Mathais 24:6-8
Nqe cim:
“Ib lub tebchaws yuav sawv tawmtsam ib lub tebchaws; thiab ib haivneeg yuav sawv tawmtsam ib haivneeg. Yuav muaj kev tshaib kev nqhis thiab av yuav qeeg txhua qhov” (Mathais 24:7)
Lus nug xav:
– Tswv Yexus rov qab hais txog tej yam dabtsi yuav tshwm sim rau tiam kawg?
– Tej cim ntawd qhia paub dabtsi txog Vajtswv kev npaj tseg?
– Dhau ntu Vajluskub no ntuas peb yam dabtsi?
Tswv Yexus tabtom teb rau cov thwjtim txog tej cim uas lawv tsis totaub twg “yog Tswv Yexus kev rov qab los thiab ntiajteb kawg”. Xub thawj yog cov xibhwb cuav (Mathais 24:3-5). Lub cim txuas ntxiv yog “Nej yuav hnov suab ntaj suab riam nyob ze nej thiab yuav hnov tej tebchaws uas nyob deb ua tsov ua rog” (nqe 6a). Lo lus “hnov” yog xav hais txog hnov tsis tu txog kev ua tsov rog, thiab yuav hnov xov txog tej kev ua tsov rog loj heev tshwm tuaj yuav ua rau coob leej txhawj ntshai, tsis muaj kev kaj siab li. Tswv Yexus txhawb cov thwjtim zog hais tias: “nej tsis txhob poob siab, yeej yuav xub muaj tej ntawd, tiamsis tej ntawd tsis tau qhia hais tias twb txog lub sijhawm ntiajteb kawg lawm” (nqe 6b). Tswv Yexus xav kom lawv yuav tsum ua tib zoo ceev lawv tus kheej, tsis txhob cia tej kev puasstuaj ntawd ua rau lawv ntshai tiamsis thaum pom tej kev tsov rog yim hnub yim muaj ntau thiab sib ntaus loj heev, kom lawv zeem paub hais tias ntawd yog tej tim khawv meej tseeb qhia pom Vajtswv kev npaj tseg tabtom tshwm raws li Vajtswv siab nyiam, tiamsis ntawd tsis tau yog tej yam kawg.
Ntawm tej kev tsov rog sib ntaus sib tua txhua lub tebchaws, thiab tiam kawg no kuj muaj av qeeg, kev tshaib nqhis txhua qhov. Lub ntiajteb no twb ntsib ntau zaus av qeeg, tshaib nqhis, kev mob nkeeg nrog rau tej kev puastsuaj, tiamsis nyob rau lub sijhawm hnub kawg, tej kev puastsuaj yuav tshwm muaj loj dua, ntau qhov dua yuav ua rau neeg xav tsis thoob. Tiamsis Tswv Yexus qhia rau cov thwjtim paub hais tias, “Tej ntawd zoo ib yam li tus pojniam uas nyuam qhuav pib mob plab yuav yug menyuam” (nqe 8).
Nyob rau ntu sijhawm niaj hnub nim no, peb hnov tsis tu txog tej xov xwm kev ua tsov rog txhua qhov chaw hauv ntiajteb, haivneeg no sawv tawmtsam haivneeg tod, pab neeg no sawv tawmtsam lwm pab neeg, peb kuj hnov txog tej xov xwm ua tsov rog thoob ntiajteb…Tsis tas li ntawd, tej kev puastsuaj xws li, mob nkeeg, ntuj qhuav, tshaib nqhis, av qeeg txhua hnub muaj tsis tu thiab loj heev dua ntxiv. Peb paub hais tias Vajtswv tabtom uas raws li Nws kev npaj tseg thiab txhua yam no yeej yuav tsum tshwmsim los. Cia li ceev yus tus kheej kom zoo tsis txhob cia tej kev txhawj ntshai ua rau peb nyuaj siab thiab muaj tej kev xav tsis zoo. Peb yuav tsum nco ntsoov hais tias “Tej ntawd zoo ib yam li tus pojniam uas nyuam qhuav pib mob plab yuav yug menyuam” tsis tau yog hnub kawg. Tswv Yexus kuj txhawb cov thawjtim zog hais tias “Nej tsis txhob txhawj thiab tsis txhob nyuaj siab, nej cia li ntseeg Vajtswv thiab ntseeg kuv” (Yauhas 14:1). Thov Vajtswv pab kom peb muaj kev kaj siab hauv txhua lub tsamthawj thiab tso siab plhuav rau ntawm Tswv Yexus vim paub hais tias, Tswv Yexus tseeb tseeb yuav rov qab los tos Pawg ntseeg thiab Nws yeej tsis cia peb tiv tej kev sim siab uas peb yuav tiv tsis tau.
Thov Vajtswv,
Vajtswv, thov pab nyuam yaus muaj kev siab rau txhua yam tshwmsim rau hnub kawg, ntseeg hais tias txhua yam tshwmsim raws Koj kev npaj tseg xwb. Thov tiv thaiv nyuam yaus thiab Koj Pawg ntseeg ruaj khov kev ntseeg rau hauv txhua lub tsamthawj hnub kawg ntawd. Nyuam yaus tuav Tswv Yexus Khetos lub npe thov, Amees.
Peb puas muaj kev kaj siab rau txhua yam kev puastsuaj tshwm sim muaj nyob hauv lub ntiajteb no? Vim li cas?
Nyeem Vajluskub hauv peb lub xyoos: Exekees 27
Kênh Youtube BHKTHN:
