm xwb!
Timthawj Paulus qhia paub kev ua neej “yeej tsis nkees” ntawm cov timthawj ua tus qauv rau cov ntseeg ntsia thiab xyaum ua raws. Txawm yog cov timthawj thiab cov neeg ua Vajtswv haujlwm los lawv yeej “tsis tos leejtwg yug”, lub ntsiab tiag yog tsis “vam noj luag li”, lawv “niaj hnub niaj hmo siv zog ua haujlwm...kom nej cov thiaj tsis muaj ib tug ntxhov siab rau peb.” (nqe 7-8). Thaum fij tagnrho lub sijhawm ua Vajtswv haujlwm, cov timthawj muaj cai “hais kom yug”. Tiamsis thaum Vajtswv tes haujlwm so, Paulus, Xilas thiab Timautes yeej tseem mus ua haujlwm nrhiav noj haus rau tus kheej. Lawv xav kom cov ntseeg xyaum lawv tus qauv nquag ua haujlwm. Timthawj Paulus hais hnyav tias, “yog leejtwg tsis kam ua haujlwm, nej tsis txhob pub mov rau tus ntawd noj.” (nqe 10). Vajtswv cov menyuam yeej ua haujlwm, yuav tsum nquag ua haujlwm kom tau txais nqi zog thiab ua Vajtswv haujlwm kom Nws tau ntsejmuag.
Muab ntu Vajluskub no los piv rau Mathais 6:11 “Thov Koj pub mov rau peb muaj noj hnub no”, peb pom tau tias Vajtswv ua tabpov yug Nws cov menyuam txhua hnub. Daviv kuj hais tias: “kuv tsis pom tus Tswv muab ib tug neeg zoo tso povtseg rau qhov twg, lossis cia nws tej menyuam mus thov khawv noj.” (Phau Ntawv Nkauj 37:25). Tsis yog peb siv tus Tswv txoj koob hmoov tsis muaj nqis, tub nkeeg nyob tos lwm tus pub noj. Yexus Khetos yuav los lub sijhawm twg peb tsis paub, yog li peb tsis txhob yig haujlwm, ua neeg tub nkeeg tsis ua haujlwm, tsis muaj homphiaj rau lub neej nyob tos tus Tswv rov los. Nyob li no yog ua neej yuam kev lawm, rau qhov txojkev tub nkeeg, tsis ua haujlwm yoojyim coj peb mus rau txojkev txhaum. Vajtswv Txojlus qhia kom peb yuav tsum siv lub peevxwm, sijhawm los ua haujlwm rau tus kheej thiab tsevneeg. So kom yog lub sijhawm so, thiab ua thaum uas yog lub sijhawm ua haujlwm.
Thov Vajtswv,
Peb Leej Txiv tus uas muaj kev hlub saib xyuas nyuam yaus lub neej. Thov Koj ntuas qhia kom nyuam yaus tsis txhob ua neeg tub nkeeg tos lwm tus ua rau noj, tiamsis nquag ua haujlwm kom tus Tswv Koj foom koob hmoov rau nyuam yaus thiab tsevneeg, ua qauv zoo pub rau lwm tus. Nyuam yaus tuav Tswv Yexus lub npe thov, Amees.
Peb siv lub sijhawm thaum tseem ua neej nyob hauv lub ntiajteb no los ua tus Tswv haujlwm zoo li cas?
Nyeem Vajluskub hauv peb lub xyoo: Yauhas 20
Kênh Youtube BHKTHN:
