Klei Aê Diê Blŭ: II Têsalônik 3:6-10
Êlan kliăng: “Kyuadah wăt êjai hmei dôk mbĭt hŏng diih, hmei mtă leh kơ diih klei anei: tơdah sa čô amâo čiăng mă bruă ôh, đăm brei ñu huă ôh” (II Têsalônik 3:10).
Klei êmuh ksiêm mĭn: Ya ngă Khua ƀĭng kna Y‑Pôl mtă brei đuĕ dôk mdê mơ̆ng “phung ayŏng adei bi rŭng”? Ya klei brei phung bi đru đăo hriăm mơ̆ng Khua ƀĭng kna Y‑Pôl leh anăn phung mă bruă mbĭt hŏng ñu? Ya klei bi hriăm drei mâo kơ klei hur har mă bruă?
Leh mtrŭt phung đăo ti ƀuôn Têsalônik khăp kơ Khua Yang nanao, gĭr hlăm djăp mta klei truh, Khua ƀĭng kna Y‑Pôl mtă kơ digơ̆ “đuĕ dôk mdê mơ̆ng phung ayŏng adei bi rŭng”. Anăn jing phung amâo mâo thâo uêñ, hdĭp plă plia, amâo mâo klei bhiăn ôh. Diñu lač Khua Yang dơ̆ng lŏ hriê leh kyuanăn amâo čiăng mă bruă ôh ƀiădah hdĭp knang kơ phung dôk mă bruă đru mtrah!
Khua ƀĭng kna Y‑Pôl brei thâo klei dôk dơ̆ng “amâo bi rŭng ôh” mơ̆ng phung khua ƀĭng kna jing klei bi hmô klă čiăng kơ phung đăo dưi dlăng leh anăn tui. Wăt tơdah jing phung khua ƀĭng kna leh anăn jing phung mă bruă kơ Aê Diê ƀiădah diñu amâo tuôm “ƀơ̆ng kpŭng arăng hơăi mang ôh”, klei mblang phŭn jing “ƀơ̆ng gam”, digơ̆ “hruê mlam mă bruă suăi, amâo čiăng bi ktrŏ sa čô” hlăm phung ayŏng adei ôh (êlan 7-8). Tơdah myơr kluôm dhuôm mmông pioh mă bruă kơ Aê Diê, phung khua ƀĭng kna dưi mâo klei arăng čiêm rông kyua Klei Mrâo Mrang Jăk. Ƀiădah êngao kơ klei mă bruă kơ Khua Yang, Y‑Pôl, Y‑Silas leh anăn Y‑Timôthê ăt mă bruă čiăng mâo mnơ̆ng ƀơ̆ng huă kơ digơ̆ pô. Digơ̆ čiăng phung đăo tui klei digơ̆ kriăng mă bruă. Khua ƀĭng kna Y‑Pôl blŭ ktrŏ snei, “tơdah sa čô amâo čiăng mă bruă ôh, đăm brei ñu huă ôh” (êlan 10). Phung đăo srăng mă bruă hŏng klei kriăng čiăng dưi dưn boh mơ̆ng bruă kngan ñu, leh anăn pioh mă bruă kơ Aê Diê, bi guh kơang kơ Anăn Ñu.
Bi djŏ trăn Klei Aê Diê Blŭ anei hŏng Y‑Mathiơ 6:11, “Brei kơ hmei mnơ̆ng ƀơ̆ng huă bi djăp kơ grăp hruê”, drei ƀuh Aê Diê ƀuăn rơ̆ng čiêm rông phung ƀuôn sang Ñu grăp hruê. Mtao Y‑Đawit msĕ mơh lač snei, “Kâo jing leh hlăk ai, ară anei kâo mduôn leh; ƀiădah kâo amâo tuôm ƀuh ôh arăng lui hĕ pô kpă, amâodah ƀuh phung anak ñu hiu dan akâo mnơ̆ng ƀơ̆ng huă” (Klei Mmuñ Hđăp 37:25). Ƀiădah đăm brei drei mjhua klei jăk Aê Diê ôh, alah amâo čiăng mă bruă ôh knŏng dôk guôn mnơ̆ng pô mkăn brei. Wăt tơdah Yang Krist srăng lŏ hriê djăl dưn, kăn drei dưi hngah rei kơ jih jang bruă klam, alah amâo čiăng mă bruă ôh, amâo mâo hdră ôh kơ hruê êdei anăp, knŏng dôk guôn Khua Yang lŏ hriê. Anăn jing klei hdĭp soh, kyua klei alah knŏng dôk hmăng, amâo čiăng mă bruă ôh ênưih snăk atăt drei kơ klei ngă soh. Bi klăk hŏng klei anăn, Klei Aê Diê Blŭ mtă brei drei thâo yua klei thâo leh anăn mmông ngă bi jăk jih jang bruă drei dưi ngă čiăng mâo mnơ̆ng ƀơ̆ng huă kơ drei pô leh anăn kơ mnuih hlăm gŏ sang drei, mmông mdei drei mdei, mmông mă bruă drei mă bruă.
Si ngă drei yua hruê mmông drei dôk hdĭp ti lăn ala anei pioh mă bruă kơ drei pô leh anăn kơ Khua Yang?
Wah lač: Ơ Khua Yang, Ama bŏ hŏng klei khăp răng kriê klei hdĭp kâo nanao. Akâo Ama đru kâo amâo alah knŏng dôk guôn klei đru mơ̆ng pô mkăn ôh, ƀiădah hur har mă bruă čiăng Ih brei djăp mnơ̆ng ƀơ̆ng huă kơ kâo pô, kơ gŏ sang kâo, leh anăn jing klei bi hmô jăk kơ mnuih mkăn msĕ mơh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
