Teev Npe 6:24-27
Nqe cim:
“Yog lawv tuav kuv lub npe foom koob hmoov rau cov Yixalayees, kuv thiaj yuav foom koob hmoov rau lawv” (Teev Npe 6:27)
Lus nug xav:
– Vajtswv Txojlus qhia kom yuav tsum foom koob hmoov rau cov neeg Yixalayees li cas?
– Ncaj rau lub caij txais xyoo tshiab peb ib leeg foom koob hmoov rau ib leeg dabtsi?
– Peb xav kom yus tau tej lus foom koob hmoov ntawm tej neeg ibncig zoo li cas?
Vajtswv Txojlus hais rau Mauxes kom cov povthawj yuav tsum “foom hmoov” rau cov neeg Yixalayees. Foom koob hmoov yog thov Vajtswv foom koob hmoov. Cov povthawj foom tsis tau koob hmoov, rau qhov tsuas yog Vajtswv thiaj yog tus uas pub tau koob hmoov. Leej txiv pheej foom koob hmoov rau tej menyuam, cov neeg laus kuj pheej foom koob hmoov rau cajces. Nov yog ua raws li txojkev ntseeg rau qhov cov neeg Yudais ntseeg hais tias txhua yam koob hmoov zoo puavleej yog los ntawm Vajtswv los.
Cov lus foom koob hmoov uas Vajtswv hais rau Aloos thaud dhau los ua tus qauv foom koob hmoov tom qab no rau sawvdaws xyaum. Thawj lo lus foom koob hmoov no yog cov lus thov kom tau nyob hauv tus Tswv txojkev kaj siab, “thov tus Tswv foom hmoov rau nej thiab tsomkwm nej” (nqe 24). Lo lus “foom hmoov” muaj lub ntsiab tias tos txais zoo, ntawd yog Vajtswv xwbtim ua rau, txhais tau tias tus Tswv xav foom koob hmoov npluamias rau Nws cov menyuam. Nov yog tej lus qhia rau tus Tswv haivneeg yuav tsum muab txojkev sib raug zoo nrog Nws kom tau txais Nws tej koob hmoov. Lo lus “tsomkwm” txhais tau tias saib xyuas thiab tivthaiv, ntawm no yog cov lus qhia rau tus Tswv haivneeg yuav tsum ncaj ncees nyob hauv txojkev sib raug zoo nrog tus Tswv kom tau txais Nws qhov kev “tsomkwm”. Cov lus foom hmoov txuas ntxiv yog “thov tus Tswv ua siab dawb siab zoo rau nej thiab hlub nej” (nqe 25), nov yog cov lus txhawb tus Tswv haivneeg lub zog kom yuav tsum ua neej rau Nws tau ntsejmuag thiab nyob hauv Vajtswv txojkev ua siab ntev, kev hlub. Cov lus foom hmoov tim peb yog “thov tus Tswv tsa qhovmuag saib nej thiab pub rau nej muaj kev kaj siab lug” (nqe 26), lo lus “tsa qhovmuag saib” muaj lub ntsiab lus tias tig los saib, nov yog cov lus txhawb tus Tswv haivneeg lub zog kom lawv muaj kev kaj siab, ntseeg ruaj, tsis ua xyemxyav rau qhov paub tias Vajtswv yeej saib ntsoov lawv. Vajtswv coglus rau Nws haivneeg tias thaum lawv ua rau Nws lub npe tau qhuas ces Nws txoj koob hmoov yuav tsis poob ntawm lawv mus li (nqe 27).
Hnub no yog hnub xiab ib tsiab peb caug, peb tabtom xav kom yus tau foom hmoov dabtsi? Thiab peb ib leeg yuav foom hmoov rau ib leeg hauv Pawg Ntseeg li cas? Cov neeg Nyablaj kev ua neej, lawv pheej foom hmoov rau lub xyoo tshiab kom ntsib kev noj qab nyob zoo, npluanuj, ua neej nyob ntev, muaj zog thiab kaj siab. Hauv cov neeg muaj tus Tswv txojkev ntseeg, peb tsuas foom kom cov kwvtij ntseeg tau Vajtswv “foom hmoov”, txhawb cov ntseeg muaj txojkev sib raug zoo nrog tus Tswv thiab niaj hnub ua neej kom Nws tau ntsejmuag, peb thiaj muaj kev kaj siab thiab tau tus Tswv hlub thaum peb ua neej. Thaum ua neej nyob hauv tus Tswv txojkev “tsomkwm”, peb thiaj tau txais txojkev kaj siab tseeb uas Nws pub.
Thov Vajtswv,
Tus Tswv uas kav lub ntuj lub ntiajteb, nyuam yaus ua tsaug qhov uas Koj pub muaj xyoo tshiab. hnub no yog xiab ib tsiab peb caug, thov tus Tswv koj qhia nyuam yaus hais tej lus foom hmoov hauv kev ntseeg mus rau cov ntseeg rau lub xyoo tshiab kom sawvdaws rau siab ua tus Tswv tes haujlwm. Nyuam yaus tuav Tswv Yexus lub npe thov, Amees.
Peb yuav xa tej lus foom hmoov xyoo tshiab mus rau leejtwg hnub no?
Nyeem Vajluskub hauv peb lub xyoos: I Kauleethaus 6
Kênh Youtube BHKTHN:
