I Timôthê 3:14-16
“Tơdrong lui bơ̆n tih hloh tơpă: Kră Yang jur jing bơngai, Yang Bơhngol ‘Lơ̆ng tơbăt kơ đe Sư bơngai ‘lơ̆ng tơpăt.” (I Timôthê 3:16a)
Nơ̆r jet tơchĕng pơwao:
– Rim wơ̆t ‘bok Pôl ‘blŏk tơtăm na sư chih kơthơ ‘noh kiơ?
– Sư roi tơbăt gah tơdrong mơsêh hlơp kơ tơdrong lui yom thoi yơ?
– Lu bơ̆n gô pŭ iŏk thoi yơ kơplah đei Kră Yang tơ’bôh gah tơdrong mơsêh hlơp âu?
Đơ̆ng blŭng a kơthơ đei chih, ‘bok Pôl đei pơtrŭt bơngai lui lăm đon lui lu sư athei “păng wă kơ ih lui kơjăp khŏm khŏm pơm đon ‘lơ̆ng tơpăt kơ ‘Bok Kei-Dei hăm đĭ đăng bơngai” (I Timôthê 1:3-5; 18-19) păng lăm chăl 2-3, sư tơ’bôh nhen nơ̆r tơtă noh. Hơdrol hloh, sư pơma tơdrong kơnhăm chih kơthơ wă kơ tơgŭm ‘bok bơtho Timôthê oei hơmuh hơmŏng “wă pơm thoi yơ lăm hnam ‘Bok Kei-Dei” (trong 15). Pơtôch nơ̆r, ding truh dang ei, tơdrong ‘blŏk tơtăm lăm kơthơ jơ̆ tơdrong arih băt hli yom kơplah tơ’bơ̆p tơdrong pơlong truh.
‘Bok Pôl roi tơbăt tơdrong mơsêh hlơp đơ̆ng tơdrong lui yom hăm nơ̆r: “Tơdrong lui bơ̆n tih hloh tơpă” (trong 16a). Tơpă, ‘noh jơ̆ tơdrong mơsêh hlơp tih tơpă, yua kơ ‘nâu bơih dôm tơdrong ôn hlơp mă đei tơ’bôh tơbăt ăn kơ Khul Bơngai Lui. Tôm tơdrong mơsêh hlơp âu tơ lăm Kră Yang Yêsu ngăl. Lăm tơdrâu nơ̆r tơm đei pơma pơlơ̆k nơ̆r “đei”, tơ’bôh nơ̆r kăl tơm gah ‘Bok Krist.
Nơ̆r tơm hăm nơ̆r “đei” mă mônh pơma kơ Kră Yang Yêsu jing bơngai. Nơ̆r mă ‘bar pơma kơ Yang Bơhngol ‘lơ̆ng tơbăt Kră Yang Yêsu ‘lơ̆ng tơpăt ‘nâu bơih tơdrong mơsêh hlơp lăm tơdrong lui yom, yua kơ mă khan đơ̆ng tơdrong pơgăn thoi yơ hĭ păng tơdrong rơdu tơrăn kon bơngai lăm sĕch akar, Kră Yang Yêsu bơtho tơ’bôh arih ‘lơ̆ng tơpăt noh jơ̆ tơdrong athei đei, tơdah lu bơ̆n lui gơnang kơ tơdrong mơsêh mơyang Yang Bơhngol ‘Lơ̆ng.
Nơ̆r mă pêng, “đei lu linh jang ‘lơ̆ng kư̆m ‘bôh Sư mơ̆n”. Chăl arih Kră Yang Yêsu đei lu linh jang ‘lơ̆ng ‘bôh, wei lăng, awih awăn. Nơ̆r “đei” mă puăn “đei bơtho tơdrong Sư tơ teh đak đe” tơklep hăm nơ̆r “đei” mă pơđăm, “đei lơ bơngai lui kơ Sư tơ ala teh âu”, pơma gah Kră Yang Yêsu ưh kơ sĭ kơdrô̆ lu bơngai Isơrael đĕch ôh, Sư bơih Kră Yang kơ đĭ đăng kon bơngai. Nơ̆r sĭt lăm nơ̆r mă pêng, puăn păng pơđăm ‘noh jơ̆ tơdrong mơsêh hlơp lăm tơdrong lui yom kiơ̆ kơ tơdrong trŏ kơ lu bơngai lui yom jơ̆ bơngai “lăng ‘bôh” Kră Yang, chă bơtho gah Kră Yang. Arih lui yom ưh kơ sĭ dơ̆ng ‘bơ̆t arih pơm ‘lơ̆ng đĕch, mălei athei arih pơm ‘lơ̆ng băt tơgŭm bơngai nai đei kơtơ̆ng păng ‘bôh Kră Yang Yêsu. “Đei atŏk Sư tơ pơle ‘lơ̆ng Sư” pơma gah Kră Yang Yêsu đei ‘lơ̆ng rŏ kơplah Sư arih tơ teh đak, chu pŭ iŏk pơmat, chu lôch păng iung arih. ‘Nâu bơih tơdrong mơsêh hlơp lăm tơdrong lui yom yua kơ wă ăn kơ lu bơ̆n đei tơdrong hơmĕng thoi Kră Yang Yêsu, dôm tơdrong gleh lap lu bơ̆n arih lui yom ưh kơ sĭ kơ khŏm khŏm, mălei đơ̆ng rŏng kơ ‘noh gô đei “’lơ̆ng rŏ”.
Pơtôch nơ̆r, tơdrong mơsêh hlơp lăm tơdrong arih lui yom ‘noh lăm tơdrong sĭt mă đei tơ’bôh gah Kră Yang Yêsu. Tơdrong arih lu bơ̆n athei ăn kơ Kră Yang Yêsu pơm tơm lăm jơhngơ̆m bơ̆n. Lu bơ̆n ưh kơ sĭ arih thoi Kră Yang đĕch ôh, mălei athei pŭ iŏk tơdrong jang chă bơtho tơdrong Sư kơ lơ bơngai dơ̆ng.
Ơ Kră Yang, apinh Ih tơgŭm inh arih lăm chăl arih rok thoi Kră Yang Yêsu păng đĭ jơhngơ̆m chă ră roi tơdrong mơsêh hlơp đơ̆ng tơdrong lui yom kơ Kră Yang Yêsu pơm tơ’bôh kơ lu bơngai jum dăr kơ inh. Krao khan yua anăn Kră Yang Yêsu Krist, Amen.
Lu bơ̆n tam băt tơpă tơdrong mơsêh hlơp lăm tơdrong lui yom ưh? Lu bơ̆n wă pơm tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: I Kôrintô 9
Kênh Youtube BHKTHN:
