Klei Aê Diê Blŭ: II Klei Yăl Dliê 6:12-27
Êlan kliăng: “Hmư̆ bĕ klei dĭng buăl ih leh anăn phung ƀuôn sang ih Israel kwưh, êjai diñu wah lač phă anôk anei; sĭt nik hmư̆ bĕ mơ̆ng anôk ih dôk hlăm adiê, leh anăn tơdah ih hmư̆ leh, pap brei bĕ.” (II Klei Yăl Dliê 6:21).
Klei êmuh ksiêm mĭn: Ya bruă Mtao Y‑Salômôn ngă hlăm gưl myơr Sang Yang? Si ngă knuih ñu wah lač hŏng Aê Diê? Ya klei ñu akâo? Si ngă drei khăng wah lač hŏng Aê Diê?
Dôk ti anăp Sang Yang mrâo myơr kơ Aê Diê, Mtao Y‑Salômôn bi ala kơ jih jang phung ƀuôn sang čiăng wah lač. Jing pô gĭt gai sa ala čar jhŏng ktang, ñu amâo dưi jưh hlăm ai ktang pô ôh ƀiădah knŏng jưh knang hlăm Aê Diê. Jing sa čô khua gĭt gai mda asei leh anăn huĭ mpŭ, ñu thâo săng bruă klam pô jing wah lač brei kơ jih jang phung ƀuôn sang. Jing sa čô mtao ñu srăng čuôn kơŭt ti anăp Aê Diê, mpŭ, êdu êun čiăng akâo wah lač (êlan 13) hlăk êjai phung ƀuôn sang ăt dôk dơ̆ng, bi mklă hŏng klei phung ƀuôn sang čuôn kơŭt leh anăn ñu dôk dơ̆ng; kyua ñu thâo săng Aê Diê jing Mtao kiă kriê amâo djŏ ñu ôh. Jing pô bi leh bruă rŭ mdơ̆ng Sang Yang, ƀiădah ñu brei jih jang mnuih thâo anăn jing klei Aê Diê čiăng leh anăn klei Aê Diê pap čiăng diñu tui hluê Aê Diê amâo djŏ hưn kơ klei pô ngă bruă čiăng phung ƀuôn sang tui hluê pô (êlan 9-11). Klei ñu wah lač msĕ snăk hŏng Klei wah lač Khua Yang Yêsu bi hriăm phung ƀĭng kna (Y‑Mathiơ 6:7-13) leh anăn brei drei tui hriăm gru bi hmô anei.
Êlâo hĭn, Mtao Y‑Salômôn bi mni kơ Aê Diê (êlan 14-15) kyua Ñu ngă leh klei Ñu ƀuăn leh anăn bi êdah klei Ñu pap hŏng ama Mtao Y‑Salômôn jing Mtao Y‑Đawit. Ñu bŏ hŏng klei myang, mdê snăk hŏng phung yang mkăn anak mnuih kkuh mpŭ. Leh anăn ñu ăt akâo kơ Aê Diê brei klei hơêč hmưi leh anăn pap brei klei soh (êlan 16-27), akâo kơ Aê Diê mđing hmư̆ klei ñu hŏng phung ƀuôn sang wah lač leh anăn kwưh akâo. Ñu wah lač hŏng klei đaŏ Pô ngă leh klei Ñu ƀuăn hŏng ama ñu kơ bruă brei nanao kơ djuê ana ñu mâo sa mnuih lŏ čuê, Aê Diê ăt srăng lŏ dơ̆ng ngă klei ƀuăn anăn. Mtao Y‑Salômôn mñă wĭt boh blŭ “pap brei” êma bliư̆ čiăng ƀuh hnơ̆ng yuôm bhăn mơ̆ng klei anei hlăm klei ñu wah lač, kyua ñu thâo jing anak mnuih grăp čô ngă soh sơaĭ anăn čiăng nanao kơ Aê Diê pap brei. Ñu đaŏ kjăp mơ̆ng klei Aê Diê pap, sĭt ñu leh anăn phung ƀuôn sang mđing kơ Ñu wah lač akâo klei hơêč hmưi leh anăn klei pap brei snăn Aê Diê “srăng hmư̆, bi sĭt leh anăn pap brei klei soh”.
Mpŭ, luă gŭ sĭt mmuñ bi mni kơ Aê Diê leh anăn akâo Aê Diê pap brei klei soh jing hdră bi mklă klei đaŏ hlăm Aê Diê leh anăn djăp klei Aê Diê brei leh kơ drei. Mbĭt anăn ăt jing hdră drei bi êdah klei hdơr knga kơ Aê Diê kơ dŭm klei Ñu brei leh, wăt klei lông dlăng čiăng mjuăt bi hriăm drei. Aê Diê srăng mơak snăk sĭt drei bi mni kơ Ñu kơ jih jang klei jăk leh anăn klei lông dlăng Ñu brei drei găn hlăm klei hdĭp, leh anăn đaŏ kjăp ya klei truh kơ drei hlăm sa hruê êgao mâo Aê Diê kiă kriê.
Drei khăng nao giăm Aê Diê nanao čiăng mpŭ mni, bi mni kwưh akâo klei Aê Diê hơêč hmưi leh anăn klei pap brei mơ̆?
Wah lač: Ơ Khua Yang, akâo kơ Ih đru kâo amâo jưh knang hlăm ai pô ôh ƀiădah nao hŏng Aê Diê grăp hruê hŏng ai tiê kkuh mpŭ čiăng kơ Aê Diê “hmư̆, bi sĭt leh anăn pap brei”.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 15
Kênh Youtube BHKTHN:
