Pajlug 16:20
Khaws tej lus qhuab ntuas no cia, koj lub neej thiaj yuav vammeej. Cia siab rau tus Tswv koj thiaj yuav kaj siab lug.
Lus nug rau sawvdaws xav:
- Vajntxwv Xalumoos qhia txog ob yam twg yuav tsum ua thiaj tau txais lub neej zoo?
- Qhov ntawd xav qhia kom peb txhim kho peb lub neej los ntawm dab tsi?
- Peb tabtom nrhiav koob hmoov qhov twg?
- Peb tau txais yam dab tsi ntawm peb txoj kev nrhiav koob hmoov?
Ib tsoom mloog txhua tus,
Lub neej uas tau koob hmoov yog lub uas sawvdaws ntshaw thiab nrhiav kom tau, tiamsis tsis yog txhua tus yuav nrhiav tau raws li lub siab ntshaw. Ntau tus tibneeg yam tsis yog los ntawm qhov uas lawv siv zog mus nrhiav tej uas yeej tsis pab tau lawv muaj lub neej zoo (Yaxayas 55:2). Vajntxwv Xalumoos tau taw qhia ob yam uas cov neeg uas xav tau lub neej zoo yuav tsum ua li no.
Tim ib, “Khaws tej lus qhuab ntuas cia”. Lub ntsiab hauv nqe no yog: “muab tej lus qhuab ntuas los saib hlob”. “Tej lus qhuab ntuas” ntawm leejtwg? Saib raws li hauv nqe 1-19 ces “tej lus qhuab ntuas” yog cov neeg txawj ntse uas fwm tus Tswv, lossis tau tus Tswv kom hais tej lus qhuab qhia. Thiab saib los ntawm nqe 20 ces tej lus qhuab ntuas kuj yog Vajtswv Txojlus ntag. Yog li ntawd, thaum ib tug tibneeg txo fwm chim los txais yuav cov neeg txawj ntse tej lus qhuab ntuas thiab cia siab rau Vajtswv kev coj qhia ces tus ntawd lub neej yuav:“vammeej”. Lo lus “vammeej” no kuj txhais tau hais tias yog tus tau txais koob hmoov. Cov neeg uas tsom ntsoov rau tej lus muaj tswvyim thiab Vajtswv Txojlus ces cov ntawd lub neej yuav vammeej mus txhua fab (II-Timautes 3:16-17).
Tim ob, “Cia siab rau tus Tswv”. “Cia siab rau tus Tswv” yog tos ntsoov Vajtswv kev pov puag thiab kev pab cawm. “Cia siab” kuj yog ntseeg ruaj khov rau tej uas Vajtswv ua yog yam zoo thiab zoo siab hlo ua raws li tej uas Vajtswv xav kom ua. Cov neeg cia siab rau tus Tswv tau txais koob hmoov vim lawv ua raws li tus Tswv tej lus samhwm tseg, rau qhov tus Tswv tej lus samhwm tseg yog yam zoo (Ntawv Nkauj 34:8; Yelemis 17:7). Cov neeg uas saib ntsoov rau Vajtswv Txojlus qhia thiab cia siab rau tus Tswv lawv tau “kev kaj siab lug”. Kev kaj siab tau hais no tsis yog kaj siab thaum tau zoo xwb tiamsis yog hais txog lub neej tau koob hmoov uas “muaj kev zoo siab” tsis tseg.
Vajntxwv Xalumoos tsis qhia kom peb mus nrhiav koob hmoov, rau qhov thaum peb mus nrhiav koov hmoov ces peb muab peb ua tus tseemceeb hauv kev ua neej thiab xav kom peb tau koob meej tsis muaj Vajtswv (I-Kauleethaus 10:31). Muab hais ua lwm seem yog, kev tau lub neej zoo, lub neej vammeej yog peb paub muab peb tus kheej mus sawv yog chaw. Thaum peb los cuag tus Tswv, cia siab rau tus Tswv thiab rau siab kawm xyaum tus Tswv tej lus uas yuav pab peb muaj tswvyim ces peb yuav tau txais lub neej zoo, thiab thaum ntawd peb yuav yog tus pab tau tej neeg ib ncig ntawm peb ua tau lub neej zoo.
Thov Vajtswv,
Tus Tswv, nyuam yaus ua Koj tsaug uas Koj pub kev cawmdim rau nyuam yaus. Yog li ntawd, nyuam yaus thiaj tau nrog Vajtswv sib raug zoo thiab tau txais lub neej zoo. Thov Koj pab kom nyuam yaus nco ntsoov khaws Koj tej lus tseg thiab cia siab rau koj tsis tu ncua. Amees.
Ib tsoom cov mloog uas hmov thiab tshua,
Peb puas tseem tab tom nrhiav koob hmoov raws li Vajtswv Txojlus qhia?
Nyeem Vajluskub hauv peb lub xyoo: Yauj 11
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
