Klei Aê Diê Blŭ: Philip 2:3-4
Êlan kliăng: “Brei grăp čô hlăm phung diih đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh” (Philip 2:4).
Klei êmuh ksiêm mĭn: Ya klei khua ƀĭng kna Y‑Pôl lŏ mtô čiăng ngă klei jing sa? Si ngă anei jing klei yuôm brei mâo hlăm jih jang klei bi mguôp? Si drei ngă leh knuih anei?
Tĭng kơ klei mđĭ ai, čiăng mkŏ mjing klei jing sa, grăp čô brei “hŏng klei luă gŭ”. Hlăk ênuk anăn, klei blŭ pia “hơăi mang amâo tŭ yua, bi ti gŭ, luă gŭ” knŏng pioh lač kơ hlŭn hŏng klei dlăng mưč mač. Arăng amâo mâo ƀuh ôh boh hră “luă gŭ” hlăm hră mơar phung Grek êngao kơ Hdruôm hră Klei Aê Diê Blŭ hlăk êlâo kơ ênuk gưl dua. Kyuanăn dưi lač boh blŭ “luă gŭ” mphŭn mâo mơ̆ng Klei Bi Mguôp Mrâo, lač kơ klei knuih jăk Krist leh anăn bi mklăk hŏng klei mgao.
Khua ƀĭng kna Y‑Pôl mblang mnuih luă gŭ jing mnuih “yap mnuih mkăn jing prŏng hĭn kơ pô”, čiăng lač yap mnuih mkăn “jăk hĭn” kơ pô. Drei khăng mgao leh anăn mplư drei pô kơ klei drei jing jăk ƀiădah tơdah sa čô hdĭp kpă sĭt hŏng ñu pô leh anăn dôk ti anăp klei pap Khua Yang, srăng thâo kral kơ drei jing jhat ƀai leh anăn huĭ mduĭ. Thâo kral klei jhat ƀai, klei soh hlăm drei pô srăng bi mdlưh djăp mta klei krưh mgao, dlăng kơ pô yơh jing kdlưn hĭn kơ arăng. Ti djiêu anăn, “yap mnuih mkăn jing prŏng hĭn kơ pô” ăt jing yap mnuih mkăn “yuôm hĭn” kơ pô mơh, čiăng lač mdưm klei mnuih mkăn čiăng jing yuôm hĭn leh anăn êlâo hĭn kơ pô. Klei Aê Diê blŭ mtô klei luă gŭ jing mta klei brei mâo hlăm jih jang klei bi mguôp (I Y‑Pêtrôs 5:5; Rôm 12:16). Klei jing sa amâo dưi mâo ôh tơdah amâo mâo klei luă gŭ.
Klei mtă mtăn tui tluôn jing “đăm mĭn kơ klei tŭ dưn knŏng kơ ñu pô ôh, ƀiădah mĭn wăt kơ klei tŭ dưn kơ phung mkăn msĕ mơh”. Mblang klă tui si hră phŭn jing “đăm KNŎNG mĭn kơ klei tŭ dưn hjăn kơ pô ôh”. Uêñ mĭn kơ klei pô čiăng amâo jing soh ôh kyuadah sa čô mnuih amâo thâo khăp leh anăn uêñ mĭn kơ asei ñu pô, ăt kăn ñu thâo khăp leh anăn uêñ mĭn kơ mnuih mkăn hŏng klei djŏ mơh. Knhuah hdĭp brei ñĕ đuê̆ tinei jing “knŏng” kơ klei čiăng leh anăn klei tŭ dưn kơ ñu pô jing yuôm, leh anăn uêñ “mĭn” čiăng bi mâo. Klei bi mneh msao hlăm Phung Sang Aê Diê srăng truh mtam tơdah lu mnuih tui duah, mdưm klei tŭ dưn kơ ñu pô jing kdlưn hĭn. Brei răng kơ boh blŭ “drei” huĭdah mdăp ti gŭ klei pia msĕ si myang snăk: Phung Sang Aê Diê drei, êpul mmuñ drei… Hrô kơ klei anăn, brei yap klei tŭ dưn kơ mnuih mkăn jing êlâo hĭn, jing bruă klam kơ drei pô (Y‑Mathiơ 14:15-16). Drei tuôm êmuh mơ̆ Khua Yang brei kơ drei mâo myun hriăm hră, mâo klei thâo săng, mâo prăk kăk, anôk bruă hlăm ƀuôn sang ya pioh ngă? Kăp dưn tŭ hĕ? Amâodah čiăng mgao hŏng lăn ala? Hơăi! Mdê hŏng lăn ala, Khua Yang brei kơ drei lu mta klei jăk siam čiăng kơ drei mă bruă kơ Khua Yang leh anăn kơ ayŏng adei drei lu hĭn, jăk hĭn, leh anăn tŭ dưn hĭn. Klei anăn jing hdră čuăn ba klei jing sa hlăm Phung Sang Aê Diê.
Si ngă drei dưm klei tŭ dưn pô mkăn kdlưn hĭn kơ klei tŭ dưn drei pô mơ̆?
Wah lač: Ơ Khua Yang, akâo Ih đru kâo dôk hdĭp thâo khăp čiăng leh anăn yua klei pap, klei myun Khua Yang brei kăp kah mbha, đru bi rŭ mdơ̆ng ayŏng amai adei kâo nanao.
Dlăng Klei Aê Diê Blŭ hlăm tlâo thŭn: Klei Mmuñ Hđăp 64:1-10; 65:1-13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
