I Timautes 2:1-8
Nqe cim:
“Vim li no kuv thiaj xav kom cov txivneej tsa txhais tes dawbhuv thov Vajtswv rau txhua qhov, tsis txhob muaj kev sib chim sib cav” (I Timautes 2:8 – Hmowsv)
Lus nug rau sawvdaws xav:
– Tsa txhais tes dawbhuv thov Vajtswv yog li cas?
– Vim li cas Timthawj Paulus qhia kom cov txivneej tsis txhob “sib chim sib cav”
– Zaj no qhia kom peb yuav tsum muaj txhais tes thiab lub siab thov Vajtswv zoo li cas?
Tom qab cov lus ntuas tshwjxeeb rau Timautes kom tawmtsam yeej yeebncuab thiab muaj lub siab ncaj ncees (I Timautes 1:18-20), Timthawj Paulus hais txog kev thov Vajtswv, tiamsis zaum no hais tshwjxeeb txog cov “txivneej”. Nyob hauv I Timautes 2:8, Paulus qhia yam uas tsimnyog tus txivneej ua thiab tsis tsimnyog ua.
Thawj qhov, Paulus hais txog yam uas lawv cheemtsum ua yog “kuv thiaj xav kom cov txivneej tsa txhais tes dawbhuv thov Vajtswv rau txhua qhov”. Pawg Ntseeg xubthawj swm txojkev thov Vajtswv zoo li cov neeg Yudais, uas yog sawv ntsug thov Vajtswv, lossis tsa tes, ob lub xib teg tsa mus rau saum ntuj. Qhov no, Timthawj Paulus ntxiv lo lus “dawbhuv” rau cov lus ntuas. Vim li cas? Tus uas sau Phau Ntawv Nkauj tau nug li no: “Leejtwg thiaj mus tau rau hauv nws lub Tuamtsev uas dawbhuv?” thiab lo lus teb yog: “Cov neeg uas tau mus rau hauv, yog cov ua ncaj thiab ua zoo” (Phau Ntawv Nkauj 24:3-4). Txhais tes uas tsa thov Vajtswv yuav tsum yog txhais tes tsis ua phem ua qias, yog tsis ua li, tej lus thov Vajtswv ntawm tus neeg ntawd yuav tsis muaj nqis. Cov txivneej yog cov neeg uas ua haujlwm, yog li, thaum ua ib tes haujlwm, cov txivneej yuav tau ua tib zoo saib tes haujlwm ntawd puas dawbhuv tabmeeg Vajtswv, puas dawm kev thov Vajtswv thiab txojkev sib raug zoo nrog tus Tswv.
Qhov tim ob, Timthawj Paulus xav hais yog yuav tsum thov Vajtswv tsis txhob sib cav sib ceg, qhov no Paulus tabtom hais rau lub tsamthawj sib raug zoo nrog txhua tus, tshwjxeeb yog cov nomtswv (nqe 1-7). Vajtswv Txojlus ntau zaus hais txog qhov uas peb tau txais kev zam txim thiab qhov uas peb zam txim rau lwm tus. Chim, npau yog lub cim ntawm tus neeg uas tsis tau saj Vajtswv txojkev zam txim. Thaum paub yus ua tsis tau zoo thiab cheemtsum tus Tswv zam txim, peb yuav ua taus siab ntev rau tej uas lwm tus ua tsis tau zoo, tej nomtswv kav tebchaws.
Tim peb, Timthawj Paulus qhia cov txivneej cia li thov Vajtswv, tsis txhob yog pheej ua neeg nyiam sib cav sib ceg. Txivneej nyiam ua neej raws li kev paub, pojniam nyiam ua neej raws li kev xav. Hais txog ib seem twg, siv txojkev xav los hais teebmeem saib cuag li zoo. Tiamsis daws teebmeem los ntawm txojkev xav ces yog muab yus tus kheej tso rau qhov chaw muaj nrim thiab yuam kev. Thaum siv txojkev xav no, peb yuav yoojyim poob mus rau qhov kev sib cav sib ceg tsis muaj qhov xaus.
Cov ntseeg Yexus cheemtsum muaj txhais tes thov Vajtswv thiab lub siab dawbhuv. Los ntawm tej teebmeem uas peb tsis tshua pom zoo, kuj tsis txhob daws tej teebmeem muaj tus cwjpwm npau taws thiab sib cav sib ceg, tiamsis los ntawm kev thov Vajtswv.
Thov Vajtswv,
Tus Tswv, thov Koj pab kom nyuam yaus nco ntsoov thov Vajtswv, muaj txhais tes thiab lub siab dawbhuv kom tau Koj teb tej lus taij thov. Nyuam yaus tuav Tswv Yexus lub npe thov, Amees.
Peb puas muaj txhais tes thiab lub siab thov Vajtswv dawbhuv lawm tau?
Nyeem Vajluskub hauv peb lub xyoo: Tes Haujlwm 3
Kênh Youtube BHKTHN:
