Pajlug 18:10-11, 14
Nqe cim
“Ua neej nyob koj nyiaj taus kev mob, tiamsis tsis muaj leejtwg tiv taus txojkev nyuaj siab?” (Pajlug 18:14).
Nyeem ntxiv Phau Txhais Tshiab:
“Neeg lub siab thev taus kev mob nkeeg, tiamsis leejtwg thev taus txojkev lwj siab?”
Lus nug rau sawvdaws xav:
– Vajntxwv Xalumoos qhia pom qhov tseeb tseemceeb twg nyob hauv nqe 14?
– Nws qhia txog yam dabtsi nyob hauv nqe 10-11?
– Vim licas ntawd yog txojcai tseemceeb thiab ciaj tuag pab kom hla dhau tej cua daj cua dub hauv lubneej?
– Koj xaiv lub nroog ruaj khov twg los nkaum thaum ntsib kev sim siab?
Vajntxwv Xalumoos qhia pom ib qhov tseeb uas tseemceeb heev nyob hauv nqe 14, ntawd yog “lub siab” (HMOWSV) lossis tus ntsujplig (spirit) ntawm ib tug neeg muaj qabhau heev rau nws lubneej ruaj ntseg, txawm yog nws lubcev twb qaug zog tas. Lo lus “kev mob nkeeg” tsuas hais txog nyob hauv nqe no thiab lwm nqe nyob hauv II Xwmtxheej 21:15, siv los hais txog txoj kabmob laug niaj laug xyoo thiab mob phem heev hauv tej plab hnyuv. Yog li ntawd, hais tau hais tias ib lubcev uas tabtom qaug zog muaj peevxwm thev taus kev txomnyem dhau los ntawm ib lub siab tawv qhawv, tiamsis yog thaum ntsib kev lwj siab lawm, ces txawm lubcev yuav muaj zog sis los kuj thev tsis taus (I Timautes 4:8).
Nyob hauv nqe 10 thiab 11, Vajntxwv Xalumoos qhia hais tias yuav kom muaj ib lub siab tawv thaum ntsib teebmeem, ces peb yuav tsum cia siab rau “tus Tswv lub npe” vim ntawd yog “lub chaw tsomfaj uas ruaj khov heev”, yog qhov chaw uas tsis muaj leejtwg ua tau raug puastsuaj vim ruaj khov thiab siab heev (Yaxayas 2:15), thiab ntawd kuj yog qhov chaw nkaum cawm siav thaum raug luag nrhiav tua povtseg (Cov Thawjtswj 9:50-51; Ntawv Nkauj 61:3).
“Tus Tswv lub npe” yog hais txog tus Tswv thiab Nws tej yamntxwv, vim li ntawd, khiav tuaj cuag “tus Tswv lub npe” yog nco ntsoov hais tias Nws yog leejtwg. Thaum ntsib kev txhawj ntshai, peb pheej hnov qab dhia los cuag “tus Tswv lub npe”, txhais tau hais tias peb pheej hnov qab lub hwjchim, lub tswvyim thiab txojkev hlub uas tus Tswv muab pub rau peb. “Dhia mus rau hauv… tus Tswv lub npe” kuj yog txiavtxim siab ntseeg tus Tswv, ua raws li Nws lub siabnyiam. Txhua zaus ntsib kev sim siab hauv lubneej, yuav tsum nco ntsoov hais tias Vajtswv yog tus ncajncees, Nws yeej yuav ua raws li Nws tej lus cogtseg (Ntawv Nkauj 125:1).
Cov neeg ncajncees saib “tus Tswv zoo ib yam li lub chaw tsomfaj uas ruaj khov heev”, tiamsis lwm hom neeg ho saib “Khoom nyiaj txiag… zoo ib yam li lub chaw tsomfaj uas ruaj khov heev” uas muaj tus ntsa yeej siab tiv thaiv tau lawv txhua lub tsamthawj. Lawv xav hais tias kev ntseeg Vajtswv tsuas yog npau suav xwb, tiamsis tseeb tiag cov neeg ua neej qaug rau tej khoom nyiaj txiag thiaj yog cov uas npau suav thaum lawv xav hais tias nyiaj txiag daws tau txhua yam teebmeem uas lawv ntsib (I Timautes 6:17). Vajluskub cem cov neeg tubnkeeg (Pajlug 6:6-11), thiab qhia kom nquag ua haujlwm tiamsis tsis txhob cia siab rau tej khoom nyiaj txiag hauv ntiajteb no.
Txhua tus nyias muaj nyias ib “lub chaw tsomfaj uas ruaj khov heev” rau tus kheej thaum ntsib teebmeem. Qhov uas yuav xaiv lub “lub chaw tsomfaj” twg nyob ntawm qhov uas peb txhim kho lubneej sab ntsujplig zoo licas. Cia li dai lias rau tus Tswv thiab Nws tej lus kom peb tau tiv thaiv nyob hauv tus Tswv lub npe.
Thov Vajtswv,
Vajtswv tus uas ncajncees, thov ua Koj tsaug vim txhua hnub nyuam yaus tau txais Koj txojkev pab cawm. Thov Koj saibxyuas thiab saib ntsoov nyuam yaus. Thov pab nyuam yaus cia siab ntsoov rau Koj, txhob cia siab rau lwm tus thiab lwm yam. Nyuam yaus tuav Cawmseej Yexus lub npe thov, Amees.
Peb puas zeem paub hais tias tus Tswv lub npe yog lub chaw tsomfaj ruaj khov rau peb lubneej lawm tau?
Nyeem Vajluskub hauv peb lub xyoo: Chivkeeb 37
Kênh Youtube BHKTHN:
