Êphêsô 5:25-33
“Lu bơngai pơm klo kư̆m lei-lăi athei băt ‘mêm kơ akăn sư kơdih thoi Yêsu ‘mêm kơ bơ̆n bơngai lui kơ Sư năm ăn akâu Sư kơdih lôch tang bơ̆n” (Êphêsô 5:25)
Nơ̆r jet tơchĕng pơwao:
– Sơ̆p Hla ar ‘Bok Kei-Dei pơtih tơdrong ‘mêm klo kăn hăm tơdrong ‘mêm ayơ?
– Tơdrong ‘mêm mơnat lăm hnam dơnŏ Bơngai Lui đei gĭt kăl yă kiơ?
– Lu bơ̆n kăl kơ pơm kiơ wă kơ hnam dơnŏ arih ‘mêm mơnat kiơ̆ kơ Nơ̆r Kră Yang bơtho?
‘Bok Pôl pơtih tơdrong ‘mêm klo kăn hăm tơdrong ‘mêm Kră Yang Yêsu ‘mêm kơ Khul Bơngai Lui. Tơdrong ‘mêm noh ưh kơ sĭ đơ̆ng bu pơgŏ, athei ôh, ưh kơsĭ lăp ‘brơ̆k ‘măng bruh đĕch, hưch jơ̆ ‘mêm, pă tơklah băl! Tơdrong ‘mêm mơnat lăm hnam dơnŏ Bơgai Lui jơ̆ đei tơdrong pơkăm pơkă păng chu pŭ iŏk tơdrong kiơ mă ‘lơ̆ng hloh wă kơ bơngai mă bơ̆n hưch ‘mêm noh đei pŭn hiôk lăm tôm tơdrong (trong 25). Tơdrong ‘mêm kiơ̆ kơ Nơ̆r Kră yang bơtho ‘noh thoi rup lăng ‘lơ̆ng hơiă noh tơ’bôh tơdrong ‘mêm Kră Yang Yêsu hăm Khul Bơngai Lui kơ Sư. Klo kăn gô đĭ jơhngơ̆m ‘mêm mơnat dih băl thoi Kră Yang Yêsu ‘mêm kơ lu bơ̆n.
Tơdrong ‘mêm lăm hnam dơnŏ Bơngai Lui hơpơi wă păng tơgŭm dih băl wă kơ tơdrong lăm bre klo kăn noh ‘lơ̆ng rơgoh,’lơ̆ng tơpăt (trong 26-27). Ŭnh om noh ‘lơ̆ng rơgoh thoi Nơ̆r Kră Yang bơtho: “Tơdrong ŭnh om bơ̆n athei ‘mêm yom băl, ‘nĕ kơ pơ’brơh pơm kư̆ kă, yua kơ ‘Bok Kei-Dei wă phak tơpă dôm lu bơngai mă pơm kư̆ kă thoi noh. Mă bơngai oei hơdruh tơdăm kư̆m lei lăi” (Hêbrơ 13:4). Klo păng akăn jơ̆ ‘bar ‘nu bơngai phara băl, tơpă dôm tơdrong đei pơm ưh kơ tôm kăl kơ tơgŭm dih băl, mơnat dih băl, wei rong dih băl. Kăl kơ đei tơdrong ‘mêm , wei rong lăm hnam dơnŏ Bơngai Lui thoi “‘mêm kơ akâu kơ dih” (trong 28-29). Wă khan lăng thoi akâu kơdih, lăng thoi lăm chăl arih bơ̆n kơdih; akăn ơh sơ’ngon klo kư̆m ơh sơ’ngon mơ̆n, mưh klo chơt hiôk akăn kư̆m chơt hiôk mơ̆n (trong 30). Noh nai dơ̆ng, akăn athei chu yom kơ klo sư, kơdih ‘bar ‘nu bre noh jing thoi minh puăt dih băl păng ‘bơ̆t anăp Kră Yang lu sư jing “minh sĕch akar” (trong 31-33). Kơplah lăng tơ akăn bơ̆n kơdih, lu bơ̆n gô ‘mêm mơnat thoi Kră Yang ‘mêm kơ bơ̆n.
Tơdrong ‘mêm gơh đei pơtơm blŭng a bơ̆n đei hưch ‘mêm dêh mă-lei gơh pơm tơ’bôh păng bơwei hăm tơdrong kĕ chu iŏk, Thoi Yêsu Krist ‘mêm kơ khul bơngai lui kơ Sư năm ăn akâu Sư kơdih lôch tang bơ̆n” (trong 25). Tơpă sư, tơdrong ‘mêm klo kăn mă gĭt kăl dêh păng hlĭch chrơp thoi tơdrong ‘mêm Kră Yang hăm khul bơngai lui kơ Sư (trong 32). Đơ̆ng Kră Yang Yêsu đei khan: “Na dang ei Inh wă pơkă ăn kơ iĕm tơdrong ‘nao âu: Inh wă kơ iĕm băt ‘mêm mơnat dih băl kư̆m thoi Inh ‘mêm mơnat kơ iĕm” (Yôhan 13:34). Kră Yang đei ăn kơ lu bơ̆n tơdrong tơm kăl wă kơ klo kăn ‘mêm dih băl thoi Kră Yang ‘mêm kơ lu bơ̆n. Wă kơ hnam dơnŏ Bơngi Lui arih ‘mêm mơnat dih băl kiơ̆ thoi Nơ̆r Kră Yang bơtho, klo kăn athei ăn Kră Yang pơm tơm, hơdai hŏk pơhrăm. Nơ̆r Kră Yang, wang krao khan hơdai băl, păng wang minh jơhngơ̆m bơ̆ jang kơ Kră Yang. Apinh Kră Yang ăn hnam dơnŏ lu bơ̆n pơm tơ’bôh tơdrong arih ‘mêm mơnat, ‘lơ̆ng tơpăt na đơ̆ng noh lu bơ̆n gơh pơm kơdranh kơ bơngai tơpôl lơ.
Ơ Kră Yang ‘mêm mơnat ! Hnam dơnŏ inh băt kơnăl klo kăn lu nhôn noh đơ̆ng Kră Yang pơgơ̆p ăn. Apinh bơtho inh arih lăm tơdrong ‘mêm Ih na đơ̆ng tơdrong ‘mêm noh chăl arih ŭnh om hnam dơnŏ nhôn gơh đei hiôk chơt, wă ư-ang anăn Ih. Yua anăn Kră Yang Yêsu Krist, Amen.
Tơdah jet kon pơlei rông ‘bôt tơdrong arih hnam dơnŏ lu bơ̆n, lu sư gô tơl lơ liơ?
Đŏk Sơ̆p Hla Bơar ‘Bok Kei-Dei lăm pêng sơnăm: Sachari 5
Kênh Youtube BHKTHN:
