Klei Aê Diê Blŭ: Klei Bi Hriêng 16:32
Êlan kliăng: “Hlei pô amâo djăl ăl jing jăk hĭn kơ sa čô jhŏng ktang, leh anăn hlei pô kiă kriê ai tiê ñu pô jing jăk hĭn kơ sa čô dưi mă sa boh ƀuôn prŏng.” (Klei Bi Hriêng 16:32).
Klei êmuh ksiêm mĭn: Pô čih hră Klei Bi Hriêng bi msĕ pô thâo krơ̆ng klei ăl krêñ leh anăn kiă kriê ai tiê ñu, mâo klei dưi hĭn hŏng ya mta klei? Si klei jhŏng ktang sa čô mnuih dưi krơ̆ng klei bluh ai ñu pô? Si klei bi knal kơ klei ktang hgăm drei tuôm găn leh?
Mtao Y‑Salômôn hưn lač kơ klei ktang hgăm hlăm sa čô mnuih bi knal hlăk ñu dưi krơ̆ng klei bluh ai leh anăn kiă kriê ai tiê klei mĭn ñu pô, boh nik nak thâo krơ̆ng mkhư̆ hĕ klei ăl krêñ ñu pô. Ñu bi msĕ “pô amâo djăl ăl” jing “jăk hĭn kơ sa čô jhŏng ktang”, leh anăn “hlei pô kiă kriê ai tiê ñu pô” msĕ mơh “jing jăk hĭn”, mblang jing dưi hĭn kơ “sa čô dưi mă sa boh ƀuôn prŏng”. Khădah sa čô jhŏng ktang mâo klei knhâo arăng mpŭ, mâo lu boh tŭ dưn yuôm bhăn hlăm bruă lĭng kahan, amâodah sa čô jhŏng ktang dưi blah mă lu ƀuôn prŏng ƀiădah tơdah ñu amâo dưi krơ̆ng mkhư̆ ôh klei ăl krêñ ñu pô, amâodah amâo dưi kiă kriê ôh klei mĭn ai tiê ñu pô, snăn jih jang boh tŭ dưn luč mliêt jih bhiâo riâo rit mơh. Msĕ si sa čô mtao hing ang Alexander, dưi sơăi hlăm djăp klei bi blah ƀiădah jing hĕ hlŭn kơ klei ăl krêñ đuôm ai, leh anăn ñu djiê hlăk mrâo mâo 32 thŭn kyua klei ruă duam, amâo djŏ djiê hlăm kdrăn blah ôh. Klei anei brei ƀuh, dưi krơ̆ng klei ăl krêñ leh anăn kiă kriê ai tiê klei mĭn pô, mâo klei bi hmăi kơ klei suaih asei mlei leh anăn kơ lu mta klei mkăn hlăm klei hdĭp. Mnuih dưi kiă kriê ñu pô leh anăn thâo krơ̆ng klei bluh ai ñu pô jing mnuih mâo leh klei dưi prŏng prĭn kơ asei ñu pô. Anăn yơh jing klei ktang hgăm mơ̆ng sa čô mnuih dôk hdĭp djŏ hnơ̆ng.
Mtao Y‑Salômôn kñăm hưn, djăp čô dưi mâo sơăi klei bi knal klei ktang hgăm anei, leh anăn dưi mâo klei ktang msĕ si sa čô jhŏng ktang tơdah pô anăn thâo răng krơ̆ng klei ăl krêñ leh anăn dưi kiă kriê ai tiê ñu pô. Ñu čih hlăm Klei Bi Hriêng 25:28, “Sa čô mnuih amâo thâo kiă kriê ai tiê ñu pô jing msĕ si sa boh ƀuôn prŏng arăng bi klưh leh mnư̆.” Knuih thâo kiă kriê asei pô, amâodah hdĭp djŏ hnơ̆ng jing msĕ si mnư̆ sa boh ƀuôn prŏng kăp mgang, tơdah mâo phung roh ksŭng blah. Snăn yơh, tơdah amâo dưi ôh krơ̆ng ksiêm asei pô, jing msĕ si mnư̆ ƀuôn prŏng dlưh rai, ênưih kơ phung roh ksŭng blah, atăt truh kơ klei luč liê.
Mnuih djăl ăl leh anăn ngêñ ăt ênưih snăk bi kbiă boh blŭ jhat ƀai, bi ruă êka ai tiê arăng leh anăn wăt truh kơ klei bi mdjiê mnuih. Hlăk đĭ ai ăl ngêñ, arăng ênưih snăk luč klei dưi krơ̆ng ksiêm pô leh anăn khăng blŭ amâodah ngă klei amâo mĭn nik ôh čiăng bi hrăp ai ngêñ, êdei anăn kơh lŏ hƀlŏk. Kyuanăn, mtao Y‑Salômôn lŏ mtă mtăn snei, “Đăm ruăt ngêñ ôh, kyuadah klei ngêñ dôk hlăm ai tiê phung mluk.” (Khua Pô Mtô 7:9). Sa čô djăl ngêñ sĭt yơh jing mnuih mluk, kƀah klei thâo mĭn.
Hriăm bĕ klei mtô mtă mơ̆ng sa čô mtao thâo mĭn hĭn kơ jih jang mnuih ti lăn ala: brei jing sa čô mnuih amâo djăl ăl, čiăng dưi kjăp ai tiê ksiêm mĭn bi nik, leh anăn lui wơr hĕ klei soh arăng, snăn drei srăng mâo klei arăng mpŭ leh anăn bi knal klei ktang hgăm jăk hĭn kơ sa čô jhŏng ktang.
Si ngă drei dưi krơ̆ng mơ̆ klei ăl leh anăn dưi kiă kriê mơ̆ ai tiê klei mĭn dôk êđăp ênang, thâo mĭn?
Wah lač: Ơ Khua Yang, akâo Ih đru kâo thâo krơ̆ng klei ăl leh anăn thâo kiă kriê ai tiê kâo tui si klei ktrâo atăt mơ̆ng Yang Mngăt Jăk, čiăng kơ kâo đăm ngă soh hŏng Ih, amâodah bi êka ai tiê arăng ôh, leh anăn bi knal klei ktang hgăm hlăm klei dôk djŏ hnơ̆ng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 22:6-23:6
Kênh Youtube BHKTHN:
