Mathiơ 21:6-11
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Nơ̆r Hơri Hôsana kiơ̆ kơ Sơ̆p Hla bơar ‘Bok Kei-Dei Mathiơ 21:6-11.
6 Thoi noh na ‘bar ‘nu bơngai pơhrăm păng Sư năm kiơ̆ kơ nơ̆r Sư pơkă. 7 Bre sư dui anhăk aseh iĕ yŏng hăm kon sư tơ Yêsu. Lu bơngai pơhrăm păng Sư lơ̆k ao lu sư kơdih tơ kơpal kơdŭ aseh iĕ ăn kơ Yêsu hao. 8 Đei bơngai lơlap-lơlang lơ̆k ao lu sư kơdih kiơ̆ trong wă kơ ‘lơ̆ng rŏ. Đei lu mơ’nah koh hơmŭl ‘long, proh kơpal trong. 9 Yêsu hao aseh iĕ yak rok trong ei na lu bơngai tơpôl ei mơ’nah yak hơdrol kơ Sư, mơ’nah đơ̆ng rŏng kơ Sư. Lu sư chhôk na pơma ‘bơ̆r re khan: “Hôsana, bơnê kơ ‘Bok Krist Kon Sâu pơtao Đawit. Bơnê kơ Sư truh tơ bơ̆n năr âu yua kơ Kră Yang wơh. Păng bơnê kơ ‘Bok Kei-Dei kơpal plĕnh ti.” 10 Truh Yêsu mơ̆t tơ Pơlei Jêrusalem na đĭ-đăng kon bơngai yơyông-yơyang mang, lu sư hli, na jet lu bơngai mă kiơ̆ jơ̆ng Yêsu khan: “Bu noh?” 11 Lu bơngai tơpôl kiơ̆ jơ̆ng Yêsu ei khan: “Sư ‘noh Yêsu, Sư bơngai pơtruh nơ̆r ‘Bok Kei-Dei, Sư đơ̆ng Pơlei Nasaret, dêh Galilê.”
Trong tơm ‘bai pơhrăm ‘nâu:
“Yêsu hao aseh iĕ yak rok trong ei na lu bơngai tơpôl ei mơ’nah yak hơdrol kơ Sư, mơ’nah đơ̆ng rŏng kơ Sư. Lu sư chhôk na pơma ‘bơ̆r re khan: “Hôsana, bơnê kơ ‘Bok Krist Kon Sâu pơtao Đawit. Bơnê kơ Sư truh tơ bơ̆n năr âu yua kơ Kră Yang wơh. Păng bơnê kơ ‘Bok Kei-Dei kơpal plĕnh ti.” (Mathiơ 21:9)
Nơ̆r jet tơchĕng pơwao:
– Kon pơlei Jêrusalem chhôk sơng iŏk Kră Yang Yêsu thoi yơ?
– Lu sư hơmĕng Kră Yang gô pơm tơdrong kiơ kơ lu sư?
– Bơ̆n oei hơri ‘bai kiơ gah Kră Yang Yêsu?
Kơkuh kơ đĭ đăng,
Kơplah bơngai pơhrăm păng Sư dui anhăk aseh iĕ yŏng păng kon sư tơ Kră Yang Yêsu, lu sư lơ̆k ao kơpal kơdŭ aseh iĕ păng ăn kơ Kră Yang hao (Markôs 11:7), aseh ‘noh ưh tam mă đei tah ‘long ăt păng tam mă đei bu hao kơplah mơ̆t tơ lăm pơlei Jrusalem, đe sơng iŏk Kră Yang thoi minh ‘nu pơtao yua kơ đei lơ bơngai đơ̆ng tơring nai brŏk tơ Jêrusalem wă akŭm pơm giĕng Năm Brih, lăm lu bơngai ‘noh đei lơ bơngai băt kơ Kră Yang. Kon pơlei plôh ao lu sư kơdih păng koh hơmŭl ‘long tơ trong wă sơng iŏk Kră Yang Yêsu, tơdrong ‘nâu kŭm thoi tơdrong juăt wă sơng iŏk minh ‘nu pơtao (II Lu pơtao 9:13).
Minh tơdrong kon pơlei chơt hiôk dêh. Lu sư pơma ‘bơ̆r re ư-ang kơ Kră Yang, “Yêsu hao aseh iĕ yak rok trong ei na lu bơngai tơpôl ei mơ’nah yak hơdrol kơ Sư, mơ’nah đơ̆ng rŏng kơ Sư. Lu sư chhôk na pơma ‘bơ̆r re khan: “Hôsana, bơnê kơ ‘Bok Krist Kon Sâu pơtao Đawit. Bơnê kơ Sư truh tơ bơ̆n năr âu yua kơ Kră Yang wơh. Păng bơnê kơ ‘Bok Kei-Dei kơpal plĕnh ti.” (trong 9 BTTHĐ). “Hôsana” wă khan “Apinh dŏng bĕ”. Kon pơlei đei tơlĕch nơ̆r ‘Bok Kei-Dei lăm Hơriso 128:25, 26 wă ư-ang kơ Kră Yang, lu sư tơ’bôh jơhngơ̆m ‘maih wă chang hơmĕng ‘bok dŏng pơklaih truh, păng lu sư hơmĕng dêh Kră Yang Yêsu bơih ‘Bok Dŏng Pơklaih, mălei ưh kơ đei dŏng gah bơhngol na dŏng lu klaih đơ̆ng dêh Rôm đĕch. Kon pơlei đei pơm kơ lăm pơlei tơjrông tơjrang mang, đơ̆ng rŏng kơ Yêsu mơ̆t tơ lăm pơlei lu sư jet “Bu noh? Lu bơngai tơpôl kiơ̆ jơ̆ng Yêsu khan: Sư noh Yêsu, Sư bơngai pơtruh nơ̆r ‘Bok Kei-Dei, Sư đơ̆ng pơlei Nasaret, dêh Galilê” (trong 10-11). Kơplah jơhngơ̆m lu kon pơlei ngach bơih, lu sư ưh pă krao Yêsu kon pơtao Đawit păng ưh pă ư-ang kơ sư ‘bok dŏng pơklaih tih hloh bơih, dang ei sư ưh kơ hloh kơ minh ‘nu bơngai khan lê̆ adrol.
Kon pơlei pơma ‘bơ̆r re Kră Yang bơih kon pơtao Đawit, tơ’ngla dŏng pơklaih mălei lu ‘maih wă kơ Kră Yang dŏng lu sư kiơ̆ kơ lu sư wă. Lu sư ư-ang kơ Kră Yang mălei lu sư hiơ̆k kơ tơdrong Kră Yang dŏng lu sư gah sĕch akar đĕch, ưh kơ đei hiơ̆k gah bơhngol. Dang ei, lơ bơngai lăm bơ̆n oei năm tơ hnam akŭm, hơri ư-ang kơ Kră Yang mălei lu sư hơpơi wă Kră Yang dŏng lu sư klaih đơ̆ng tơdrong pơmat lăm chăl arih. Bơ̆n athei pơ’lơ̆ng hli kơ bơ̆n thoi lu bơngai jum dăr kơ Kră Yang chăl adrol sơ̆, ư-ang kơ Kră Yang dang ei đơ̆ng noh đei tơdrong truh ưh kơ thoi bơ̆n wă lei na tơplih chrih kơ Kră Yang. ‘Bok Kei-Dei khan kơ kon pơlei thoi âu: “Kră Yang khan: Kon pơlei âu năm jê̆ Inh hăm ‘bơ̆r lu sư đĕch; kơkuh kơ Inh hăm hơkŭng, mă-lei jơhngơ̆m lu sư ataih đơ̆ng Inh. Tơdrong lu sư hli yom kơ Inh jơ̆ kiơ̆ tơdrong tơtă kon bơngai đĕch păng đơ̆ng kon bơngai bơtho ăn.” (Êsai 29:13). Kră Yang ưh kơ wă kơ bơ̆n tơ’bôh tơdrong ư-ang kơ Sư mălei lăm jơhngơ̆m ling lang ‘maih wă Kră Yang pơm kiơ̆ kơdih bơ̆n. Athei pơnam hŏk pơhrăm nơ̆r Kră Yang wă băt kơ Kră Yang hơđăl hloh păng đơ̆ng noh bơ̆n kơkuh, ư-ang kơ Kră Yang mă trŏ hloh.
Lu bơ̆n pôm đon lăm tơdrong krao khan,
Kơkuh kơ Ih Kră Yang, inh bơnê kơ Ih yua kơ Ih jur chu pơmat lôch tơ ‘long pơglang wă dŏng pơklaih inh. Apinh Ih tơgŭm inh ling lang ư-ang kơ Ih jơ̆ Kră Yang dŏng pơklaih hăm đĭ jơhngơ̆m păng tơdrong arih inh. Krao khan yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Bơ̆n hăm ư-ang kơ Kră Yang đĭ jơhngơ̆m băt kơ tơdrong Kră Yang mơnat ăn păng tơdrong mơsêh Kră Yang ưh?
Kră Yang chu pơmat lôch tơ ‘long pơglang
Ăn tơdrong dŏng pơklaih kơ rim bơngai
Ư-ang anăn Kră Yang tih hloh
Ư-ang anăn Kră Yang ‘lơ̆ng rŏ
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 12
Kênh Youtube BHKTHN:
