Klei Aê Diê Blŭ: Klei Bi Hriêng 16:20
Êlan kliăng: “Hlei pô gưt kơ klei mtô srăng đĭ kyar, leh anăn hlei pô knang kơ Yêhôwa mâo klei hơ̆k mơak.” (Klei Bi Hriêng 16:20).
Klei êmuh ksiêm mĭn: Ya dua mta klei ktrâo atăt mtao Salômôn brei kơ pô čiăng mâo klei jăk mơak? Dơ̆ng mơ̆ng anăn brei ƀuh ya jing phŭn kơ klei mkŏ mdơ̆ng klei hdĭp? Ti anôk drei dôk duah klei jăk mơak? Ya boh tŭ dưn drei bi knal hlăm klei drei tui duah?
Sa klei hdĭp jăk mơak jing mta klei jih jang mnuih hmăng hmưi leh anăn tui duah, ƀiădah amâo djŏ jih jang dưi mâo sơăi ôh. Klei lu mnuih čhuai tơdah tui duah klei jăk mơak kyua nao duah ti anôk amâo sĭt ba klei jăk mơak kơ diñu (Y-Êsai 55:2). Mtao Salômôn hưn mdah dua êlan ktrâo atăt thâo mĭn kơ hlei pô čiăng mâo klei jăk mơak.
Tal sa, “gưt kơ klei mtô”. Hlăm klei mblang phŭn êlan anei čiăng lač: “mđing kơ klei blŭ”. “Klei blŭ” amâodah “klei mtô” mơ̆ng hlei pô? Tơdah kna ti êlan 1-19 snăn “klei blŭ” jing klei bi hriăm mơ̆ng phung thâo mĭn, huĭ mpŭ kơ Khua Yang leh anăn mâo Khua Yang mtrang atăt. Mbĭt anăn, tơdah kna kơ kdriêk b hlăm êlan 20 snăn “klei blŭ” jing Klei Aê Diê Blŭ yơh. Snăn sa čô thâo luă gŭ srăng mđing hmư̆ klei bi hriăm mơ̆ng phung thâo mĭn leh anăn đăo knang kơ Aê Diê jing Pô mtrang mngač kơ diñu, leh anăn pô luă gŭ msĕ snăn srăng duah ƀuh “klei đĭ kyar”. Boh hră “đĭ kyar” mblang jing tŭ dưn, mdrŏng sah, mâo klei jăk mơak. Pô mđing uêñ kơ klei bi hriăm thâo mĭn leh anăn Klei Aê Diê Blŭ srăng mă tŭ lu klei tŭ dưn (II Y-Timôthê 3:16-17).
Tal dua, “knang kơ Yêhôwa”. “Knang” jing klei đăo hŏng klei mơak mâo klei mblang kdlưn hĭn kơ đăo kơ klei Aê Diê răng mgang leh anăn thiê brei mnơ̆ng yua. “Knang” jing đăo kơ êlan Aê Diê jing jăk hĭn, leh anăn kyua hŏng klei “knang” anăn gưt ngă tui si klei Khua Yang čiăng hŏng ai tiê hơ̆k mơak. Phung đăo knang kơ Aê Diê mâo klei jăk jĭn kyuadah diñu gưt ngă tui klei mtă, kyua klei Aê Diê mtă jing jăk (Klei Mmuñ Hđăp 34:8; Y-Yêrêmi 17:7). Sa čô mđing uêñ kơ klei bi hriăm mơ̆ng Klei Aê Diê blŭ leh anăn đăo knang kơ Ñu srăng “mâo klei hơ̆k mơak”. Hdruôm hră Klei Aê Diê Blŭ mâo hlăm anăn lu klei ƀuăn kơ “klei jăk mơak”. Boh blŭ anei hlăm klei Israel mâo lu klei mblang hĭn kơ knŏng lač kơ klei jăk mơak. Ñu mblang jing klei mdrŏng sah đĭ kyar hlăm lu kdrêč hlăm klei hdĭp.
Mtao Salômôn amâo mtô drei tui duah klei pap ôh kyuadah tui duah klei pap, thâo săng msĕ si drei dưm drei pô jing phŭn ti krah hlăm djăp mta bruă hlăm klei hdĭp, klei anăn jing sa mta klei čhuai êdimi, ngă kơ drei bi luč klei jăk mơak kyuadah drei truăn ngă soh nanao (I Kôrantô 10:31). Blŭ mdê, klei jăk, klei đĭ kyar leh anăn klei jăk mơak jing boh tŭ dưn drei mă tŭ tơdah drei dưm klei hdĭp drei pô djŏ anôk. Tơdah drei nao kơ Khua Yang pô, dưm klei đăo drei ti Ñu jing phŭn klei jăk mơak, leh anăn mđing uêñ kơ klei bi hriăm mơ̆ng Klei Aê Diê Blŭ, jing phŭn klei thâo mĭn, drei srăng bi knal sa klei hdĭp jăk mơak, leh anăn hlăk anăn, drei pô srăng jing mnuih bi lar klei hdĭp kơ phung riêng gah.
Si ngă drei ăt dôk mơak tui duah klei jăk mơak mơ̆?
Wah lač: Ơ Khua Yang, bi mni kơ Khua Yang kơ klei bi mtlaih Ih brei kơ kâo. Hŏng klei anăn, kâo dưi ba mŭt hlăm klei bi mguôp hŏng Aê Diê, dưi mâo klei Ih Blŭ, dưi bi knal sa klei hdĭp mơak mơai leh anăn jăk mơak. Akâo Khua Yang brei kâo dôk sĭt suôr hŏng Ih leh anăn klei Ih Blŭ nanao. .
Dlăng Klei Aê Diê Blŭ hlăm tlâo thŭn: Y-Yôp 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
